Malappa’ana Mano’

Carpan Mat Toyu*

LALAKE’ ganeko lebur ka mano’. Dhung-ondhung are. Tenggarra pon epekol. Aba’na nojju ke bara’. Nyare mano’ kaangguy etenggar. Are sanonto nenggara mano’ kaangguy epa-lappae, pas ejulida kalaban buja cabbina. Malle pendha seddha’ ban dhis-peddhis ngopenes dhalem rassana.

Lalake’ ganeko alebati bungka’an se pon kare buntegga. Bungkana jate ban bungkana kornes pon bannya’ se poret. Buh mon laju akare ramo’na, pas tadha’ se atamenna bungka’an pole, ya ta’ kera badha bungka’an pole dhalem pan-barampan taon.

Karettegga lalake’ ganeko ngabas tek-buntek se pon nyaropo’. Sanajjan aba’na gi’ bisa arassae naong karana epajunge dhaun-dhaun. Tape rassa ojang pon ekarassa eman-dhimman. Dhari sakeng panas kaodhi’an, bannya’ kadebbung banne gunna sakadar bucco’, tape kerreng.

Pan-barampan taon se tapongkor, bungkana geddhang garowa ta’ kose kerreng parana. Tape gunna elop ban bungkana gi’ badha badhegga. Badha cellebba bila erama’ tanang. Tape sanonto, bannya’ bungkana geddhang, se laju kerreng ngathak e bungkana. Akaton ta’ kowat nahan kole’na dibi’. Ja’ senga bisa akowak, yaktena bungkana geddhang ganeko wak-kowagan menta aeng.

Sanja’na Saif Koher Bagandan*

Nyare Elmo

Mompong gi’ pajjar pasanta’ ajar

Mabagus neyat asango sabbar

Elmo esare banne nantos gaggar

Anenggal compo’ nyare langgar

Sabab elmo aropa mosteka

Manyonar ate maloros tengka

Bila elmo ekaandhi’

Ta’ posang neng-enneng kadibi’

Sadajana daddi gampang

Odhi’ nyaman tor dhammang

Ja’ loppa ngormat ka guru

Se morok sabban laggu

Ta’ abu-ambu apareng petodu

Maelang bingong maelang budhu

Bagandan, 2017

.........................

Sanja’na Khalil Zafra*

Syi’ir Pajurung Poteran

Gulungan omba’ mokka’ careta

Sampan se eamba’ maloros pancerra

Agandhu’ careta se ce’ ngennessa

Omba’ ngadabbur atabuyan

Notobi beddhi se kaemmasan

Madhatang angen ngalesser maso’ ka pekkeran

Sagara ampon tekka elajari

Saengga maelang sossana ate se jerri

Agabay bungana ate sadajana bindari

Somor Soro’

Carpan Noer Hamima*

SENGKO’ ban kaka’ ajalan re-lere. Jalan se elebadi sengko’ sateya saongguna la abit ta’ ejalane oreng. Ranca’ ban dhadhaunan se kerreng atompo’ notope jalan. Bannya’ keban-keban kene’se aropa bilis mardha, kaleng, kala, ban samacemma kalowar dhari tompo’anna dhadhaunan kerreng ebakto sengko’ nyongkap ca’-ranca’ ban dhadhaunan jarowa kalaban tongket se pajat egiba dhari roma.

Bakto sateya bulan pornama. Tera’na bulan agabay jang-bajangan bungkana nangka paddhang ban celleng, agabay sengko’ tako’ akadiya nengale coba. Karsetta soko ban monyena perreng nambai rassa tako’ e dhalem dhadha.

”Ka’, sengko’ tako’,” ca’na sengko’ ka kaka’.

”Ma’ badha ke’-lake’ tako’an,” oca’na kaka’ padhana se ngece sengko’.

”Bila sajan semma’ ka Somor Soro’, paste sajan bannya’ seco-ngoco ban sajan matako’an ka ba’na. Tape kaenga’e, jareya, ca’na Ke Moremang, gun gudha’an,” kaka’ maenga’ sengko’ sambi malere sowara ban masemma’ lesanna ka sengko’.

Ca’na Ke Moremang, dhukon se nyoro sengko’ ban kaka’ entar ka Somor Soro’ areya. Bila sengko’ la para’ dhapa’a ka Somor Soro’ ra-kera kare 200 meter, sengko’ bakal nengale koburan laju e penggir jalan.

Mergem Janji

Sanja’na A. Rahem Umar

Angen ngalesser e babana perreng 

Nyakse’e badhana oca’ se abundu’ dhaun kerreng

Bula ban dika padha samapdi mergem janji

Tengnga malem kaoca’ tajem akadi loji

Dhu ale’ bula se raddin

Amarga ate ampon padha juntrong

Maskeya raga ta’ apolong

Dika ban bula padha agindhu’ kerrong

Seyang malem ta’ aromasa

Roba moddha ta’ apangrasa

Alessa dika akadi bulan tanggal dhuwa’

Ekadikker ate marga kerrong ta’ kabuwa’

Lema nemor ban ojanna

Amba’ bula ban duwana

Moga Se Kobasa apareng bakto

Kalaban gumbira bula ban dika atemmo 

Mergem janji se ta’ apesa’a

041117

Melle Tangessa, Sandhang Tolana

Carpan Mudhar CH.*

ODHI’ apolong ban mattowa lakar pang-gampang malarat. Sabab, oreng andhi’ kabiyasa’an se da-bida. Najjan badha se padha ta’ bakal padha persis. Apapole pamekkeran kangodhadan lumrana bida kalaban pamekkeran banga towa. Jaman lamba’, mon ngakan juko’ esoro ne’-one’.

”Juko’ jareya jujju’ patako’. ”Jaman sateya sabaligga, nase’ sakone’ pabannya’ juko’na. Sabab, juko’ ekapenter. Daddi dhi-budhina lako, se paleng nyaman odhi’ ban ana’na mattowa.

Lamba’, aba’na gi’ kana’ gun ngabas e gambar oreng ngangguy sapatu rodha. Badha e pananggalan ban kole’na buku, gambarra tis-artis se asapaturodha’an. Terro keya ngangguya, keng edhimma melleya. Terro keya melleya, keng barampa argana ban edhimma pessena.

”Engko’ melleya sapedha motor ettril, nyaman ka gunong-gunong cat-malacat. Ba’na, Le’ Par, melleya apa?”

Sanja’na Hidayatullah El Nufa*

NYANGSARA

Ya Allah, abdina nyangsara

Sabban are alako dusa

Oreng towa ekatokara

Ka kanca lako daddi sala

Abdina ibada ta’ bajeng

Nyare elmo ta’ bajeng

Kabagusan arassa baceng

Kajuba’an ekakenceng

Ya Allah, abdina ampon kasta

Seyang malem lako apangrasa

Bannya’ sala

Bannya’ dusa

Pondhuk Lu’-Gulu’, 24 08 2017

.................................

Sanja’na BJ. Akid*

E Bakto se Lan-jalanan

Jang-lajangan se epandeng ban dika

Ngabber samarena nemor kasta

Sadaja langnge’ berse dhari ondhem se atampe

Ban tera’na mata are se dhang-burdhang e babana jate

Agambaragi dha’ jalanna dika se korang paste

Posang rassana e adha’na mata

Kalaban rassana kerrong se lako nyeksa

Reguler. 2017

...........................

Sanja’na Arik Van Der*

SAKERA

Malem juma’at tanggal petto’

Bula arassa tako’

Ngabas reng-oreng robbu malekko’

Ecocco memes balanda se arako’

Dhara nompa

Magili aeng mata

Badha settong oreng soga’

E kangan nyonjung sadha’

Mata ladding dhadha soga’

E kacer nyaba e pergem

Dhadha bula ngasemsem

Sadha’ eangka’

Sambi ngoca’

”Sengkok Sakera”

Annuqayah, 30/09/17

Iskandar ban Ale’na

Carpan Matra’i*

ARE se tera’ moncar dhari temor sagara. Bannya’ reng Madura mangkat nerrosagi kalakowanna se ba’ari’ gi’ ta’ mare elakone. Angen alembay dhaunna nyeyor ebarengnge sowarana mano’. Saleng nyaot maebir sowarana se lebur saengga sowarana acem-macem.

Sabban gu-laggu sengko’ ju’-toju’ neng Tase’ Toraja. Ngabasagi tera’na are se ongga gan sakone’ ka attassa cethak. Sengko’ ta’ gellem busen ngabasagi are gu-laggu. Are jareya aberri’ kakowadan ka sengko’ saellana emma’ mangkat nyare lako ka Jakarta. Nyare kakanna sengko’ neng e roma, samarena eppa’ tadha’ omor bakto agandhu’ panyake’ se ce’ sarana.

Apapole buru bilanna sengko’ ngedhing dibi’. Kabar se sajan mangetek ka dhadha, ja’ emma’ la alake ban oreng Jakarta se la andhi’ ana’ settong. Sengko’ onggu terro taowa cara sapa lakena ban ana’na. Apa kalebbiyanna reng lake’ jareya ma’ sampe’ emma’ gampang loppa ka eppa’.

Sanja’na Moh. Dasuki*

Agandhu’ Tengka

E sabban arena

Ate arassa eseksa

Eseksa kalaban kabar se agandhu’ tengka

Ngeba sala akaton ta’ aromasa

Ngeba dusa akaton tadha’ Se Kobasa

            Onggu-onggu kaodhi’an se ta’ samporna

            Ngadhebbi tengka banne lalakon se dhammang

Bila sakone’ sala sakabinna ngera banne manossa

Saengga ate arassa malo se saraja-rajana

Saellana tatangga-bala ngera lopot atengka

Oca’ tor basa ta’ duli eatoragi

Ngantos bakto se bakal agiba tennang

Ban ta’ agiba rassa kata’naremaan

Asabab pegga’na oca’ seekera semma’

Ngobbar

Carpan Lailatul Q.*

”TERA’... tera’… tera’…” na’-kana’ kene’ aorak perak nangale apoy se tera’. Alonca’, apa’-kopa’. Kabbi oreng asorak. Sajan malem, sowarana ekaedhing sajan ramme. Ekaedhing sampe’ ka paleng bara’na kampong.

Ke Rustam agella’ matao jajaranna gigi se ngakoneng ecapo’ ngebbulla roko’ ngabas bunga ka tera’na apoy se raja. Ropana, sajan malem apoyya sajan raja. Ta’ ngantos kene’na apoy, Ke Rustam lako ngontalagi kajuwan-kajuwan raja se kerreng ka dhalem tomang raja se ekoca’ pangobbaran. Apoy sajan raja bila eontalagi kaju. Barnana ngamera soga’ nambai tera’ ka seddi’na.

Lakar la kabiyasa’na reng-oreng e tang kampong kaangguy agabay gubuk bila abangona roma. Ngobbar bato sampe’ ancor daddi gubuk. Biyasana pangobbaran ekale sampe’ korang lebbi dhumeter dhalemma. E attassa ebangon geddhung kaangguy nyoson bato-bato se eobbara.

Lobang hasella ngale eesse’e kajuwan kaangguy marabak apoy. Ngobbar biyasana elakone sampe’ pan-barampan are sampe’ terbi’ (to-batona la padha ekello’ apoy keya) ban para’ daddiya gubuk. Bila la terbi’ pan-barampan kale, buru ngobbarra eambuwagi. Pas to-bato edhantos sampe’ ancor daddi abu.