Panglepor Ate

Sanja’na Hermanto Nuris

Noro’e tetena pekker
Dhalem seksekka nyaba
Alomampa dhalem ngen-angen
Se nete dhalem rassa rengsa

Akkal apaksa dhalem loppana
Ba’ nemmowa tambana
Petanya akarondhang
Dhalem galuyya pekker

Agella’ mesem dhalem jang-bajangan
Nyatana agella’ tape nanges
Ma’ bisa posang eleggana
Petanya tadha’ jawab
Mesem dhalem rassa agella’ sanyatana

Salasa, 21 September 2016

Gagejjer

Sanja’na Hermanto Nuris

Metong pekker dhalem ngarena
Nyata paste eadha’na mata
Nete alomampa dhalem mempe
Mesem agella’ dhalem seppe

Nyerrat petanya dhalem ngen-angen
Nyare jawab maste sanyatana
Ko’imma bula nemmowa
Ko’imma bula nyareya
Ko’imma neko lorongnga

Panas pekker nyata ta’ paddhang
Celleppa aba’ asapo’ gagejjer

Salekor September 2016

Sanja’-Sanja’ Uswatun Syarifah*

Nemor

Nemor nonto matarbuka ate bula

Kaangguy ngamba’ barat

Adhing-sandhing kalaban dika

Sabab sampornana badanna Adam

Kalaban asalengka’na odhi’na Hawa

Tarate, 2016

Banne Ta’ Terro Magaggarra Baji’

radarmadura.jawapos.com

CARPAN HASMIDI

RENG-ORENG padha manjeng neng taneyan ngabas ka dhaja. Teppa’ ka dhalem kamar se gun settong kabbiyanna. Tadha’ se bangal maso’ ka dhalem.

Sabadhana oreng se ajemmor jareya gun aparsemmon. Asa-karasa sampe’ sowarana ta’ ekaedhing kopeng settong balakkadan. Angen cellep ngendhing dhari temor nyambi sonarra are on-laon dhari budhina bungkana sabu. Dineng ramo’na ngoker padduna pakarangan se dhi temor loros kalaban kandhangnga sape.

Agalimbang oreng bine’ kasorang neng dhalem kamar. Bengko pegun atandhu’ dhuwa’ neng attas gentengnga acora’ etombuwi dhuri-dhuri raja. Settong bine’ se laen toju’ marangko to’odda babine’ se agentang ngolo bara’.

Teppa’ neng babana lamari se ngadhep ka lao’. Dineng lencak ampar asalemot sasap rambing dhari sarong eseba’ dhuwa kabendherran badha neng attassa cethagga reng bine’ jareya keya.

Badha tanges ekempet neng dhadhana. Gariming ngedhingagi sowara esaloy kalaban serro sake’ ta’ kowat balangaja. ”Dina gan sakone’, ja’ ta’-santa’ anyaba. Areya paggun sake’ ka tabu’na ba’na”, sajan aban, reng-oreng padha dhateng sajan bannya’ se manjeng.

Ta’ kantha badha se laresa toju’ ka amperra. E lowar, anggidanna dhaun rakara ngampar abarna soklat towa kerreng parana. Bathok se maroka aseba’ egabay kennenganna buceng dhari roko’ se epesel ka pabir dhulambar.

Ana’na Tokang Carok

CARPAN UBAIDILLAH HASANI

”KA’, wa... entare teleponna. Molae gella’ amonye. Tadha’ se ngeddhebbi. Paleng badha se buto ka ba’na,” ale’, binena sengko’, ngolok dhari dhapor.

”Iya antos gallu,” sengko’ ajawab dhari taneyan. Pareppa’na jareya sengko’ gi’ aseyol eadha’na mano’ keteran. Sengko’ ta’ edhing monyena telepon se esaba’ edhalem roma.

Samarena abarri’ pakan ka tang mano’, sengko’ duliyan ajalan ka dhalem roma kaangguy nenggu sapa se nelepon gu-laggu. Edhalem roma, telepon jareya ekala’ pas etenggu nyamana sapa se badha e kacana.

E kaca telepon jareya se kalowar mangkana nyamana sala settong guru se ngajar tang ana’, Salman. Samarena etenggu, sengko’ duliyan mece’ tombol se badha gambarra telepon abarna biru dhaun.

”Halo, assalamu’alaikum,” oca’na sengko’.

”Waalaikumussalam,” guru jareya, Pa’ Gunawan, ajawab.

Ta’ Melo Kabar

Sanja'na Hermanto Nuris

Angen bara’ angen temor
Ngalemba’ nyapo’e badan
Nembara’ nemor padha ajalan
ngereng tombuna kabar

Aba’ arassa e ganjar
Kalaban pengarep se ta’ ajajar
Pola badha angen temor
se bisa ngeba ka nembara’

Ngarep tadha’ earep
Kabar se paste paggun esare
Olle jarna’ ka se nete
Ame’ daddi tambana ban bisa eperte

15 Sep 2016 pokol 13.20

Teppa’ ka se Lopot

radarmadura.jawapos.com

CARPAN MUDHAR CH.

SABELLUN are ngoncar e mongging temor, sonarra la nera’e alam. Ta’ onggu tera’. Gi’ mar-samar mowa, cok-kaleccok mano’ para’ seyang. La pa’kalena sateya Chici, pottre sareyangnga Pa’ Camat, alari.

Pata dhuratos meter jauna dhari bengkona, bis patas santa’ jurusan Sorbaja dhari temor epaambu. Supirra ngerrim dakkala. Motor ambu teppa’ e adha’na Chici. Ta’ mekker lanjang pole, Chici ongga ta’ le-toleyan. Ta’ ngeba ettas. E kasangnga gun badha lumpet ban flashdisk. HP-na molae malemma se epate’e bakto eeccas esaba’ e kasang treningnga se kacer.

”Turun mana, Mbak?” kondektur atanya.

”Surabaya, Pak,” Chici ajawab sambi ajulu pesse atosan ebu. Karcis ebagi ka Chici abareng soso’. Chici ta’ tong-bitongan pole. Pesse duli epamaso’ ka kasang se kangan. Chici ngerset ka semma’na kaca e penggir kangan. Korse nomer tello’ e budina supir.

Chici ngabas ju-kajuwan e penggir jalan. Pekkerra enga’ ka reng seppo dhuwa’na, ”Abdina sapora,” sowarana cekka’ e rung-gerrungan. Nyoba’ ebaccae kalaban ngalodhu’ eber. Paggun ta’ bisa. Mala arassa pae’. Pae’na pakker, kettar, saebu kale lebbi pae’ dhari memba.

Dhapa’ ka Sorbaja, Chici toron ta’ nemmo tojjuwan. Kaangguy matennang aba’, Chici nyewa kamar hotel. Ngala’ kellas se paleng modha sanajjan pessena Chici bannya’. Pessena korang lebbi salekor juta’an e ATM-ma. Tape reng seppo dhuwa’na, otamana reng seppo lake’na se paleng kowat ngajari ana’na kaangguy odhi’ sa-biyasa . Odhi’ apa badhana.

Sape Korban

radarmadura.jawapos.com

CARPAN AMIRUL MUTTAQIN*

TELLASAN Idul Adha gi’ korang satengnga bulan. Tape e Pasar Keppo ampon ramme oreng ajuwal sape korban.

Ta’ biyasana Pasar Keppo talebat ramme enga’ samangken. Argana sape pon acem-macem. Badha se Rp 5 juta sampe’ ka bellasan juta. Argana sape se ejuwal e sar-pasar, husussepon Pasar Keppo, padha ongga sadaja. Se biyasana sape ejuwal Rp 7 juta ongga ka Rp 8 juta.

Are-are ngadhebbi Tellasan Idul Adha paneka onggu neng-sennengnga dagangnga keban korban. Bi-lebbi dagangnga sape. Dagangnga sape se dhari ban-sabban kottha padha badha e Pasar Keppo. Pasarra sape se ampon kalonta e Kottha Pamekasan.

E are Salasa ka’dhissa’ bannya’ dagang masarragi sapena. Tamaso’ jugan Matra’ie, dagangnga sape e Disa Camplong, Pamekasan, se ampon ekennal sareng masyarakatta. Bannya’ oreng e Disa Camplong nyoro melleyagi sape ka Matra’ie.

E bakto ganeka jugan Matra’ie padha adagangngagi sapena se gun ngeba dhupasang. Sape se dhupasang neka ampon etabar sareng Ji Sulaiman Rp 6,5 juta tong-settongnga.

”Ka’ Mat, sape se epangger e seddi’na kan pao ganeka etabar saponapa?” ca’na anomma kaula ka Matra’ie.