Tanges Ate

Carpan Saubatul Ramdlah*

LANGNGE’ arassa petteng ta’ nyonare essena bume. Dhadha arassa seksek ta’ bisa anyaba ngabassagi kabadha’an tang disa. Oreng-oreng areng-bareng nyare lako ka disana oreng. Badha se ka Malaysia, badha keya se alako ka Arab Saudi. Keng pola terro padha’a ban tatangga se laen. Apapole na’-kana’ ngodha, padha jung bajengngan entar nyare pesse. Badha keya se ta’ andhi’ lako ta’ etemmo kettosan lako gun pera’ ngakan ban tedhung. Gun pera’ kenneng bitong se asakola neng tang disa.

Badha se ngoca’ arapa’a asakola gi-matenggi. Presiden la badha. Ta’ kera daddi pajabat keya. Pojur mon gi’ badha’a oreng se mekkere sakola neng tang disa. Sengko’ la tamasok oreng se pojur epareng bajeng ban bisa nerrosagi sakola’an. Tape banne keng pola tang oreng towa sogi. Bida ban tatangga se laen.

Ngalengsang

Carpan Abdul Warits*

SUBAHRI arassa senneng ban jembar polana andhi’ bine. Ropana binena ta’ kose raddin. Tape, babine’ jareya paraten onggu aladin Subahri ban narema kabadha’an kaluargana maske banne reng sogi ban katoronan rato-keyae. Subahri ngarte ja’ oreng andhi’ bine reya bisa maelang rassa ngalengsang. Tape oreng lake’ se andhi’ bine arassa posang amarga kabutowan atamba. Salaen abalanjai aba’ dibi’, napapole abalanjai bine sabban are.

Binena Subahri nyamana Sulastri, sala settong paraban se badha e Disa Girsereng. Kaluargana rokon satatangga’an. Daddina Subahri ta’ kako apol-kompol ban kaluargana Sulastri. Saongguna Subahri arassa malo ka mattowana polana sabban are gun ngampong ngakan malolo.

Sabulan ampon Subahri akabin ban Sulastri. Tape paggun ta’ andhi’ kalakowan. Estona, Subahri apangrasa ta’ nyaman ka mattowana. Tape mattowana ta’ perna ango’ngo’an andhi’ manto se ta’ andhi’ kalakowan padhana Subahri.

Mang-Temang Sangger

Anggidanna Mahwi Air Tawar*

E settong are, e settong bakto

Bulanna ngombar tadha’ se tao

Jang-bajangan dika nyedding soko

Soko atengka’ lebadi buko

Bukona perreng, batessa thongthong

Thong-thongnga bungkol monyena nyettong

Thongthong etabbu kalaban lessong

Lessong panyeddhek cebbing ka kacong

Bismillah, nyaba’a sengko’ oca’

Oca’ taresna kacong se bunto’

Se bakal sampe’ nyaba e konco’

Na’poto settong toronna aba’

Bismillah, bula mondut teteban

Kembang malathe ro’om sataman

Bismillah, bula nrema sangkolan

Tolang se pote bundu’na tretan