Rabu, 28 Oktober 2015

Aeng Mata


Anggidan Rifky Raya 

Duli osap, aeng mata se agili
Dhari robana dika se nalpe’ ka dhadha
Dika ta’ usa sossa ban seddhi
Sabab, bula paggun abali ngagali janji

Maske, dika ban bula jau
Tape rassa paggun semma’
Nyettong metong bakto
Dhalem settong kerrong se ekarekong

Duli osap, aeng mata se agili
Dhari socana dika se benning
Coma settong pangarep se raja
Dika ban bula padha-padha ngantos
Sampe’ janji daddi tekka
Sampe’ aeng mata daddi tandhana bunga

Madura, 2015


 

Sanja' eattas epetthek dhari Jawa Pos Radar Madura eccaban Ahad, 25 Oktober 2015.

Nemor Lanjang


Anggidan Rifky Raya

E penggirra taneyan se kerreng
Bula ajalan metong panassa are
Sambi mekol bakto se talempet
Dhalem tana se mera

Sampe’ bila, langnge’ terros ngalkal
Marantep badan e padduna teggal?
Dhaun-dhaun terros agaggaran
Daddi rombu e taneyanna badan

Ngarep ojan ta’ perna dhateng,
Mano’ dalko’ ta’ duli akabar
Nandha’agi settong kasossa’an
Se matalka kaodhi’an

Dhuh, paneka nemor
Akantha satawon benteng
Ngokor jalan ban ngobbar bume
Marabak rengsana ate
Se tabendhem dhalem mempe

Madura, 2015

 

Sanja' eattas epetthek dhari Jawa Pos Radar Madura eccaban Ahad, 25 Oktober 2015.

Tandha Loka


Anggidan Rifky Raya

Atajemman ban ladding, lerek matana dika se maba
Agundhek dhadha, nyocco perro’ ban bara
Saabidda dika mandeng aberri’ tandha
Se ta’ bisa ebaca kalaban settong basa

Baramma carana, bula neko se atanya’a?

Atera’an ban bulan, robana dika se ngalemba’ e sagara
Agaluy sokma dhalem omba’, dhalem settong pangarep se berra’
Seyang ban malem ta’ bisa elang, dika sajan maposang
Bula ta’ kowat nanggung rassa se talebat lanjang

Baramma carana, bula neko se ngoca’a?

Madura, 2015


Sanja' eattas epetthek dhari Jawa Pos Radar Madura eccaban Ahad, 25 Oktober 2015.

Guru Tolang

Carpan Irwan Effendi* E soro p are, Ali alan-jalan d h a’ bal a tatangga se ta’ jau d h ari romana. Nyambung silaturah im tor mae...