Rukuna Emma’

jawapos.com/radarmadura

Carpan: Musyfiq Rozy*

E BABANA mataare se panas, e antarana owa’na knalpot, na’-kana’ kene’ ajalan noro’e lorong. Lampu mera se etojju. Tanangnga se kangan neggu’ gitar kene’ ban se kacer neggu’ gellas karet.

Kalambina ban lebbarra la padha ambung. E bagiyan lengngenna beddha. Sandhal jan-lajjan. Se kangan eobai salempangnga. Pellona ngerray sabadan. Matana mera, nandha’agi ja’ na’-kana’ ganeka ampon lesso ban paya.

Kadhang tanangnga ngosot pello e dhaina. Sowarana kala ranyeng ka monyena motor ban samacemma se padha ambu e lampu mera. Tadha’ oreng sakale se aberri’ pesse sakadar ngargai ka usahana.

Kadhang banya’ oreng se nganggep ja’ oreng se ngamen aganggu jalan, macet. Kalakowan ngamen lebbi molja katembang ngeco’ sape dhin tatangga. Nyare baberri’en oreng. Kadhang badha oreng se nyorowagi ajuwal korran neng e lampu mera. Ajuwal dhari motor ka motor.

Nyamana Subhan. Tape ban oreng-oreng eolok Encing polana badanna koros ban kene’. Sabban arena, Encing ngamen neng e lorong-lorong. Kabadha’an odhi’ wa’-dhuwa’an ban oreng towa bine’na se la ta’ bisa alako pole.

Adduwan Ajam Agiba Pasthe

radarmadura

Carpan Moh. Toyu Aradana

AJAM ganeko pon saleng pokol kalaban kalembangnga. Padha makerpak kalaban jaluna, kalaban karkarra. Dhuwa’ ajam ganeko padha tajengkang, agalebbes-galebbes ta’ ennenga jaga. Dhuwa’ ajam ganeko pon padha lehla. Pon padha ta’ andhi’ ora’. Tadha’ se kala, tadha se mennang.

Tape dhari empa’ mata ajam etangngale ja’ ajam-ajam ganeko gi’ terro abuwanga. Gi’ terro mangolocora dhara dhari le’erra mosona. Padha terrona se mapotonga ca’-oca’an garigi’na se paleng kene’. Tape dhuwa’ ajam ganeko pon ta’ kellar ngangka’ kalembangnga balekkadan. Se andhi’ pon nolong ban ngemban ajamma. Mad Ja’i ban Mad Jalinge.

”Juh!” Mad Ja’i acopa, se copana epangalto’ ka seddi’na ajamma Mad Jalinge.

Mad Jalinge akerrak dhara pas esemburragi ka Mad Ja’i se pon nyengla dhari kennengan manjengnga. Sakeng semburan dhari colo’na Mad Jalinge para’ nyapo’a soko kacerra Mad Ja’i.

Mad Ja’i buru gancang. Polana pon nengngale polisi dhateng se bakal nangkep reng-oreng se biyasa ngaddu ajam. Reng-oreng pajat pon padha buru polana pon nengangale polisi adungkrak sapedha motorra. Mad Jalinge nolong ajamma, pas buru keya.

Asar maba ganeko empa’ polisi dhateng kalaban dhuwa’ sapedha motor. Pajat asajja nyareya ban mega’a Mad Jalinge se pajat kalonta kalaban tokang adduna ajam ban gasek mennang. E bakto ganeko polisina akaton ta’ ragap sakale. Saengga reng-oreng pon padha buru, tamaso’ Mad Jalinge, se sarongnga biyasa epengkes ka attas pas etale’e e adha’na tabu’na. Ebundhel.

Tako’

Sanja’na Soe Marda Paranggana*

Taneyan anganga ngamba’ lokana pa’-dapa’ se ajalan

Nerrak

Nap-anap kaodhi’an

Dhang-ardhangan, langnge’ ta’ ojan

Bakto terros agili ka koburan

Badan terros ngalocor ngopene omor

Bulan berteng, malem eondhu ta’ aonjan

Taneyan ngennes, ngosot garagga’ kole’na tanang

Ta’ tobang araga kabadha’an. E ben-omben

Garigi’ takae’ ka rang-carang

Badha Gabay

Sanja’na Soe Marda Paranggana*

E dhaja’anna. Badha oreng marobbu

Marobbhu sape

Dhggi’ malemma. Bakal badha oreng marobbu

Nabbu katedhunganna

Marobbu ekarobbuwin

Adhanga’ alanggan bantal e baba kasor

Aonga’ passra tor narema lembu’ kabadha’anna

E lao’anna. Badha oreng nabbu

Nabbu tanang ka dhadhana

Nabbu pereng kalaben sodhuna

Edina’agi lakena

Datkala

Sanja’na Soe Marda Paranggana*

Bila aba’ pon taelang elompa’ setan

Obu’na egumbi’. Elong kopengnga ekorbing

Mowana ekormos ka kokona

Tabu’na eguco kalaban bigina pergemma

Sokona esempal ka sokona. Badanna

Se onggu ce’ kene’na, esalding, epagarding

Epakartem sara’-ngora’. Pas

Econglettagi ka dhalem jeddhing

Napsona ngobal

Matana abarna sekkem tera’na mardha se ngaretep

Ja’ alalagiyan. Ja’ rok-ngerok e seddi’an

Ja’ lang-alangen. Manna kapelo kothem

Kapelo senthem asara’an