Tajin Sappar

Sanja’na Azizi Sulung*

Teppa’ e tera’na bulan

Langnge’ asemmo sompek, sanajjan tera’na tar-kataran

Tase’ seppe, alempet omba’ kadibi’an

Oreng se e penggiran, la padha siyap naja’ parao kaangguy majang

Oreng tane agangse are’, mandhi landhu’, nambi’ rajang

_settong tojjuwan, nyare pangoreban_

Kaangguy ajaga kasalametan

Reng-oreng padha mundu’ tajin, ngobbar mennyan, epencar satatangga’an

sanajan sakone’ epadhang-mendhang

            _settong tojjuwan, ajaga nan-dinan ban kowatta ataretan_ 

Lamujang, 10 Sappar

*Santre Pondhuk Annuqayah Lubangsa Utara.

Epetthek dhari Jawa Pos Radar Madura (JPRM) eccaban Ahad, 4 Desember 2016.

Bume Aeng Mata

_sasemba’an dha’ salerana se molja K. Towan Basyir AS._

Sanja’na Azizi Sulung*

Bume ekarassa ampon talebat towa

Anyakse’e alam se ampon kalowar dhari kabrana

Angen salbut, abentor babator

Ojan, ba’a, ta’ sakera, roma ebendhem tana

Bu-tombuwan la kerreng kabbi

Nembara’-nemor arebbu’an

_maske baktona gi’ padha lanjang_

Reng-oreng la padha pegga’ pangarep

Saba se salebarra, agandhu’ gi-bigiyan, ngalaras tarapas alaban ba’a

Panenggin se sabannya’na, agaluy baliker, sangger alaban panassa are

Bume ekarassa ampon talebat towa

Manossa sajan emo’, norote napsona

_arebbu’ mennang, arebbu’ kennyang, arebbu’ nyaman_

Ta’ marduli amoso taretan, ta’ marduli atokar satatangga’an

Tor kadhang agama eba-giba, gabay tarowan

Bume, onggu ekarassa ampon talebat towa…

Lu’-Gulu’, 16 Sappar

*Santre Pondhuk Annuqayah Lubangsa Utara.

Epetthek dhari Jawa Pos Radar Madura (JPRM) eccaban Ahad, 4 Desember 2016.

Kaju Potong Tello kale

Carpan Hasmidi

POLISI, bannya’ oreng se ta’ endha’ tatemmo, apolong, apa pole andhi’ taretan otabana bala se daddi polisi. Kalamon egi’-gigi’, polisi reya kalakowanna ajaga ban madaddi kabadha’an tamba nyaman. Mon tadha’ polisi yaktena bannya’ oreng alako se ta’ genna ban nyalenda dhari kanyamanan odhi’na ba’na ban odhi’na tatanggana bi-lebbi sabannya’na oreng se badha neng dunnya.

Kae Suri sala settong se paleng ta’ endha’ kalaban badhana polisi. Sabelluna ana’na se sareyang ngalahirragi. Gi’ bakto binena ngandhung. Kae Suri messen ta’ terro andhi’a na’poto se daddi polisi.

Dhalem pangarebba sabban are ban malem eduwa’agi dha’ babaji’ se gi’ badha neng tabu’na binena, ana’na se sareyang mandaran ta’ daddiya polisi. Bakto nyalemeddagi bulan pettengnga, Kae Suri menta ka kajina, dhaggi’ bila napa’ ka du’a mandaran epajauwagina dhari sadaja urusan kalaban polisi.

Malem jareya Rakib entar amaen ka barungnga Wardi. Sabban malem oreng padha akompol neng jareya. Lalakona acareta ban ngobi samalem benteng. Tadha’ laen lalakona. Badha keya se amaen dum. Se kala paggun olle okoman dhari sabarengngan. Acem-macem okomanna ban cara maenna. Badha se kampe’ ngangguy kampe’na jemmoranna kalambi, badha eokom manjeng, ban badha keya ngokom se kala kalaban epanengkong.

Ojan Ngamba’ Rejjep

Sanja’na Rofiki Ar

On-laon ojan totok

Keteran ngocel akortok

Pan-barampan are, ondhem gun tek-ngetek

Ojan gun tek-rettek

Mejet ngamba’ Rejjep

Nyapa baja sobbu

Macengngar kana jagung ban garabadan

Magaga’ tombuna panja’ ban kajuwan

Manyarendhem kembang kananga e padduna taneyan

Ojan atandha’ nyare aba’

Ngejung ta’ bu-ambu

Angen bara’ ngalesser agiba taresna

Mata are ngontop nyolor careta

Paddhang bas-abasan ngajum barna

Rejjep ngombar nyare pornama

Ba’ taowa dika

Thotthoweng se lako acerreng

Samarena ojan

Ban keteran se lako akortok sabban laggu

Asokkor ta’ perna tobang, ta’ bu-ambu

Sabab manossa gasek ebuko’ tako’

Bila kane’madan ejekjek lendhu

Bila pangarep esarap barat kaballu

Laher amet ngeket pangarep

Tanggal ngodha tang-bintang padha serep

Malem ondur-dhateng nyapot pornama se aokep

Kare angen mapaga ondhem notta’ ojan makopo Rejjep

Romben Guna, 2016

Epetthek dhari Jawa Pos Radar Madura (JPRM) eccaban Ahad, 27 Nopember 2016.

Kejung Omba’

Sanja’na Rofiki Ar

Omba’ ngejung e paseser

Bakto are nganggi’ petteng

Bakto pornama ngontop e popossa nyeyor

Reng pas padha senneng

Ngabas sampan alembai, atandha’ ekejunge omba’

Dhalem kejungnga omba’

Robana dika ngombar ajang-bajangan

Bula abali ngadhebbi taresna

Ngadhebbi kerrong se tadha’ batessa

Bila pornama ngonang e tas bubungan

Angen aseyol, sokma ngocel taocol

Ngabber, pas gaggar e tengnga sagara

Nyellem egulung omba’

Ngalesser angen sagara

Nyosop lebat candhila

Ajagai reng paseser

Kaangguy mangkat se alajara

Romben Guna, 2016

Epetthek dhari Jawa Pos Radar Madura (JPRM) eccaban Ahad, 271 Nopember 2016