Lukman Hakim AG. |
SATERROSSEPON anggi
paneka oca’ sambadan /ke/ (dhari oca’ /kae/) tor /nye/ (dhari oca’ /nyae/). Kae enggi paneka oreng seppo lake’na rama otaba ebu. Sabataran Nyae enggi paneka oreng seppo bine’ne rama otaba ebu.
Sambadan /ke/ eguna’agi monggu ologanna kompoy dha’ ka oreng
towa lake’na eppa’ otaba ebu. Oca’ sambadan /ke/ sareng /nye/ paneka juga eguna’agi monggu dha’ ka /kae/ majadhi’ otaba /nyae/ majadhi’. Salaen /kae/
sareng /nyae/ badha oreng nyambat /emba/.
E attasanna kae sareng nyae otaba oreng seppona se
kadhuwa paneka badha oreng se esebbut /juju’/. Oca’ sambadan se eguna’agi ngolok enggi paneka /ju’/ otaba enju’. Badha juju’ asli tor badha jugan
juju’ majadhi’.
Nangeng, kapprana ampon bannnya’ na’-kana’ mangken
ampon ta’ kacapo’ ka omorra juju’epon. Sabab, omorra oreng mangken bannya’ se dha’-pandha’
tor paleng bannya’ gun sampe’ gadhuwa kompoy. Ta’ kadiya oreng kona
se kose ngagunge peyo’ tor kareppek paggun odhi’.
Naleka para pottra nyambat ”Papa-Mama” ka oreng towana, ponapa sala?
Bunten, tadha’ se sala. Nangeng, manabi oreng Madura ma’ rassana korang patot
tor korang nyaman edhinganna ka kopeng. Aponapa na’-kana’ Madura aher-aher
mangken ampon bannya’ se ”apapa-mama” jugan ka oreng towa dhuwa’na? Kadi ponapa carana kaangguy ngoba otaba mabali oca’ sambadan ganeka ka
oca’ otaba basa se lebbi arassa Madura?
Bannya’ alasan aponapa na’-kana’ jaman mangken
ampon mapas otaba ta’ abasa. Tamaso’ jugan aobana oca’ sambadan dhalem
kaodhi’an. E antarana, korangnga kaparduliyan kaangguy meyara budhaja Madura. Jugan korangnga pangaonengan ngengenge basa Madura tor gunana dhalem ngorot
silsila. Salaen paneka badhana anggebban ja’ basa Madura paneka basana
oreng disa. Alasan laen polana pengaro dhari media.
Korangnga kaparduliyan kaangguy meyara budhaja
Madura bisa karana oreng towana se ta’ ngajari. Ta’ ngajari ponapa parlona
ajaga tor arabat budhaja Madura akalaban malanggerng basa Madura bisa daddi
polana oreng anggep ja’ basa paneka ta’ pate parlo. Bannya’ anggebban ja’ se
parlo na’-kana’ paneka cokop jajanna ban asakola. Tanto bisaos alasan oreng
towa se kadi paneka ta’ kengeng tero.
Mastena, oreng towa paneka mekker, menangka oreng
Madura kodu ajaga tor arabat badhana adat tor budhaja dhari pan-saponapan hal. Ta’ kajaban masala basaepon. Manabi banne oreng Madura dibi’ se parduli, pas
pasera pole? Napa parlo ekaemane oreng Balanda se anyama Hoob De
Joonge?
Sala settong se bisa elampa’agi oreng towa Madura
enggi paneka kalaban ngajari na’ potona kalaban basa se
sae tor lerres. Sae basana tor lerres angguyanna. Sabab, basa Madura badha
angguyanna tor badha kennengngan bang-sebang. Ngorot silsila menangka parkara
se bagus kaangguy marenge pangaonengan dha’ na’-kana’.
Bila ampon balana ekaonenge, maka oca’ sambadan akadi se ampon esebbuddagi e attas bisa eguna’agi, ma’
ta’ ngongsang-ngonglet ta’ etemmo konco’-bungkella. Ngajari ana’ kaangguy abasa
se sae tor lerres kodu emolae dari compo’na bang-sebang kalaban
kalatenna oreng towa.
Salaen gapaneka, guru se badha e sakola’an kodu
ngagunge pangaonengan bab basa Madura. Aher-aher mangken bannya’ sakola’an se
ekoca’ Pendidikan Anak Usia Dini (PAUD). Dhari sakola’an paneka molana
na’-kana’ ajar amaen tor anyanyi. Dhari sakola’an paneka jugan na’-kana eajari ngaonenge oreng towana.
Rata-rata, maske sakola’an paneka badha e Madura
tor guruna juga asli oreng Madura pas ngajari ”papa-mapa” otaba ”ayah-ibu” ka morettepon. Nyamana na’-kana’, gi’ ne’-kene’ ta’ oneng napa, tantona laju pas nero ponapa se ampon ebulangagi sareng guruna. Hal
ka’dhinto terros dha’ ka sakola’an e attassa taman kanak-kanak (TK) otaba raudhatul adhfal (RA).
Tidak ada komentar:
Posting Komentar