Malappa’ana Mano’

Carpan Mat Toyu*

LALAKE’ ganeko lebur ka mano’. Dhung-ondhung are. Tenggarra pon epekol. Aba’na nojju ke bara’. Nyare mano’ kaangguy etenggar. Are sanonto nenggara mano’ kaangguy epa-lappae, pas ejulida kalaban buja cabbina. Malle pendha seddha’ ban dhis-peddhis ngopenes dhalem rassana.

Lalake’ ganeko alebati bungka’an se pon kare buntegga. Bungkana jate ban bungkana kornes pon bannya’ se poret. Buh mon laju akare ramo’na, pas tadha’ se atamenna bungka’an pole, ya ta’ kera badha bungka’an pole dhalem pan-barampan taon.

Karettegga lalake’ ganeko ngabas tek-buntek se pon nyaropo’. Sanajjan aba’na gi’ bisa arassae naong karana epajunge dhaun-dhaun. Tape rassa ojang pon ekarassa eman-dhimman. Dhari sakeng panas kaodhi’an, bannya’ kadebbung banne gunna sakadar bucco’, tape kerreng.

Pan-barampan taon se tapongkor, bungkana geddhang garowa ta’ kose kerreng parana. Tape gunna elop ban bungkana gi’ badha badhegga. Badha cellebba bila erama’ tanang. Tape sanonto, bannya’ bungkana geddhang, se laju kerreng ngathak e bungkana. Akaton ta’ kowat nahan kole’na dibi’. Ja’ senga bisa akowak, yaktena bungkana geddhang ganeko wak-kowagan menta aeng.

Sanja’na Saif Koher Bagandan*

Nyare Elmo

Mompong gi’ pajjar pasanta’ ajar

Mabagus neyat asango sabbar

Elmo esare banne nantos gaggar

Anenggal compo’ nyare langgar

Sabab elmo aropa mosteka

Manyonar ate maloros tengka

Bila elmo ekaandhi’

Ta’ posang neng-enneng kadibi’

Sadajana daddi gampang

Odhi’ nyaman tor dhammang

Ja’ loppa ngormat ka guru

Se morok sabban laggu

Ta’ abu-ambu apareng petodu

Maelang bingong maelang budhu

Bagandan, 2017

.........................

Sanja’na Khalil Zafra*

Syi’ir Pajurung Poteran

Gulungan omba’ mokka’ careta

Sampan se eamba’ maloros pancerra

Agandhu’ careta se ce’ ngennessa

Omba’ ngadabbur atabuyan

Notobi beddhi se kaemmasan

Madhatang angen ngalesser maso’ ka pekkeran

Sagara ampon tekka elajari

Saengga maelang sossana ate se jerri

Agabay bungana ate sadajana bindari

Somor Soro’

Carpan Noer Hamima*

SENGKO’ ban kaka’ ajalan re-lere. Jalan se elebadi sengko’ sateya saongguna la abit ta’ ejalane oreng. Ranca’ ban dhadhaunan se kerreng atompo’ notope jalan. Bannya’ keban-keban kene’se aropa bilis mardha, kaleng, kala, ban samacemma kalowar dhari tompo’anna dhadhaunan kerreng ebakto sengko’ nyongkap ca’-ranca’ ban dhadhaunan jarowa kalaban tongket se pajat egiba dhari roma.

Bakto sateya bulan pornama. Tera’na bulan agabay jang-bajangan bungkana nangka paddhang ban celleng, agabay sengko’ tako’ akadiya nengale coba. Karsetta soko ban monyena perreng nambai rassa tako’ e dhalem dhadha.

”Ka’, sengko’ tako’,” ca’na sengko’ ka kaka’.

”Ma’ badha ke’-lake’ tako’an,” oca’na kaka’ padhana se ngece sengko’.

”Bila sajan semma’ ka Somor Soro’, paste sajan bannya’ seco-ngoco ban sajan matako’an ka ba’na. Tape kaenga’e, jareya, ca’na Ke Moremang, gun gudha’an,” kaka’ maenga’ sengko’ sambi malere sowara ban masemma’ lesanna ka sengko’.

Ca’na Ke Moremang, dhukon se nyoro sengko’ ban kaka’ entar ka Somor Soro’ areya. Bila sengko’ la para’ dhapa’a ka Somor Soro’ ra-kera kare 200 meter, sengko’ bakal nengale koburan laju e penggir jalan.