Mateppa’ Gambar Kaca BBM (3)

(DP BBM)

E GAMBAR display picture (DP/gambar kaca) Blackberry Messenger (BBM) saterrossepon atoles:

ROBENA DHIKA

SIANG

BEN

MALEM

NGALEMBEK E MATA

Manabi epateppa’, daddi:

Robana dika

Seyang

Ban

Malem ngalembek e mata

Sabellunna: Mateppa’ Gambar Kaca BBM (2)

Ponapa bidana?

Oca’ /robena/ mastena etoles /robana/. Oca’ paneka dhari /roba/ se ngaolle panoteng /-na/. oca’ /dhika/ se teppa’ /dika/. Dhalem eja’an 1973 sowarana /d/ badha empa’ kalaban dhuwa’ cara noles. Enggi paneka /d/ tor /dh/. Contona, /dhara/ (se agili e daging), /dara/ (nyamana mano’), /dhammang/ (tabaligga berra’), tor /dala’/.

Oca’ /siang/ koduna etoles /seyang/. Oca’ /ben/ mastena etoles /ban/. Oca’ /malem/ ampon teppa’. Oca’ /ngalembek/, /e/, tor /mata/ ampon teppa’.

Mator sakalangkong

Lukman Hakim AG.

Mateppa’ Gambar Kaca BBM (2)

(DP BBM)

E GAMBAR display picture (DP/gambar kaca) Blackberry Messenger (BBM) saterrossepon atoles:

MADURA

AKU PASTI PULANG

TAK TAOH BILEH

Saamponna epateppa’, daddi:

Madura

aku pasti pulang

ta’ tao bila

Sabellunna: Mateppa' Gambar Kaca BBM (1)

Ponapa bidana?

Baris kapeng settong ban baris dhuwa’ menangka basa Indonesia. Pramela dhari paneka ta’ mabi ekacareta. Se parlo epateppa’ baris kapeng tello’.

Oca’ /tak/ koduna etoles /ta’/. Oca’ /taoh/ mastena etoles /tao/. Sabab, /h/ saamponna /a/ aropa’agi basa lesan, banne basa toles. Oca’ /bileh/ mastena etoles /bila/.

Mator sakalangkong

Lukman Hakim AG.

Mateppa’ Gambar Kaca BBM (1)

PERAK tadha’ padha naleka dhat-ngodhadan, napa pole se towa, lebur aguna’agi basa Madura dhalem kodhi’anna. Aguna’agi dhalem basa lesan ban basa toles. Badhana handphone (HP) se ampon bannya’ egadhuwi jugan daddi sala settong panyokong jurbuna basa paneka.

Akadi, bar-gambar display picture (DP/gambar kaca) Blackberry Messenger (BBM) se atoles basa Madura. Nangeng, laggi’ badha se parlo epateppa’, ma’ olle sajan sepa’.

(DP BBM)

Dhalem gambar e attas atoles:

ORENG MADUREH DIN-RADDIN

KENG JEK PEPEGGEL CONG

MATEH ONGGU NAK

Manabi epateppa’, daddi:

oreng Madura din-raddin

keng ja’ papeggel, Cong

mate onggu, Na’

Ponapa bidana?

Dhari tolesan paneka langkong semma’ mabi eja’an 1973. Sala settong buktena ta’ ngangguy dha-tandha e attassa horop /e/ oca’ /oreng/, /keng/, tor /mate/.

Oca’ /oreng/ ampon teppa’. Oca’ /Madureh/ paneka sala. Mastena etoles /Madura/. Oca’ /din-raddin/ teppa’ dhari oca’ /raddin/ se erangkep budhi.

Oca’ /keng/ ampon teppa’. Oca’ /jek/ koduna etoles /ja’/, banne ngangguy /e/, tape /a/ tor ngangguy /’/ banne /k/. Aguna’agi /’/ sareng /k/ bida. Oca’ /pepeggel/ koduna etoles /papeggel/ dhari oca’ /peggel/ se aoba rangkep adha’. Oca’ /cong/ teppa’ dhari oca’ /kacong/. Nangeng, sabellunna oca’ paneka pesa sareng tandha koma /,/, sabab, okara paneka nyapa.

Oca’ /mateh/ mastena etoles /mate/. Sabab, /h/ saamponna /e/ paneka basa lesan. Oca’ /onggu/ ampon teppa’. Oca’ /na’/ ampon teppa’. Nangeng, sabellunna oca’ paneka pesa sareng tandha /,/. Sabab, paneka oca’ sapa’an dha’ /kana’/. 

Mator sakalangkong

Lukman Hakim AG.

Teba dha’ Jalanna

Hermanto Nuris

Possa’ dhalem karena’an
Alomampa ta’ kenneng tabar
Ngarena ban metong
Ta’ noggana pekker se andhi’ bates

Tengka ator la epasepa’
Guli enneng padha ebirji’
Dhu, dha’ baramma se teppa’
Ngator dhalem netene lorong

Nyerrat ngen-angen pekker se mekker
Akkal dhalem batessa
Maddha’ana aeng sagara
Nyerama semme gi’ buru tombu
Teba ta’ bisa etola’

Setto, 30 April 2016

Tapesa’a

Hermanto Nuris

Ate rassa agumbek
Ngen-angen tamba tasangsang
Ta’ kowat rassa ate se nahan
neggenni kerrong dhalem eemmong

Dhu......... baramma gumbirana aba’
Ja’ senga’a bisa abali pole
ajalane sabban are se arassa pera’ sakejja’

Ya Allah
dhalem ngarena aba’ mekker
Netene jalan kaangguy pasera
ban napa se bisa daddiya bales
Dhalem nyapcappa aeng mata
Ban berruyya tanges dhalem dhadha
Ba’ badha’a se lebbi arga
Dhari oca’ tapesa?

Abdina sobung pamator
sakanca’an ta’ bisa ngokor
Dhalem tengka petotor se ta’ bisa eator

Guru!
ajunan ennem taon
Namen becce’ tengka, ngodhi’i tera’ dhalem badan
Dhalem nombuwi jalan se gi’ lanjang
Ponapa se bisa ngosot kalerona tengka ban ator
Ba’ bisa’a sakanca’an mabali dulang
Saongguna, abdina ta’ bisa ban ta’ bisa
Nyo’ona sapora guru, nyo’ona sapora kanca
Dhari lancangnga aba’ se budhu.