Selasa, 26 April 2016

Perrangnga Karena’an



Sanja’na Hermanto Nuris

macem barna ta’ atoles ropa
nyata pera’ badha dhalem akkal
ebirji’ abitong apengenna’
asalsal ejumla pole

bates nyata dhalem karena’an
saloka arompak dhalem paparegan
ba’ nemmowa parebasan se teppa’
dhalem netene petotor se ta’ teppa’
mengmeng dhalem soroppa are

25 April 2016

Pera’ Maca



Sanja’na Hermanto Nuris

nyerrat dhalem karena’an
neng e dhalemma ngen-angen
noro’e akkal se andhi’ bates
nyata gi’ ta’ jarna’

esaloy, egubek, eperres
nyare ta’ noggana baca’an
apa se ekaolle mon pera’ maca
sapa se ta’ taowa mo pera’ maca

ebaca epatete pera’ maca
paddhang se maca ta’ bisa eperte
dhalem loppa se ta’ cekka’ e ate
ganeko batessa pekker

April 16

Lesbumi Ngajak Agi’-gigi’ Lalampanna Aba’




PARJUGA: Dhari kangan, Lilik Rosida Irmawati, Matroni Muserang, Moh. Taufik, tor Syahid Munawar naleka daddi narasumber e MWC NU Gappora, Sumenep, Satto, 23 April 2016. (Foto: facebook Lilik Soebari)
 SUMENEP – Majelis Wakil Cabang Nahdlatul Ulama (MWC NU) Gappora, Sumenep, mabadha papanggiyan are Satto, 23 April 2016 malem. Bannya’ se dhateng dhalem kasempadan paneka, sae se gi’ anom otaba se ampon seppo.
E malem Ahad paneka Lesbumi NU Gappora marabu Lilik Rosida Irmawati, Moh. Taufik, tor Syahid Munawar daddi narasumber. E malem paneka adha-kandha nge-ngenge lalampanna manossa dhalem ajalane kaodhi’an. Kaedanna sareng kabudhaja’an Madura otaba lalampannepon tor babulangan becce’ dhari banga seppo. (Lukman Hakim AG.)

Sabtu, 23 April 2016

Atong-Rontong



sepa’ teppa’ alomampa
netene kobasana
manjeng toju’ asasenthel
dunnya ekadhuwai

tadha’ karena’an se epekker
ban ta’ bingong se mekker
sokma ajalan
ta’ maca ban ngarena
ba’ tepa’a se neng-enneng

mandeng mesem agella’
menges nyandhar ate jembar
seppe kennengnganna
ramme daddi mosona
atong-rontong ate epapolong

HERMANTO NURIS, guru e Mandhing, Sumenep, Madura.

Pornama e Bangkalan



e bajanganna ka’-bungka’an, karang dhari ngacernang pornama
ce’ sobungnga: ramme bi’ ganta’, jerring kasetta petteng
ba’ padha’a bi’ pornama e laen kennengngan ban liyerra taon se tapongkor

engko’ ngarep badha kejung se macekka’' gambar langnge’, bau ban angen nemor
nambai rentegga angkara e are ka bulan, sajan towa, atongket lente

Badha apa neng e rassa, ngalambay dhaun nyeyor e gir sereng, kalesser dhaun bako, geddhang rondhun berra’ nyambi bigina para’ maddhan, e seddi’na tabun badha togur belli’ sambi dhaun bunyogga ngaretep: pale’ katopa’ bak agambak, nyebet ka mata obu’na, sidoarjowan onggu tamba penjung, ella ja’ panyecceng!
adhu ma’ ekamempe, angen nyambi ro’oma

ondhem mamaba sakanca’an kantha nyaba’a ka mowana tanggul, dineng ate bunga samaramba, nangale ale’ temmo raja, se mangalle bengko marga edhinna’ pornama parjuga
apagar dhaun perreng, jate, nyarbu beddha’ neng tanggul

ella kantos 6 taon, nangeng sang ale’ bila labangnga badha janorra
gu sakeng maloppa’a bai sopaja ta’ daddi balai, sakeng agung se ta’ mamerte jalanna poto nojju dha’ galidiggan

encung....
kakejungan, tandha ban sakabbi rato sowara
erange-range e tabing tanggul dha’ dissa
Paparegan daddi puwisi se lo’ bisa loppa salanjangnga

Bangkalan, Juno, Agustus 2001

HAIRUL SADANA, laher d Mekkasan, Madura, 05 Februari 1977. Samangken badha e Kampong Pulaie Berakas A BB4313 Nomer 35 Brunei Darussalam.

Kamis, 21 April 2016

Becce’an Pote Tolang Katembang Pote Mata



Anggidannepon Hesbullah Majnun

maske kerre’ jemmor guring kasennengngan bula
dika ja’ aorak tretan
neko karak kak-krakkak kembuli
bula enga’ dhadhabunna buju’

cong, bula soka’ nase’ jemmor guring
tape todhus lamon acarok sabangsa’an
abecce’an pote tolang katembang pote mata
parsemmon neko menangka sanjata
naleka Balanda kobasa

are’ neko se toman are’re’
le’erra rus-burus
se pa’-larpa’an e loji
akarep re-kare rotena Balanda

cong, bula soka nase’ jemmor guring
tape todhus lamon acarok sabangsa’an
teggal kajal se abit edina
sanonto pon akanca aeng
amarga pottra ebu padha palebara

Guru Tolang

Carpan Irwan Effendi* E soro p are, Ali alan-jalan d h a’ bal a tatangga se ta’ jau d h ari romana. Nyambung silaturah im tor mae...