Nur Aisyah |
SIDDIYA sabban
are nampa cangkem, agellu’ to’ot mekkere ana’na se tadha’
mole. Kadhang sampe’ ngalecer aeng matana, sampe’
tadha’ pole se kalowara. Apa pole bila la Tellasan, na’
potona tatanggana padha akompol kabbi.
Se alako ka
lowar kottha padha dhateng. Kabunga’an ce’ rajana bila bisa akompol ban na’ poto e are se socce. ”Badha
dhimma ba’na, Na’? Ma’ ta’
le-mole, engko’ kerrong, Na’!” ca’na Siddiya dhalem tangessa.
”Kan reya
se epenta ba’na. Sateya
ta’ usa nges–tatanges
polana kerrong,” dhabuna Nyi
Sahna, reng seppona Siddiya dhari
dhalem pangkeng sambi neggu’ kom-koman
se ebakta’a akosar.
Ngedhing oca’na
reng seppona,
Siddiya sajan daddi se
nanges. Apangrasa ja’ aba’na
lakar se sala.
”Tello bellas
taon kompoyya sengko’ tadha’ kabarra. Baramma
nasibba badha e tanana oreng,” Nyi
Sahna nanges jugan.
”Mayu
se entara akosar!” ngajak ana’na sambil ngosap aeng matana.
Padhana se biyasa,
e are Tellasan, sabellunna entar ka tan-taretan ban tatanggana. Siddiya ban Nyi
Sahna entar akosar ka makamma bangaseppona. Kennenganna ta’ jau dhari
romana.
E semma’na makamma
lakena, Siddiya sajan daddi se nanges. Siddiya enga’ ka musiba se teba ka
kaluwargana tello bellas taon se tapongkor.
Bakto jareya, Ma’mang,
lakena Siddiya entar manceng se malem maske angenna ce’ tandhessa. Tape, Ma’mang
paggun mangkat. Sabab, ana’na sake’. Buto biyaya.
Kabadha’an
alam katon ta’ parduli. Angen
sajan tandhes. Omba’
ban arossa tamba raja agulung-gulung. Ma’mang
se coma ngangguy losongan kene’ ban lajar
ta’ kellar namba’.
Saare-samalem Ma’mang
tadha’ dhateng. Siddiya sajan
kabater. Ga-tatanggana se
majang la padha dhateng. Ngedhing Ma’mang ta’ mole, bala tangga padha abanto
nyare.
Abit se nyare. Ma’mang etemmo dhi lao’na Polo
Guwa-Guwa. Ma’mang etemmo ta’ anyaba.
Nangale lakena
daddi mayyit, Siddiya arassa badanna tadha’ tolangnga. Dharana laju ambu se
agili. Dunnya akaton petteng.
***
MOLAE edina lakena, Siddiya se
agante akasap. Ajuwal juko’ re-saare. Malaradda nyare napaka erassa’agi Siddiya.
E settong bakto, Hasan,
ana’na se omor sapolo taon,
nyander ka seddi’na. Bakto jareya
Siddiya parappa’na nembang juko’. Ka reng towa
bine’na, Hasan ngoca’ terro
asakola’a e pondhuk.
”Ba’na
ta’ ngabas
matana, engko’ reya apa
elakone? Kop-cokop ngakan bai la pojur. Maskena
oreng terro reya bas-ngabas gallu ka
kabadha’anna,” saodda Siddiya ka ana’na.
”Kaula
oneng,
Bu’. Tape,
caepon guruna kaula,
manabi ana’ nyare elmo neka paggun epagampang
rajekkena,” ca’na
Hasan kalaban sowara se alos.
”Ba’na mon terro
magampanga rajekke banne mondhuk,
tape alako. Sateya ora’na oreng odhi’
iya areya pesse. Maske
ba’na penter, mon ta’
andhi’ pesse ta’ kera eabas
oreng,” Hasan gun bisa neng-enneng.
Atena
mara se bungkar ngedhing
oca’na reng seppona. Aeng matana molae nyapcap.
”Manabi sakerana
obang se bisa mabunga panjennengngan, Bu’, kaula noro’a
napa se daddi dhabuna. Kaula alakowa nyareya
obang se bannya’. Kaula
ajanji ta’ kera paleman manabi ta’ olle obang
bannya’,” ca’na Hasan.
Dhuare dhari
jareya, Hasan amet ka Siddiya ban ka Nyi Sahna. Bakto jareya Hasan abala ja’ mangkada alako. Noro’ majadhi’na se alako
nyellem e tase’.
”Ba’na gi’ na’-kana’, Cong, gi’
ta’ pantes alako. Apana pole alako nyellem.
Oreng nyellem reya
nyaba bandhana,” dhabuna Nyi
Sahna.
”Oreng alako kabbi
abandha nyaba. Adhu mon ta’ anyaba bisa’a alako?” oca’na Siddiya sambi maleyep.
”Ba’na
senga’ kasta ngoca’ mara jereya, Bing.”
Esep. Siddiya ban
Nyi Sahna padha ta’ acaca. Babine’ se dhadhuwa’ jareya pera’ mandeng ka
pamangkadda Hasan. Hasan terros mangkat sampe’ ta’ etangale.
***
MOLAE Hasan
mangkat, Siddiya arassa badha se korang. Banne kakorangan dunnya. Aba’na molae
apangrasa ta’ apolong ban ana’. Apa pole bila are Tellasan, na’ potona
tan-taretan ban tatanggana padha apolong. Tape, ana’na dibi’ tadha’.
Bandher dhabuna Nyi Sahna,
ja’ tadha’ buwana bettes e adha’. Molae
mangkat alako, Hasan ta’ tao mole
sakale. Gun coma pessena se epakerem ka reng towa bine’na.
La’-ella’ bakto
kereman pesse adhatengan ka Siddiya. Ca’na oreng, pesse jareya dhari Hasan se
alako. Tape, molae mangkat ana’ lake’na Siddiya jareya ta’ tao mole.
Emma’na kapekkeran.
Kerrong ka ana’na. Apangrasa ja’ sala, ta’ bisa manyakola ban lebbi ngadha’agi
urusan lako. Aba’na ngakone mangkadda Hasan polana lebbi marlowagi dunnya
etembang elmo.
Tadha’
kasta e adha’, paste badha e budhi. Sateya Siddiya buru apangrasa ja’ pesse banne
sakabbiyanna. Tape, Siddiya ta’
bisa mabali cacana pole. Hasan
la kare nyambugel
oca’na oreng towana. Molae
mangkat, ta’ le-mole. (*)
(kim)
Carpan paneka epetthek dhari Jawa Pos Radar Madura eccaban Ahad, 2 Agustus 2015
Tidak ada komentar:
Posting Komentar