Guru Tolang

Carpan Irwan Effendi*

E sorop are, Ali alan-jalan dha’ bala tatangga se ta’ jau dhari romana. Nyambung silaturahim tor maelang kerrong se ampon para’ ganebba dhutaon ta’ atatemmo. Sabab nyare elmo e pondhuk ta’ le-mole saabidda.

Salanjangnga jalan rassana ampon elebadi, sampe’ ekarassa lesso Ali se ambu namoy dha’ tatangga. Cem-macemma jajan ampon eangka’agi, molae dhari se manes, lema’, tor  laennepon. Ta’ rangrang dhari sabagiyan tatangga atanya bila se abakalana. Tamaso’ anomma, Ahmad. Tape Ali coma alajjai petanyana anomma kalaban mesem. Ta’ kapekker cara ganeko. Sabab Ali andhi’ pangaterro se lebbi tenggi kaangguy nerrosagi sakola’anna. Se juganan daddi pangaterro oreng seppo dhuwa’na.

Dha’rammah Ali se ta’ andhi’a nasep se padha ban oreng seppona. Sabab ampon daddi kabiyasa’an masyarakat e disana. Manabi lulus dhari MA kabanya’an dhat-ngodhadanna langsung mangkat kalowar, nyare lako otaba abakalan. Akherrepon daddi oreng tane jugan, akadiya masyarakat kabannya’an.

”Manabi cara ganeko, ta’ kapekker, gi’ terro nyareya elmo,” jawab Ali.

Sanja'na Rahem

Majang

Are ngombar agiba panas

Angen agules nyapo’e aeng e tengnga tase’

Tape robana dika paggun asonar

Akantha damar nera’e kamar

”Olle ollang paraona alajara

Olle ollang alajara ka Madura”

Angen agules agiba omba’

Juko’-juko’ padha anyanye

Alenglenge sampan e tengnga tase’

Sanajjan sampan ampon agunjal

Ka bara’ agiba sossa, ka temor agiba kasta

Jaring ebarbar

Sampan alajar

Gappora Temor, 2017

Sanja'na Qiey Romdani

Sake’ Ate

Maske dika ban bula ta’ apolong

Ate paggun settong

Tape bila dika ajalan ban reng lake’

Se nyalae adat ban agama

Atena pasera se ta’ sake’

Napapole maelang taresnana bula

Odhi’ rassa ta’ nyaman

Bila ate saleng atokaran

Eocola ker-pekkeran

Keng ampon atale janjina reng towa

Gapura, 2017

Landaur Mekol Dudul

Carpan Lailatul Q.*

ARE Rebbu, rop-sorop are.

Kae adungngeng e adha’na roma, babana kan pao. Sengko’ ban ale’ toju’ ngedingngagi careta-caretana kae. E seddi’na badha kellana sabbrang ban gula mera, massa’na sarkaja, ban sangngarra jagung.

E langnge’ bara’, are para’ dhapa’a ka poncana. Sabagiyan atotop karena ondhem. Cellep. Angen ngalesser. Ta’-kata’ ramme amonyeyan.

Sambi nyolet pa’-lopa’, kae molae adungngeng.

Sanja’na Bj. Akid

Tahlilan Malem Juma’at

Laaaaaaaaailaaaahaillallah

Muhammadurrasulullah

Reng-oreng padha maten

Asela e teras se alengleng

Toju’na masengek dha’ atena

Kalaban hoso’ ka Pangeranna

Sowara-sowara ampon ramme

Dhapa’ rassana dha’ tojjuwan se esare

Saenggana gulina ate

Ngeba dha’ aeng mata se gaggar ta etangale

Musolla.2017

...................................

Eapol

Carpan Imam Syahroni

TA’ bannya’ se earep sengko’. Aba’ la cokop seddheng ngarassa’agi manes pae’na odhi’. Gun cokop ngodhi’i ana’ bine, aba’ la arassa ce’ bungana. Dhari kobi sampe’ aoba dha’ deng gula sakeng dhari apessa aba’. Gun bisa napet dhadha ngajalane odhi’ sapaneke. Ajelling ana’ ban binena oreng ce’ sampornana se eengone. Seddheng ana’ ban binena ba’ dibi’ ken coma bisa narema kabadha’an se padhik neka.

Malem ta’ cokop rassana notobi mellass  jalanna odhi’. Bantal ban kasor ta’ cokop lembu’ kaangguy matedhung aba’. Ra’i dhateng ngoca’ salam pon ta’ kedhing, ken sowarana se sera’ tor kasar majaga buluna kole’.

”Bisa mangkat Le’ Hasan malem sateya? Engko’ nemmo jalan kaangguy mamangkat hedha ka Malaysia. Dina orosan ongkos apa ca’na sengko’,” koca’na Ra’i sal ba’ dibi’ kalowar dhari roma.

Sanja'na Khalil Satta Elman

Madura

Kerraban sape berka’ nojju bulan

Majanga Madura dha’ jagat kakobasa’an,

Babategga kerras lambang kabangalan

Ta’ nampek dhimma atemmo paggun taretan.

Dhu Guste,

Paneka Madura

Tana kalaheran kaula

Se aesse Bangkalan,Sampang,

Mekkasan kantos Songennep

Dila ebirji’ paggun ganep.

”pottra-pottre Madura

Tore areng-sareng naronggune taresna

Monggu ka adat Madura

Se ampon abit ta’ eparduli”.

Asta-asta asonar

Para pajurung padha nare’ panar

E Kerraban sape berka’ nojju bulan

Majanga Madura dha’ jagat kakobasa’an,

Tore areng-sareng naronggune taresna

E Polo Madura sowarga tatongar.

Para pajurung padha nare’ panar

Polo Madura sowarga tatongar.

Gappora, 2017

....................................