Ustadz Harun

Juwairiyah Mawardy

USTADZ Harun ka’dhinto namong guru swasta. Sabban are molang na’-kana’ madrasa tsanawiyah. Lema are e dhalem samingguna. Ustadz Harun manabi mare asar molang ngaji e langgar kaagunganna Keyae Sujud.

Sanaossa omor ampon cokop seppo, somangat sareng kakoduwannepon Ustadz Harun ta’ kala ka guru-guru se gi’ anom. Ustadz Harun aktip molang, kajabana songkan otaba manggi alangan se sanget syar’i. Ustadz Harun ta’ tobang se molang.

Menorot Ustadz Harun, neyat daddi guru samangken bannya’ se taleccer. Samolae badha gaji sertifikasi, oreng-oreng pas ce’ soka’na kaangghuy daddi guru. Nabang gaji caretana. Ampon jau dhari kabadha’an gi’ dhimin. Manabi dhimin, daddi guru tadha’ oreng arebbu’ polana ta’ kengeng cagerragi ka kasap odhi’.

Samangken, sanaossa namong molang saare dhuware pas adaftar sertifikasi. Sanaossa molang namong kengeng sataon dhutaon ampon ngaolle gaji. Ustadz Harun ta’ poron ka cara gapaneka. Monggu Ustad Harus, cara gapaneka same sareng pamarenta se korupsi otaba tokang nilep.

Polana Ustadz Harun ngaonenge ja’ saongguna sarattepon guru sertifikasi enggi ka’dhinto paleng sakone’ molang ampon langkong lema taon. Se otama enggi dhari omor sareng pangabdiyanepon ampon cokop abit, ampon ngarte onggu dha’ elmo se ebulangagi dha’ mored-mored.

E settong bakto, Ustadz Harun merengngagi serrona ca-kancana se ampon narema gaji sertifikasi.

”Ustadz Harun, kaula molae narema gaji sertifikasi acora’ sajan gampang laep. Aponapa enggi?”

Ustadz Harun namong mesem.

Settong kancana laen adabu, ”Ana’ kaula lako sake’ ta’ bu-ambu, lako manggi musiba. Kaula sampe’ posang se nyare tamba kaangghuy ana’.”

Ustadz Harun pas mator, ”Pola sadakana korang santa’?”

”Kaula ampon asadaka dha’ ana’ yatim, Ustadz Harun. Ka guru ampon ta’ loppa acabis.”

Ustadz Harun mator pole, ”Gaji sertifikasi gapaneka same sareng oreng atane se ta’ mabi nyeram teggallepon. Daddi, ampon badha okoran zakattepon. Banne namong asadaka biyasa akadiya se re-saare. Kodu eokor kalaban okoran hokom Islam. Manabi ngagunge arta saponapa, zakattepon saponapa. Daddi rajekkena panjennengan salamet tor nyalamettagi dha’ panjhenengan sareng kalowarga.”

”Ja’ reng badan kaula terro ngagungenna kendaraan se sae, Ustadz?”

Ustadz Harun ta’ tor-mator pole.

E laen are Ustadz Harun epareksane sasame guru e sakola’an.

”Panjenengngan ta’ terro ngerenga sertifikasi, Ustadz?”

”Banne ta’ terro ka obang bannya’, Ustadz. Kaula ta’ terro bang-nabanga se daddi ha’na oreng laen. Manabi laggi’ badha se adhiminan sareng kaula se molang, tor ampon cokop sarat, dinggal kanca laen dhimin. Manabi ampon dhapa’ ka giliran, enggi ta’ kadhi ponapa. Se penting ampon padha sareng sarattepon se dhari pamarenta. Tamaso' okoran jam molang.”

”Poko’ ta’ co-ngoco ja’ daddi guru onggu ta’ aponapa, Ustadz…”

”Ampon, nyo’on sapora. Se ebadhi gaji sertifikasi ka’dhinto obangnga pamarenta, arteepon enggi obangnga ra’yat. Kan pas same sareng pamarenta se ta’ alako tape narema gaji sabban bulan? Ka’dhinto tamaso’ korupsi jugan manabi ta’ lerres sareng okoran sarat se dhari…”

“Samangken ampon biyasa, Ustadz…”

”Mator sakalangkong…badan kaula ta’ ngerenga se biyasa, manabi se biyasa ka’dhinto ta’ lerres, ta’ sae, tor namong marogi pamarenta… Tako’ kenneng tola ra’yat bannya’…”

Aherrepon Ustadz Harun ta’ ekasokane sareng ca-kancana sasame guru. Ekoca’ ce-masocce ban gus-mabagus. Tape, Ustadz Harun sa-biyasa sabban are paggun molang. Ta’ eddhep dha’ san-rasan ta’ sae dhari sasarengnganna e sakola’an.

Settong are, Ustadz Harun kaolok kaangghuy ngereng diklat sertifikasi karana ampon eanggep cokop sarat. Ustadz Harun narema dha’ sadaja paratoran se ampon badha.

E kennengngan diklat, Ustadz Harun manggi samacemma careta. Badha guru se namong molang olle sataon ampon adiklat. Badha se ijasana melle, ta’ akuliya onggu. Badha se ta’ molang, keng gadhuwan lembaga, daddi kowasa kaangguy ngereng sertifikasi. Badha se pajat ampon abit molang akadiya Ustadz Harun, keng gi’ buru ngereng sertifikasi.

Sanyatana, e bakto praktek molang, pas bannya’ guru se ta’ ngowasae ka pangajaran se ebulangagi. Ka’dhinto amarga pajat guru se korang elmo. Samangken pajat mosem guru korang elmo. Namong ngangunge ijasa, asakola coma, ta’ nyare elmo. Namong, nyare ijasa kaangguy ngaolle kalakowan. Daddi guru pas korang elmo, aherrepon e bingkeng are, mored korang jugan ka elmo.

Saamponna Ustadz Harun lastare adiklat sertifikasi, ampon gubar dha’ dhalemepon, pas mator adu’a ka Allah.

”Ya Allah, manabi namong daddi balai dha’ akhlak abdi dalem, namong daddi labangnga musiba, tor panyake’ dha’ kaodhi’an abdi dalem, badan kaula nyo’on ta’ ngaolle dha’ gaji sertifikasi ka’dhinto. Tape, manabi daddi tambana kajembaran, daddi rajekke se salamet, tor nyalamettagi dha’ abdi dalem sareng kalowarga, abdi dalem moji sokkor dha’ ajunan dhalem, ya Allah. Amiiin…”

Kardhuluk, Agustus 2015

Carpan e attas epetthek dhari Jawa Pos Radar Madura (JPRM) eccaban Ahad, 16 Agustus 2015.