Sanja'na Alfina Nurrahma Eldiana

Kembang Malathe

Abarna pote ce’ tera’na

Bungkana mandhap tenggi ranca’na

Senneng eabas ro’om kembangnga

Terrona se mapolonga

Elenglenga cem-macemma kapper

Dhaunna bay-lambayan

Kembang malathe

Dha’ramma bila epetthek

Daddi tamba ate se ngetek

Nyeyom kembang malathe

Se badha e Taman Kottha

Dhuh ne’madda Se Kobasa

Songennep, 02 Maret 2017

.........................

Mored MTs Raudhatut Tholibin Kolor, Sumenep.

Epetthek dhari: Puisi Madura Alfina Nurrahma Eldiana*

Tello' Sanja'na Makinun Amien*

Asomaja

Satogel are tadha’

Epaabi’ akasap eangguy odhi’na aba’

E teggal, talon, saba alandhu’

Tengnga bungko’ lako nondhu’

Mekkere essena tabu’

Kaangguy olle nase’ sabundu’

Pamekasan, 2017.

..............

Tamanna

Taman, tompo’anna kembang

Kennengngan se nyaman eangguy dhang-ngendhang

Toju’ e jengka’ sambi akondhang

Sambi ngabas jalan se lanjang.

Sorat Burung

Carpan Rofiki Ar.*

TEPPA’ are Rebbu, dina se kasohor toronna elmo, Asmidi mangkat eterragi ka pondhugan se etojju. Rombunganna tello motor lengkap ban bikebba se mowa’ bala tangga ban gigibanna.

Noro’ jalan Asmidi narema babulangan ban pangarep dhari reng seppo dhuwa’na. Asmidi gun abandha enggi ban aonggu’. E dhalem atena ongguna la narema ban lakar andhi’ rassa panasaran cara apa kaodhi’an e pondhuk se sanyatana. Ngedhingngagi dhari ca-kancana se la daddi alumni ban daddi ustad, ca’na, kaodhi’an e pondhuk ce’ leburra polana bannya’ kanca. Ban bannya’ hal se bakal ekaolle.

Sabellunna, Asmidi mangmong ta’ nemmo tojjuwan se nerrossagiya. Marena ujian nasional, ca-kancana la padha jijip ja’ bakal dha’emma marena reya. Badha se  mondhuga sambi’ nerrossagiya aliyana. Badha se gunna nyalaba. Badha ca’na se langsung nerrossagiya akoleya’ noro’ jalur KUA, ca’na ma’ olle lekkas tapak.

Badha se noro’a osomma sateya: alakowa mokka’ toko e Jakarta. Badha pole se noro’a balana ka Kalimantan alakowa bata. Poko’na acem-macem ra. Se ta’ nemmo tojjuwan gun aba’na kasorang. Dila etanya’agi gun ajawab, ”Ta’ etemmo gi’an. Ca’na eppa’ ban emma’ laju.”

Dhuwa' Sanja'na BJ. Akid

Totta’an Dhara

Dhara ampon agimpo’

Reng-oreng padha ramme

Dhari oca’na se saleng salko’

Ban pamesemma ca-kanca se nyambi ketter

Tako’ padha badha

Kobater dharana ecapo’ giba

E tengka’na bakto se terros ajalan

Abareng tengka’na soko

Panganja’ Pet Paol ampon eocol

Sakabbina mata noro’ bunte’ kebba’na lembang

Agaluy kokossa roko’ se padha ngebbul

Adhante’ bukka’na korong se gi’ atotop atompo’

Dhara ngabber padha asepsap

Kabbi posang ta’ tao adha’

Reng-oreng atharat, athowat, agettak, akopa’, kakabbi enger asalebbutan.

                                   

Lancaran, 2017

....................

Tello' Sanja'na Taufiqurrahman

Posang

Malem abarna seyang

Pekkeran ngalengsang

Ngakan arassa sa’ang

Aba’ arassa nyongsang

Tedhung aser-galuser

Asabab…

Angen se ngalesser

Akaton bauna dika se neser

Kodhung barna kalabu

Maelang pekkeran se bu-nyalabu       

Matana morka’

Mata’busennan ka na’-kana’

Pamesemma maesse ate se ta’ genna’

.......................

Kakapper se Ajenter

Carpan M. Toyu Aradana

KAKAPPER ganeko arassa ce’ kerrongnga nengga’ ka kembang-kembang se ana-barna, mera, pote, mera ngodha, ban barna-barna se laen. Kerrong nengga’ ka ca’-ranca’ kene’. Kerrong atong-galattong e ca’-ranca’. Kerrong ka bau-bauna berrem. Kerrong dha’ om-ro’omma pao se gaggar gi’ laggu. Ban kerrong dha’ ro’omma dhaunan se gi’ possa’ kalaban ebbunna. Arassa ngamorneng dhalem pangabasanna.

Sanonto pera’ katon jang-bajangan ajer-kejjerran. Padhana aeng se bak-ngalembak dhalem pangabasanna. Sanonto pon ta’ nemmo nyapcabba aeng dhari dhaun-dhaun. Pon ta’ bu’-rembu’an aeng ebbun se bakal nyapcap gaggar ka tana.

Kakapper ganeko tacengnga’ nengngale dhaun koneng dhalem kebbungan aeng ojan se derres sabban arena. Dhalem pekkerra, dhaun ganeko koduna gapo, ngamennyor, ban ta’ ngas-marangas karana kakorangan aeng. Ta’ ekarassa aeng mata dibi’ ngalepek posang gaggara dha’ emma.

E bakto ganeko kakapper nengga’ e settong besse. Sokona arassa galiya’ ta’ nyaman. Arassa nongko’ ta’ sepa’ kalaban kennengnganna. Kakapper ganeko nga’-lenga’an. Posang dhalem kapanasan. Akaton pon ta’ nemmo pamoleyan. Anya-tanya dha’ aba’na dibi’, e dhimma asalla, moleya dha’emma.

Jimat

Carpan Supriyadi Afandi

ANGGUY kabbi can-bacanna mon kake ajalanan, ma’ le badha gunana se mondhuk pettong taon. Mon ta’ dha’ iya kake bisa lontor kabbi se ekaandhi’ magi terros ka jaza’anna elang. Sabbu’ se esse bujella kake bi’ can-bacan se egabayyagi eppa’en rowa angguy, ma’ le badha gunana keya reng jennat otaba almarhum reng towana agabayyagi jimat ka ana’en.

Mon alako senga’ ja’ sampe’ matodhus reng towa. Bakalla oreng ja’ kala’, ja’ amaenan reng bine’, ma’ le badanna ta’ ancor. Kake noro’ ngay raja kan? Senga’ ja’ azina. Mon binena ta’ rapa. Lamba’ polana badha oreng reya noro’ ngay raja. Andhi’ bine pas gi’ amaenan reng bine’. Orengnga lakar la’ onga’ sara (songong), lako ra-magerra, mosona bannya’. Enja’ pas epanceng bi’ ne’-bine’an pas alako. Ella la leddu’ kabbi kole’en, bucco’ apa sabarang.

Kake mon la andhi’ pekkeran akalowarga’a pas ngoca’ ka engko’. Mon ta’ bisa nyare engko’ se nyareyagina. Keng bi’ engko’ kake ya’ eberrinna gu’-teggu’an. Insya Allah bakal lancarra apa-apa se ekalako bi’ kake kor la bagus onggu neyadda. Katanggungan odhi’ engko’ ya’ gun endhi’ sakone’. Sateya engko’ la ta’ bisa abanto enga’ lamba’.

Tello' Sanja'na Arif Hidayat

Nemor Kara

Are arangka’ e balikadda nemor

Ngobbar ba-rebba biru

Tor dhadha bula se ranggo’

Eng-aeng ngetek

Ka atena bume

Sara esepsebba ramo’ kajuwan

Tor manossa se padha angkara

Sakone’ balakka’

Ondhem agiba ojan

Tak perna lebat e attassa cethak

Dhu,

Ba’ asabab dusa, ojan ta’ toron

Sakoduna sanonto

Bulan bacca kalaban bunga

Banne kalaban aeng mata nespa

Nyangsara abulanan,

Dhu,

E ka’dhimma poncana nespa neko,

Sadaja manossa ampon ta’ kowasa

Sakadar manjeng nyocco are

Otaba ajalan nete omba’

Tor akello’ angen se ta’ nanto

Dhari dhimma asalla

Kennenggan Seppe, 2017

..........................................

Dhuwa' Sanja'na Marsus Banjarbarat

 Paraban

Malem se tera’

Bulan tar-kataran

Namper kole’na dika se ngocernang

Dika adingka’, maso’ ka dhalem kamar se petteng

Are tamba are ta’ kabitong

Seyang malem arassa geddur

Mata mera dep-geddebban

akantha kokkonang e pettengnga

Sowarana omba’ ngadabbur

Tanges mellas reng-cerrengan

Dhari kamarra paraban.

Sumenep Madura, 2016

……………