Baluluk Balungkadan

[1]
Baluluk Balungkadan
Ta’ eken-reken
Gaggar sabban are
Dhari tenggi bungkana nyeyor
Ka tana saba se ta’ parlo

Lenye parana, bungkol aba’na bullong
Dhagingnga alobang
Tembus ka atena,
Sabariya aengmata dhalem badanna
Ngalocor tadha’ oreng tao,
Bila onggu aba’na
Se temmo bullong. gurpong
Loka raja kaodhi’anna.

Mongging

Anggidanna Soe Marda Paranggana*

alandhu’ loka neng e seppena

ngaor peddi panas abu tomang

ompos-ompos rekong nangkorong

bines-bines mangmang,

ngakalambang sajau-jauna mongging

alandhu’ loka neng e seppena

rengsa atatamen mempe nalangsa

ate neko lakona labu ka robana

:

balang-balang ngorpeng

mano’-mano’ nyolpe’

solbu’na buwa burung se biruwa. nyelo

sanonto ampon tongrap,

salowas-lowassa ecokla’ gan sabai’

alandhu’ loka neng e seppena

selbi’ neng e konco’, epetthek.

Ra’-tera’ Tana, 13.10.2016

Sanja’ eattas epetthek dhari Jawa Pos Radar Madura (JPRM) eccaban Ahad, 16 Oktober 2016 otaba Puisi-Puisi Berbahasa Madura Soe Marda Paranggana

 

Nangkonang

Anggidanna Soe Marda Paranggana*

nang-konang se agarinap e pettengnga

re-sareyan kelbu’ salanjangnga

se akebba’ neng e kalembangnga

ngo-jangngowan tera’ bunto’ kaodhi’anna

sakaleyan nyongkar dhaun e dhadhana

sakaleyan nyongka’ ombut lalokana

sapaneka lembu’ angen dhalem songay

aeng mata. motel peddina olo

moger roso’na onjur se tapengsor dhulumanna

ngaratap sowarana sonar

ngakaratap leddu’na du’a

o, roga kadaran tolang adhuna-lesan

se eonjuk mempe ce’ tenggina

Sorop Are, 12 Oktober 2016

Sanja’ eattas epetthek dhari Jawa Pos Radar Madura (JPRM) eccaban Ahad, 16 Oktober 2016 otaba Puisi-Puisi Berbahasa Madura Soe Marda Paranggana

 

Bila Dhapa’ ka Baktona

Anggidanna Soe Marda Paranggana*

gunong soga’ mandiga’

tase’ mosse’ aomba’

saleng salep ler-keleran nyapsap

nyorong mardha

naja’ poncana nyaba, datkala

kole’-kole’ akombi’, daging-daging nyelbat

ta’ ka langnge’. bigina badan nompa

ta’ ka tana

bila dhapa’ ka baktona

tabu’ bume ngota apoy

bulan kalero ngombar

are kolbas panggang sakelan

ekolop bai’ sera-sera manossa

pello ronto nopowe dunnya. long-hallongan

ta’ badha panaongan

Maskabin ban Bakto Samalem

radarmadura.jawapos.com

CARPAN HASMIDI*

”MARA bukka’ sowarana, ja’ dhiyem enga’ reya. Apa keya ollena mon gun akekep malolo?”

Saongguna ba’na reya kan tao keya apa bai se bakal ekabutowagi mon oreng aparlo. Enja’ ta’ gun nyadhiya’agi reng-tareng otaba terop. Teker ban ka’-angka’anna ewajibbagi badha. Areya sakeng banne parlo kene’.

Dallu, gi’ kaka’na se epacampo ta’ kantha ngonjang oreng sagame’ balekkadan. Ta’ reng gun sataretanan ban ga-tatangga se semma’ dhari taneyan dhinna’.

Bannya’ oreng se abanta dha’ kabinana kaka’na ba’na. Maske banne taretan asli otaba kaka’ asli se gun coma kaka’ sapopo ekarassa lopot moso reng-oreng ban ga-tatangga dhinna’.

Bila se baji’ ka kaluwargana ba’na bantana ta’ gun coma ngarasane masala pakabinanna, tape lebbi dhari jareya. Badha keya se ngoca’ ta’ etengkae se teppa’. Bandha se ngoca’ parlona kaka’na ba’na ena-dina ban reng towana ba’na. Banne gun jareya. Bannya’ gallu oreng abanta.

”Iya, mon ta’ keng ekakan dibi’ pessena.”

”Bitong otangnga ja’ barampa!”

Penjung Sangger

Sanja’na Mahwi Air Tawar

Para rabu sadaja

Kalaban eerenge tera’na pangarep

Kaator onjangan ta’ aonga’ tor akeddep

Kakessep ondhuna terop se tasongsep

Kalong-polong jembarra ate se kakarep

Sadaja para rabu kalaban koneng kembang

Sanajjan kaula bakkel tokang bukka’na labang

Songgullagi penjung tor kejung panemang

Sebbar tor tale’e sangger se tasongsang

Para rabu sadaja

Tana

Sanja’na Mahwi Air Tawar

Sasame merana are pangarep e dhadha

Alandhu’ arabat nyelbi’na du’a

E konco’na pajjar, e bungkana langnge’

Bay-kebbayan tana se salokke’

Aolok tana lebat jang-bajangan

Ba’-koba’an sambi’ asapo’ pangareppan

”Engko’ ja’ dina e teggal ko’ong

Tale’e bujel laban pangarep poto se settong”

Oramba, oramba, Madura orambe

Mekol la’ang, buja, ban rante

Oramba Madura talebat ngastete

O jaggur dha’emma poto se asapo’ ate

Dha’ sadaja bala taretan e dunnya

Paneka tana talebat lebat

Tombuna pangarep ja’ sampe’ selbat

Paenga’ laggu’ e ponca omorra

Bukuna se buru kalowar Tanah Air Puisi, Air Tanah Puisi, Mahwi Air Tawar (puisi, 2016) tor Lima Guru Kelana ke Lubuk Jiwa (puisi, 2016). Sanja’ paneka epetthek dhari Jawa Pos Radar Madura (JPRM) eccaban Ahad, 2 Oktober 2016 otaba Puisi-PuisiBerbahasa Madura Mahwi Air Tawar.