 |
| Yulistiana Ningsih |
RAHMA, ana’ tonggalla
Ji Sahid, oreng paleng sogi e kampong paseser. Bannya’ sampanna ban bannya’ tokona. Sateya
omorra Rahma la ajalan 27 taon. Tape, gi’ tadha’ tandha bakal epakabin.
Ma’ kose
akabin, bakal kanan ta’ andhi’. Banne polana Rahma ta’ paju otaba robana juba’,
sanyatana la bannya’ se alamar. Tape, ta’ etarema ban Ji Sahid kalaban alasan
ta’ sabandhing. Reng-oreng kampong pas ta’ bangal ma’-nyemma’.
E settong are
badha reng lake’ kalaban mowa kandel dhateng alamar. Nyamana Rasidi, kanca
kellassa Rahma e pondhuk. Kadhatenganna Rasidi eamba’i mowa ta’ nyaman ban Ji Sahid. Rasidi etalektegi dhari konco’na
obu’ sampe’ soko.
”Sapa nyamana
ba’na, Cong?” Ji Sahid atanya kalaban sowara berra’.
”Rasidi, Pa’...”
ca’na Rasidi sambi nondhu’.
”Ba’na u-jau
dhateng dha’enja kaangguy alamar tang ana’, Rahma?” Ji Sahid atanya sambi
nyergu’ roko’.
”Enggi, Pa’...”
Rasidi tamba nondhu’. Dhalem atena, samacemma du’a ebaca. Ngarep Ji Sahid bisa
lemmes narema lamaranna.
”Apa se
epakannagiya ba’na ka tang ana’? Apa ba’na ta’ tao ngedhing syarat se
ewajibbagi sengko’ ka reng-oreng se bakal alamar tang ana’?” Ji Sahid mandeng
reng lake’ e adha’anna kalaban tajem.
Rasidi ta’
metto saot. Dhalem kamar Rahma ngedhingagi. Aeng matana agarabas.
”Kaula pajat banne
oreng sogi, Pa’. Tape insya Allah
kaula bisa mabunga Rahma.” oca’na Rasidi kalaban bangal. Ji Sahid agella’,
ngece.
”Epabunga’a
kalaban apa, Cong? Ella, ba’na ta’ usa maksa. Sengko’ nola’ lamaranna ba’na,” Ji
Sahid notop parembagan. Rasidi mole kalaban ate kaceba.
Caretana Rahma ta’
ambu se agili e sar-pasar, somor, gir sereng, ban e karammeyan laenna. Tatangga,
para ebu gun bisa pek-kepeggan ngabassagi katenggiyanna Ji Sahid.
Sakabbinna
anya-tanya, manto enga’ apa se ekakarep Ji Sahid. Molae dhari guru ngaji, guru
madrasah, pamajang, sampe’ potrana keyaji se etola’. Tadha’ se paraddu sakale.
Etola’ matta.
”Sateya mon gun
pera’ andhi’ roba gantheng tape ta’ andhi’ dunnya tadha’ argana. Dina maske la
potrana keyaji, tape lakona atane, malarat, paggun maba darajat,” oca’na emma’na
Siddiya sambi agusek sassa’anna e somor.
”Kabadha’an la
aoba. Ta’ padha ban gi’ jaman lamba’. Kabutowan ce’ bannya’na. oreng ekoca’
senneng eokor kalaban bannya’na dunnyana. Sateya ustad ban keyaji ta’
ekasengkae. Tape, oreng se sogi se ekasengkae.”
”Neserra ka Rahma
mon sampe’ daddi paraban towa. Eman ka raddinna ban bagussa tengkana,” saodda Sumarni.
”Dhu,
epabaramma’a pole. Ja’ eppa’na padhana macan. Sapa se bangal ajagai macan?” Se
laen nyaot.
Careta sajan
derres kalaban ca’-oca’ kasar. Oreng sakampong la tao kabbi ja’ Ji Sahid amata
dunnya. Ta’ mekkere parasaanna ana’na. Ca-kancana Rahma la padha ala-bala kabbi
ban bannya’ se la ngemban ana’.
***
E settong are, dhateng
pole reng lake’ alamar. Nyamana Hasanuddin. Omorra la acethak dhuwa’. Andhi’
bine settong. Kalontha kasogiyanna.
Hasanuddin aneyat
alamar ana’na Ji Sahid polana ta’ duli andhi’ katoronan dhari bine se towa. Ji
Sahid katamoyan Hasanuddin padhana se kagaggaran gunong emmas. Pangaterro
andhi’ manto sogi se bakal mabunga ana’na epatekka hajat.
Ta’ usa mekker
lanjang, Ji Sahid laju narema lamaran. Samingguaggi’ akad bakal elaksana’agi. Reng
lake’ se saomoran ban aba’na bakal daddi manto. Bakal daddi lakena Rahma,
na’-kana’ bine’ se raddin roba ban tengkana.
”Kaula potrana panjennengngan
tong-settongnga, Pak. Ce’ manggana majudhu kaula sareng reng lake’ se ampon gadhuwan
bine. Panjennengngan olle le-mele lake kaangguy kaula. Tape, manabi kaula kodu
daddi bine se nomer dhuwa’ ta’ poron,” Rahma ngosap aeng mata se agili e
pepena.
”Areya kaangguy
masa depanna ba’na, Na’. Sengko’
pera’ terro ba’na bunga. Oreng laep tadha’ argana,” jawabba Ji Sahid sambi
nyergu’ roko’. Owa’na ngebbul daddi samper.
”Kaula ta’
poron aneka sareng oreng se pantes daddi eppa’. Napa pole kodu daddi bine se
nomer dhuwa’. Panjennengngan katotoban dunnya.”
”Sateya ba’na
gi’ ta’ apangrasa, Na’. Tape dhaggi’ ba’na bakal enga’ ka oca’na sengko’. Ba’na
bakal daddi reng bine’ se paleng bunga e kampong reya. Teggu’ oca’na sengko’,”
Rahma ta’ metto saot. Kapotosanna eppa’na ta’ bisa eoba pole. Rahma pasra.
***
ARE se
etantowagi la dhapa’. Hasanuddin nger-sengngeran dhalem atena bisa ngaolle
paraban kembang disa. Tatangga ta’ bu-ambu se arasanan. Eman onggu dha’ ka Rahma,
paraban akabin ban reng lake’ saomoran eppa’na coma karana dunnya.
Ji Sahid la
esettel kopok. Karja erajai dhuare dhumalem. Mas kabin se ebajar Hasanuddin
aropa emmas sa’on. Kalaban sarat Rahma noro’ ka bengkona Hasanuddin. Ji Sahid saroju’.
Maelangagi ana’ tong-settongnga.
Bakto terros
ajalan. Olle saminggu Rahma se akabin. Ji Sahid jembar maske odhi’ kadibi’an e
bengkona se raja. Se badha e pekkeranna, coma Rahma kodu bunga. Emma’na Rahma
tadha’ omor bakto Rahma gi’ kene’. Daddi areya tong-settongnga cara mabunga Rahma.
Thok.. Thok..
Thok...
Labang e adha’
amonye. Ji Sahid jaga, mokka’ labang. Lesanna anganga ta’ metto sowara nangale
sapa se dhateng. Rahma ana’ tong-settongnga jeng-manjeng e adha’na labang. Matana
bara ban pepena beddeng. Padhana se etappor kelap.
Ji Sahid ngedhingagi
careta dhari buwana atena, baramma kalakowanna Hasanuddin se sabban are. Nampeleng
ban mokol bila Rahma ta’ endha’ eajak apolong. Ji Sahid asojud e sokona rahma.
(*)
Soklancar, 2015
Epetthek dhari Jawa Pos Radar Madura eccaban Ahad, 30 Agustus 2015.
