Carpan Irwan
Effendi*
E sorop are, Ali alan-jalan dha’ bala tatangga se ta’ jau dhari romana. Nyambung silaturahim tor maelang kerrong se
ampon para’ ganebba dhutaon ta’ atatemmo. Sabab nyare elmo e pondhuk ta’ le-mole saabidda.
Salanjangnga jalan rassana ampon elebadi, sampe’ ekarassa lesso Ali se ambu
namoy dha’
tatangga. Cem-macemma
jajan ampon eangka’agi, molae dhari se manes, lema’, tor laennepon. Ta’ rangrang dhari sabagiyan tatangga
atanya bila
se abakalana. Tamaso’ anomma, Ahmad. Tape Ali coma alajjai petanyana anomma kalaban mesem. Ta’ kapekker cara ganeko. Sabab Ali andhi’ pangaterro se lebbi
tenggi kaangguy nerrosagi sakola’anna. Se juganan daddi pangaterro oreng seppo dhuwa’na.
Dha’rammah Ali se ta’ andhi’a nasep se padha ban oreng seppona. Sabab ampon daddi kabiyasa’an masyarakat e disana.
Manabi lulus dhari MA kabanya’an dhat-ngodhadanna langsung mangkat
kalowar, nyare lako otaba abakalan. Akherrepon daddi oreng tane jugan, akadiya masyarakat kabannya’an.
”Manabi cara ganeko, ta’ kapekker, gi’ terro nyareya elmo,” jawab Ali.
Ampon abit rassana Ali tor-catoran
sareng anomma se badha e ju temor dhari romana. Nyareta’agi kabadha’anna e pondhuk tor laenna, saengga ta’ ekarassa adan Maghrib ampon dhapa’ bakto. Adan se
amonye dhari
musalla ta’ jau dhari romana anomma. Enggi ka’dhinto Musalla Al-Jauhari.
Sakejja’ Ali
ajalan ka lowar, ngedhingngagi
kalaban jarna’ sowara se amonye e corongan. Sowara serret tor barra’ ganeko rassana ekennal dhari Ali. Tape ta’ pate jellas.
Ali abali pole ka dhalem, atanya ka anomma.
”Nom, pasera se adan?”
”Guruna ba’na,” jawab anomma. ”Ustad Juhari!”
Ali langsung
nondhu’. Arassa sala
aba’na dha’ Ustad Juhari. Guru se
ampon abellasan
taon ngajari Ali ngaji, dhari alip sampe’ banjur maca Al-Qur’an, saenggana Ali epamondhuk. Molae Ali mangkat mondhuk sampe’ sanonto ta’
perna sakale acabis dha’ guruna kasebbut. Ali arassa sala, ta’ sapatodda mored dha’ guruna cara ganeko.
”Arapa,
Cong?” tanya anomma Ali.
”Bunten ta’ ponapa,” jawab Ali notope kasossa’anna.
”Jalan dallu, acabis ka Ustad Juhari, laju asalat magrib
jama’a e dhissa’. Marena jareya dha’enna pole!”
Ali langsung jaga.
”Enggi, Nom!” sambi asalaman Ali laju mangkat.
E musalla se ta’ pate lebar, Ali langsung maso’, ngabas sakabbinna se badha e dhalem. Al-Qur’an, lama’, emmik, messin, candhila, tor geddhung ampon aoba sadaja.
Lama’ bak rombu, geddhung ampon amot-lomot, bang-sabang eman-ka’emman, tak karabat. Rassana musalla ganeko ampon alan-bulan ta’ erabat. Ta’ enga’ jaman lamba’ se gi’ Ali padha ngaji e musalla ganeko. Lama’ sabban
minggu esassa, geddhung bila para’ are tellas eanyare, karabat ta’ kadiya sanonto.
Ali buru maso’ barisan kaangguy abajang Magrib. Kalaban ma’mumma
se coma tatello oreng. Ustad Juhari daddi Imam. Subairi, Fahrur, tor Ke Kosen. Oreng seppo
se ampon molae lamba’ daddi ma’mum e Musalla Al-Jauhari ka’dhinto.
Ali ale-tole ka
penggir, ka budi, pola me’ gi’ badha se ta’ dhateng. Tape rassana tadha’. Bajang
kare saraka’at, tape Ali paggun
jeng-manjeng ngantos na’-kana’ me’ gi’ badha se ceccer. Tape paggun tadha’. Ta’ enga’ lamba’, moredda Ustad Juhari possa’ sampe’ empa’ shaf pol,
raja kene’
padha ngaji. Tape bunten sanonto se coma kare dhadhuwa’ na’-kana’ se laggi’ ta’ oneng napa.
***
Samarena abajang sonnat, Ali langsung asalaman, nyongkem dha’ Ustad Juhari tor Ke
Kosen kalaban mowa se nondhu’ todhus. Sabab, ampon abit Ali ta’ abali dha’ kennengngan ngajina ganeko.
”Bila
dhateng, Li?” Laonan Ali ngangka’ mowana mandeng Ustad Juhari. Gaggara rassana aeng matana ngoladi salerana ustadda se ampon seppo. Bida ban sabellunna. Salera se lamba’ berse tor tera’ mangken
ampon aris-garis.
Janggu’ se
pajat lanjang molae lamba’ mangken ampon ngapote.
Songko’ ajji barna pote mangken bak
abarna koneng. Tape ta’ ngorange dha’ salerana se karismatik tor dermawan.
”Gella’ ka’dhinto,” jawab Ali ta’dim.
”Abit sengko’ ta’ tatemmo so ba’na. Sateya la sajan gantheng, koneng, lempo. Baramma, perna e pondhuk?”
”Enggi,” jawabba Ali sambi mesem.
”Ajar pabajeng pongpong gi’ ngodha ma’le ta’ kare kastana bila towa. Ta’ enggi, Man?” oca’ Ustad Juhari.
”Iya, Cong, apapole ajar e pondhuk!” oca’na Ke Kosen nyaodi. Ali coma aonggu’ sambi mesem. Ngabas Ustad Juhari tor Ke Kosen se padha agella’, lakar paggun dha’ salerana Ustad Juhari, paggun senneng alar-gellaran maske
ampon seppo.
”Mayu ka,
Cong, ma’le ta’ lem-malem,” oca’na Ke Kosen dha’ Ustad Juhari.
”Enggi tore,” sambi jaga dhari toju’na, Ke Kosen padha jaga.
”Sengko’ gi’ entarra onjangan ka kon Mora’e. Ba’na neng dhinna’ ya, bila adan Isya’ marena adan. Ja’ kaloppae ajari ale’na se dhuwa’ jareya. Sabab adha’ pole, moredda ustad ampon la
raja kakabbi, la padha penter ca’na,” oca’na Ustad Juhari sambi mesem.
Ali aonggu’ nyanggubi
dha’ pakonna guruna. Sabab ampon para’ dhutaonna Ali ta’ ngabdi dha’ guru se ampon malae
ngaji molae gi’ kene’ ta’ enga’ gi’ ta’ mondhuk lamba’. Ali se biyasana ekon-pakon Ustad Juhari paste ta’ nola’ maske se epakon ka’dhinto rassa berra’ tape saabidda Ali sanggup tor ta’ kalowar dhari hokom Islam, Ali paggun nyanggubi.
Ustad Juhari
langsung mangkat sareng Ke Kosen entar onjangan. Salamettanna Ghafur. Kancana Ali se abakalan ban sapopona. Na’-kana’ se lamba’ padha ngaji ka Ustad Juhari. Tape bunten
kadiya sanonto, moredda Ustad Juhari gan settong acareccetan ambu sabab alako, mondhuk, tor kadhang karana sengka la apangrasa penter. Ali nyander ka geddhung abarrengnge na’-kana’ dhuwa’ se ngaji.
”Tore se ngajiya ganteyan!” oca’na Ali. Settong ana’
langsung maju ka Ali laju maca audu. Lancar ana’ ganeko maca At-Tanzil se
gi’ juz empa’.
Sakadhang badha salana settong dhuwa’. Tape Ali langsung maenga’ pas mabandher dha’ baca’anna. Arassa bunga Ali dha’ ana’ ganeko sabab banjur macana.
”Bagus,” oca’ Ali.
”Pasera nyamana?”
”Zubairi,
Ka’.”
”Pabajeng ngaji ma’le sajan banjur!” Ana’ ganeko aonggu’ laju nyorot ka budhi. Settong ana’ pole maju tape ta’ langsung maca, coma nondhuk aotek duddu’na se dhari lente.
”Tore baca!” ca’na Ali.
”Ta’ oneng kaula,
Ka’,” jawabba sambi aseng-geliseng.
”Bunten ta’ kera epadha’ka’emma bi’ kaula,” na’-kana’ ganeko paggun nondhu’.
”Tore etontona bi’ kaula,” Ali langsung maca, audu sambi
etoro’e ana’ ganeko. Saellana cokop abit se nonton Ali nondhu’. Dhari matana agarabas aeng se mabacca pepena. Saenggana ana’ gella’ coma neng-enneng maddhek. Ali paggun nondhu’ ta’ ngangka’ mowana. Enga’ dha’ Ustad Juhari se malae
Ali ngaji. Etonton
kalaban sabbar
maske ce’ sarana Ali ta’ tao ngaji lamba’. Tape Ustad Juhari paggun sabbar malae, saenggana Ali banjur maca Al-Qur’an kantha sanonto. Lakar raja onggu kasabbaranna Ustad Juhari
malae red-moredda se kabannya’an nger-balangnger.
Aromasa andhi’ otang Ali dha’ Ustad Juhari. Otang pangabdiyan dha’ oreng se ampon daddi
guru tolang. Se ampon aon-taon malae. Bannya’ macemma elmo se ampon ekaolle Ali dhari Ustad Juhari akantha tajwid, fiqih, tauhed, tor laennepon. Ta’ cokop rassana Ali apareng balessan dha’ jasa-jasa se ampon eparengngagi dha’ aba’na. Ali aonga’ ngabas na’-kana’ e adha’na se ampon molae gella’ toju’. Adhantos Ali ambu nanges.
”Cokop pon kassa’ ngaji dibi’,” Ali langsung jaga kalowar ngala’ wudu’ ka jeddhing maelang becca se badha e pepena tor nyocceyagi pole wudu’ se bettal.
Ta’ kantos abit adan Isya’ ampon dhapa’, Ali langsung ngala’
emmik pas adan. (*)
Batuampar, 2017
Epetthek dhari: Guru Tolang
Tidak ada komentar:
Posting Komentar