Lukman Hakim AG.
MAS’OT : lakena Isa / mantona Matwi ban Umma
MATWI : ramana Isa / mattowana Mas’ot /
lakena Umma
ISA :
binena Mas’ot / ana’na Matwi ban Umma
UMMA : ebuna Isa / binena Matwi /
mattowana Mas’ot
SUM : ebuna Matwi / mattowana Umma /
nyaena Isa
RAHEM : panglakona Matwi ban Umma
NA’-KANA : empa’ na’-kana’ otaba lebbi
(1)
Esep terep.
Seppe. Petteng calemot.
Meja, jangka’
korse dalubang salbut. Damar talpe’ mele’ so’ tera’ e pangkeng pe’-cope’.
Nera’e lalake’ koros e tengnga’an. Lalake’ odhi’ abareng bukuna. E attassa
meja, damar conglet esolet. Tera’ so’ rabbang nera’e pangkeng daddi serdhang.
Noles. Eromet.
Ebuwang. Noles pole. Eromet. Ebuwang pole noles pole. Eromet pole. Ebuwang
pole. Terros ban terros noles, eromet ban ebuwang pole. Lalake’ koros terros
noles. Terros aromet dalubangnga. Terrong ebuwang.
Maca. Ta’ totok.
Buku etotop. Pas esaba’. Posang. Jaga. Pettengngeng. Toju’ pole. Noles pole.
Eromet pole. Ebuwang pole. Posang. Caremmet. Apeggellan.
Damar conglet
damar talpe’ so’ mele’ e pangkeng pe’-cope’ se gella’ nera’e lalake koros se
posang. Noles eromet. Maca ta’ totok. Jaga, manjeng. Toju’ e korse; asela.
Ajalan alengleng e pangkeng.
“Bali’ odhi’a
nyangsara e dunnya
Etembang sogi
arampok bangsana”.
Lalake’ koros se
posang neng e pangkeng alengleng pas
kalowar. Posang. Kalowar nyare jembarra pekker. Nyare serdhangnga aba’ se
tasangsang antara pangaterrona ban pengarona oreng-oreng e semma’na.
Mas’ot nyamana.
Lakena Isa, babine’ se padha neserra ban aba’na. Mas’ot, manto se ta’
ekasennengnge mattowa bine’na. Ta’ ekasennengnge karana odhi’na ta’ sogi. Ta’
ekasennengnge karana odhi’na nyettongngagi ka dalubang buku, noles sanja’,
carpan, novel dan alang-sagulung dan kasenniyan. Odhi’na se ta’ laju ngasele
pesse ta’ ekasennengnge mattowa bine’na se kabater tako’ ana’na se la daddi
binena Mas’ot ta’ ngakan, odhi’ malarat ban nyangsara.
(2)
Pangkeng petteng
calemot. Monyena keban bit-nyambit.
Damar melet e
padduna pangkeng odhi’ le’-mele’. Esolet babine’ koros ngangguy pangepplo’.
Damar se nyangke’ e tabing pas ekala’. Etampa ekeba ka tengnga’an. Ka
tengnga’an kennengnganna meja ban korse seppe se gun coma asakse dalubang buku
apek car-kalacar. Babine’ koros se gi’ abak ngodha pas nyander ka tomppo’anna
dalubang buku. Ngaot mele se car-kalacer. Nompo’ ngajum ka attassa meja.
UMMA :
(e paddu bagiyan kacer. Nyekket bingkeng, nandha’agi mamaba martabadda ana’na
se ekoca’ ta’ toro’ oca’) kan iya apa ca’na engko’, Bing, mon nyare lake ja’
ban-saromban. Ja’ kor nemmo pas menta kabin. Tenggu gallu ma’ ta’ kasta…
ISA :
Bu, ampon ta’ kengeng kadi ka’dhinto. Ka’ Mas’ot ampon daddi lake badan kaula.
Sossa senneng pon daddi tarowan dan kaula kadhuwa’an.
UMMA :
tadha’ reng towa tega ngabas ana’ odhi’ malarat..
ISA : kaula senneng. Abareng Ka’ Mas’ot
kaula ta’ malarat.
UMMA :
ta’ kellar melle berras se ekakana balakka’ gi’ ngoca’ ta’ malarat, ngoca’
senneng
ISA :
lapar tabu’ bisa etangese. Lapar ate ekeba mate. Tapi, ta’ manglo, gi’ bannya’
oreng se ta’ ngarte.
UMMA :
(nyander abangon badan padhana ceret e semma’na ISA) apa? Engko’ ereken ta’
ngarte? E jaman sateya gi badha ropana oreng se acaca ate. Kacaca ate ma’ raja
otang sampe’ mate mon ta’ alako sabban arena. Kacaca ate ma’ malarat sampe’
mate mon odhi’na ta’ neggu’ pesse.
ISA :
pesse lakar parlo. Kabbi oreng buto. Ta’ kajabana kaula sareng Ka’ Mas’ot.
Nangeng, ta’ kengeng pas madaddi obang memangka tojjuwan tonggal dhalem odhi’…
UMMA :
so’ petter ropana la ba’na, Bing…
ISA :
kan panjennengngan se masakola. Sabellunna asakola, lamba’ rama lako adungngeng
ban panebba e astana panjennengan pas dhapa’ ka pokang manabi kaula ta’
asakola..
UMMA :
tape odhi’ paggun buto pesse. Buto arta…
ISA :
enggi lerres. Nangeng, carana ngaolle risgi bang-sebangnga oreng se ta’ same…
UMMA :
apa se earep ba’na dhari Mas’ot? lakona pera’ noles re-saare. Odhi’ ban
dalubang bukuna. Apa ollena? Masogi, apa? Madhateng pesse, apa?
ISA : odhi’ paneka peleyan. Odhi’ paneka
kasangguban. Banne paksa’an.
UMMA :
ba’na tao, tengka sajan bannya’, kabutowan odhi’ tamba abit tamba atompo’. Mon
ta’ alako dhimma olleya?
ISA : nyatana kalau sareng Ka’ Mas’ot
odhi’ kantos samangken…. (agella’)
UMMA :
lakar iya. Tape ta’ kappra..
Isa : bali’ nyalenda’a etembang kappra
tape sala
UMMA :
mon-semmonan, ropana (mandeng kalaban ropa se paleng ta’ senneng).
Esep.
(3)
Dhari jauna
sowarana na’-kana’ sajan semma’. Alir-gilir dhateng dhari kacer. Aorak.
Arak-dharak. Asorak, perak:
es lilin cabbi
ayu` bi
bitthas kennyer
ayu` nyer
nyerra otang
ayu` tang
tanggal ennem
ayu` nem
membung pete`
ayu` te`
tekos juling
ayu` ling
lengker olar
ayu` lar
lar biraso
ayu` so
somor topa`
ayu` pa`
pa` salamet
ayu` met
metto tale
ayu` le
lebur metong
ayu`
tong
tongkol geddhang
ayu`
dhang
dhangdhang raja
ayu`
ja
jaman kona
ayu`
na
narema se badha
ayu`
dha
dhadha palegga
ayu` ga
gampang nanges
ayu`
nges
ngestowagi
ayu`
gi:
gi,
bila pon dhapa` baktona, pasera se bakal daddi lang-ngalang?
gi, ja` lakar pangesto ta` kera co-ngoco
gi,
manossa ajalan badha kodhalina
gi, se asengnga` coma se ta` kare
nyengnge`
gi,
banne 'gi dinapon'
ISA : obang banne tojjuwan, Bu. Obang menangka papakas odhi’.
UMMA : mon ta’ alako dhimma
olleya pesse?
ISA : sadaja manossa tanto terro odhi’a senneng.
Nangeng, kasennengnganna bang-sebangnga oreng ta’ same sareng oreng se laen.
Panjennengngan ngoladi badan kaula sareng Ka’ Mas’ot odhi’ malarat, nangeng
menorot badan kaula dibi’ bunten. Pangaterro dha’-padha’a sareng manossa tor
tatangga se laen. Nangeng pengaro se ta’ same...
UMMA : dhu, padha’a dha’ramma mon ta’ alako. Alake ta’ alako
padha bai ban se agabai ban nompo’ loka...
Na’-kana’ alengleng, aenter daddi sapangkeng. Aenter. Aguser. Aoleng. Pas
kalowar ka kangan.
UMMA : he he he... (aca’-kenca’ padhana se ngalanga na’-kana’
se alengleng) Cong, Bing apa maksodda ba’na kabbi? Sapa nyoro, ha?
Mole...mole...mole. ondur...ondur...ondur.. (kalowar ngoja na’-kana’).
(4)
E attassa korse, Isa toju’ kadibi’an saellana edina’agi ebuna. Ebuna se
padha oreng todhus andhi’ ana’ alake oreng se lalakonna coma noles, ateater.
Seniman ca’na oreng. Atena agunjek saellana ngedhingngagi dhabuna ebuna. Atena
agumbek antara noro’ dhabuna reng towa otaba noro’ oca’na lakena. Isa,
pekkeranna nete neng e obu’ salambar.
Angen mangabber dalubang buku e attassa meja. Damar conglet e semma’na
la’-mella’ meddem, tandha ta’ mampo alaban angen se dhateng.
MAS’OT : apa ereken engko’ ta’ tao apa se
badha neng epekkeranna oreng? Reng-oreng ngabas engko’ se ca’na ta’ alako?
ISA : kaka’....
MAS’OT : oreng kabbi oreng pas gun pera’
mekker pesse, pesse adhu’-budhu’ pesse, tabu’ gan tabu’ taker sabbu’na pegga’
ta’ kellar namba’.....(ambu sakejja’ mandeng saleraban) daddiya apa nagara
areya. (manjeng padhana oreng maca puisi) Balanda ban Jippang lakar la padha
mole ka nagarana bang-sebang bang-sebang. Tape akkalla la kadhung daddi akkalla
oreng Indonesia. Nyellet ka pekkerra ngate ka pola tengkana.
Saba-saba se samastena merke’ padhi, jagung, arta’
ban tarnya’ sateya la tadha’ esekot singgut tombu geddhung aora’ besse adhaun
genteng akole’ karamik. Se sogi sajan tenggi. Se kene’ sajan kene’. Se lapar
sajan ngalarkar se kennyang sajan ngenyang. Se lapar sajan ngalarkar se
kennyang sajan ngenyang. Se lapar sajan ngalarkar se kennyang sajan ngenyang. Se
lapar sajan ngalarkar se kennyang sajan ngenyang. Se lapar sajan ngalarkar se
kennyang sajan ngenyang. Se lapar sajan ngalarkar se kennyang sajan ngenyang. Se
lapar sajan ngalarkar se kennyang sajan ngenyang (terros eli-bali).
Sapa se ngurusa? Pamarenta? Cuh, pamarenta lakar
badha. Tape emo’ ban tabu’na dibi’. Emo’ ban gellang ban kalong emmassa binena.
Emo’ namba’a bine.
Pamarenta? (noding mandeng menta jawaban)
pa-ma-ren-ta tokang parenta! Sapa se eparenta? Se eparenta ya bangsana se
merres pello asaka’ mabunkar tana, ngebbar lajar e tengnga sagara. Bangsana se
ajaja ajuwal aeng matana, padhana oreng towa ka ana’ ban mantona.
se sogi
sajan soga’
se
mesken sajan cekkeng
maleng jarum eanggep ngeco’
jaran
maleng
nagara epaparjuga, nyaman ta’ ejaga
E jaman lamba’ ngakan sobek ban lorkong. Sateya
ngakan aspal, ngenom mennya’, ngontal geddhung. Na’-kana’ tombui anten e
cethagga, nan-maenan ban facebook loppa ka beddhuk. Ke Aji? Ke Aji emo’ marape
sorbanna daddi dhasi ngarep kateteyanna daddi sapatu. Santre posang ta’ ngaji.
Mored ngalarkar bannya’ tammat atandha kalambi eret-coret.
(sajan
daddi se aorak padhana se amonolog)
Balanda ban Jippang cekka’ ebadanna daddi kalambi,
salebbar, sempak, katho’, kotang se sosona mundul esontek silikon. Elongnga
enga’ tandhu’na empe’. Oh, Indonesia aroba montengnga ajam!
ISA : Indonesia?
MAS’OT : banne Indonesia. Tape manto se ta’
ekendha’i mattowana..hahahaha. banne Indonesia, tape mas’ot, lakena Isa se
erasane mattowana. hahahha
ISA : Isa paggun se esto neser ban manot ka lakena.
(nyander ka lakena) Ta’ mabi kaberra’ ka pekker, kagali padhana bato, paleng
enten akadi baliker.
MAS’OT : aneko padhana kodhung kadhung
ekasamper, padhana mandira ehormat tanang kacer. Ta’ enga’ ka para pajuwang se
abillai nagara, abillai bangsana akorban raga ban nyaba. Dharana ngalecer,
nyabana ceccer. O-tao, ngangodhadan se gi’ buru ba’ari’ ngabas ngombarra are
pas ngormat mandira ngangguy tanang kacer, Pancasila ereken buter? Ha?
Ngangodhadan se ca’na oreng ampon daddi mahasiswa ngormat mandira ngangguy
tanang kacer. Ereken sampayan ngebbar samper, ha? Sella bariya e bulan powasa,
are Juma’at pole. Ella palang onggu...
(sambi ongga ka attassa meja) jaman dalubang
buku. Jaman tabu’, pesse ban sabbu’. Jaman salsalun wasalbutun.
Pak jaksa, Pak Dandim
Pak Dansek, Pak Danramil
Kapolsek kapolisian
Dalubang buku
Mastuni ya Fir’un
Simpati peleyanna
bupati
Kawasaki; sape epengkot pas korsebbagi
Mon aros, kapettengngen
Mahwanni lil Mekka
Madina lis Sampang
Aros bucco’na badan
Petto lekor gunongnga rang-garangan
Kobugan masegidda
Mon ta’ tao ka Astandur
Entar ka Salami
Aksara banyak petto lekor kettheng
E bulan sya’ban, simpati peleyanna bupati eadane
E bulan sya’ban ta’ aesse
Hamid cakra gunongnga arta
Mate buras
Petto lekor bibidda jaksa
Petto lekor karopo’ odhang
Lema abay pabeca’an jaksa
Pecca bella ka bara’ dilakukan
Nos pasong katello bersatu
Sedan dhari Gersik
Sepolo empat tiga ngaddu tellor
Milli ya robbi
Petto lekor ka Panglegur
Marengan ka temorra
Habibi ta’ ajuwal ka’-bungka’an
Pankeng petteng
abareng bi’ kalowarra Mas’ot sambi nyacam
(5)
Gan sakone’
pangkeng tera’ pole. Rahem aberseyan bang-sabang. Matwi toju’ e korse asandhing
kalobut ban kobina. Owa’na ngebbung daddi sapangkeng.
RAHEM : (alerek ka Matwi) roko’ mon se modha
lakar bannya’ owa’na.
MATWI : lebbi bagus etembang ollena ngeco’…
RAHEM :
(agucek matana) lebbi bagus pole mon ta’ ngeco’ ban owa’na ta’ mapeddi mata..
MATWI :
ban lebbi bagus pole mon colo’na Rahem eromet polana careme, nganco’ colo’
dujan nyalko’ caca.
RAHEM :
manabi colo’ eromet, pas ta’ nyaot bila adikane panjenengngan..
Esep. Rahem paggung ban panebbana. Matwi rekong e
mejana.
MATWI : ojan pon kadhung nyapcap. Alabbu
kare bacca. Isa kare epaneka, kare apolong ban lakena.
Umma ngombar dhari kangan.
Pas...
UMMA : kare epaneka, lakena mapote mata.
MATWI : pote mata eabas manossa, mandar
poteya ate e ajunan Guste.
RAHEM : potena kapor kenneng pangorap. Potena
tolang maelang malo..
UMMA : mattowa ban mantona pada mapote mata.
MATWI : dika kan mattowana keya? (ambu
sakejja’, ngabas ka Umma) enggi sanonto dika ban bula pon senneng molong arta,
molong hasella. Lamba’?
UMMA : lamba’ gi lamba’ pon lebat. Samangken gi samangken. Laen
jaman laen bakto, laen juga se ekaparlo laen se ekabuto. Lamba’ pon kona.
Samangken se anyar..
RAHEM : lamba’ lakar kona. Koko parana...
MATWI : lamba’ dika ban bula tao keya
malarat.
UMMA : malarat badha ollena. Mas’ot? Lakona pera’ ajaga buku,
nonoles, ateater ca’na. Napa gunana? Pas Isa epakanana’na napa?
RAHEM : adha’ar nase’ sapereng padha kennyang.
Ta’ kera adha’ar salender ban kapal. Oreng ngorap ta’ kera ngakan bang-sabang
ban panebbana. Paggun sapereng nase’ juko’ acan kowa maronggi. Gi mon ontong
dhaddi neddha karkarra ajam... (alerek ka Umma)
MATWI : malarat e dunnya, tape aherat jembar
e atena...
UMMA : (malga’) mon ta’ pas malarat saterrossa.
MATWI : mekkere bangsa ban nagara lebbi
otama etembang ngesse’e tabu’na dibi’ sampe’ kennyang tapegga, dhari asela
taker ta’ kellar jaga.
UMMA : mekkerena’a bangsa ban nagara baramma mon aba’na malarat
ban nyangsara?
RAHEM : ta’ polana ngangsara Rahem ngabula...
MATWI : nape se kadhuwa soro atellak? Se
kadhuwa pon kadhung padha neser, padha jembar ban padha senneng...
UMMA : padha sennep, tantona..
RAHEM : (nyander ka Umma ban Matwi) ja’
elamara badan kaula ta’ eparengngagi ni… ja’ senga eparengngagi kan ce’
nyamanna badan kaula gun kare nonggul to’ot, Panjennengngan sareng Ebu se
makane badan kaula
MATWI : dika se sennep?
NA’-Kana’ : (labat. Aorak. Arakrak. Asorak
areng-bareng)
gaddhang bigi mara bato
bato lecen badha e soko
oreng sogi mele manto
manto mesken ekamoso
(na’-kana’ sajan aenter.
Alengleng e pangkeng. Sajan abit sajan santa’ ban sajan ranyeng)
UMMA : (mandeng, agigir ka na’-kana’) ondur...ondur...ondur
sapa se soro dha’enja?
MATWI : dina na ja’ na’-kana’!
UMMA : (posang. Ngabar ka ar ajau) Isa! (berka’, lok-ologan)
Isa! Kalowar, elang.
MATWI : (jaga) Leeee’? (makompol buku se
etabur binena).
Rahem kalowar
ngeba panebbana, sarongnga ekaong-saong. Kare salebber buttongnga se gan to’odda
ban kaos singlet e badanna.
(6)
Matwi kare
kadibi’an. Na’-kana’ paggung along-sagulung sambi saorak pas noro’ bunte’ Umma
se kalowar. Sowarana sajan abit sajan jau sajan kene’. Kene’ pas elang terep.
Abareng bi’ elangnga sowarana na’-kana’, Sum dhateng:
SUM :
oreng towa bisa bisa adu’a. Sossa sennengnga na’-kana’ reng towa noro’ pato.
Na’ poto senneng, reng towa noro’ senneng. Oreng senneng banne polana bannya’
dunnyana, maske dunnya lakar ekabuto. Tape banne se otama. Lamba’ tadha’ oreng
angongo’, ngakan sobek ban longkong laparra tabu’ bisa etamba’. Ta’ la polana
sateyana oreng bisa ango’ngo’ mon ta’ ngakan martaba’. Ajalan soko ta’ endha’,
kabbi nompa’ motor pas bannya’ se tatabra’. Bannya’ se mate asanggerra’,
aradda’.
MATWI :
(jaga dhari toju’na nyese patandha ebuna esoro alonggu) pon ta’ oneng na, Bu.
RAHEM :
(mo’dul dhari kacer nengteng temba ban pagorabanna) Rahem paggun senneng maske
odhi’ daddi kabula, ngorap geddhung masenneng oreng. Ontong ta’ akabin, tantona
la esoro ondur ban mattowa..
SUM :
ja’ kala’ emo’ ban bingong, odhi’ lakar nga’ areya. Risgi noro’ pato.
Sowara
ngagaruweng sajan semmma’. Padhana oreng atokar ana’ ban embu’na.
(7)
Dhateng Umma
ngeba Isa dhari lowar. Nyacam. Aenter dadi sapangkeng. Etoro’e na’-kana’.
Pangkeng daddi garidhu.
UMMA :
(acerreng) mon ba’na gi’ paggun noro’ Mas’ot pas ja’ mole ka bengko. Ondur
saterrossa!
NA’-KANA’ :
(pa’-kopa’an perak. Arakrak)
gaddhang bigi mara bato
bato lecen badha e soko
oreng sogi mele manto
manto mesken ekamoso
RAHEM : dinggal pakabin sareng dan kaula
saos...
UMMA : neka’ ana’na panjennengngan se lako ealem (Isa
ejungka’agi ka Matwi). Ana’ se ta’ toro’ oca’, ana’ se gun pera’ agabay malo.
MATWI : (nampane ISA se sesegunen)
RAHEM : me’ oca’na se ta’ teppa’ kan ta’
etoro’?
UMMA : apa? (mancella’ ngadhep ka Rahem)
MATWI : ambu.. ambu, Le’. Ambu, Hem....
SUM : (ta’ akeccap. Nyander ka ISA e reba’anna MATWI)
Na’-naka’ e arakrak
kalowar. Esep. Pangkeng ta’ akeccap.
(8)
Pangkeng se
celleng ngocel tera’ gan sakone’. Isa ban Umma paggun adduwan caca. Matwi, Sum
ban Rahem la tadha’.
ISA : ampon saporana, Bu, kaula ampon
kadhung neser ka Ka’ Mas’ot.
UMMA : tape, mon kerana nyossae?
ISA :
pasera se sossa?
UMMA : ya, ba’na. sapa pole
ISA :
kaula? Kaula ta’ sossa manabi gun coma tadha’na arta. Pola me’ panjennengngan
se sossa?
UMMA :
mon ta’ keng karana neser ka budhu’, arapa’ engko’ noro’a emo’. Engko’ ta’
terro ngabasa tang ana’ odhi’ sosso ban nyangsara. Ta’ terro ja’ andhia anak
alako ko’tapelko’ nyare se akakana
ISA : ta’ terro anak akadi kaula?
UMMA :
ana’ paggun ana’. Tadha’ reng towa mowa’ ana’. Tadha’! keng gun kare neserra
ngabas ana’ odhi’ malarat
ISA : kaula ta’ malarat. Kaula ta’ sossa
UMMA :
tape mon ta’ andhi’ se ekabelliya berras balakka’… andhi’ manto ta’ alako
padhana oreng ngobu etek lake’; dujan ngakan, nompo’ tamanco’ ta’ endha’
atellor.
ISA :
berras urusan tabu’. Kasennengngan ban kajembaranna ate ta’ kengeng tapser kalaban
berras. Maske berras lakar parlo. Tape banne tojjuwan…. Lapar tabu’ kenneng
ja-kaja, lapar ate pasera se bisa asomaja?
UMMA :
andhi’ lake mon ta’ alako se badha gun pera’ agabay loka…
ISA :
pasera se loka, Bu? Panjennengngan? Panjennengngan kasta narema kaka’ daddi
mantona? Kasta menangka mantona?
Seppe. Terep. Kare monyena soleng dhari jau. Dhari
tengnga saba.
(9)
Na’-kana’ aorak
dhari jau. Sajan samma’ sajan ranyeng.
NA’-KANA :
oreng gila. Oreng gila. Oreng gila…. (terros aorak e budhina Mas’ot se maso’ ka
pangkeng lebat budhi).
MAS’OT :
Pak jaksa, Pak Dandim
Pak Dansek, Pak Danramil
Kapolsek kapolisian
Dalubang buku
Mastuni ya Fir’un
Simpati peleyanna
bupati
Kawasaki; sape epengkot pas korsebbagi
Mon aros, kapettengngen
Mahwani lil Mekka
Madina lis Sampang
Aros bucco’na badan
Petto lekor gunongnga rang-garangan
Kobugan masegidda
Mon ta’ tao ka Astandur
Entar ka Salami
Aksara banyak petto lekor kettheng
E bulan sya’ban, simpati peleyanna bupati eadane
E bulan sya’ban ta’ aesse
Hamid cakra gunongnga arta
Mate buras
Petto lekor bibidda jaksa
Petto lekor karopo’ odhang
Lema abay pabeca’an jaksa
Pecca bella ka bara’ dilakukan
Nos pasong katello bersatu
Sedan dhari Gersik
Sepolo empat tiga ngaddu tellor
Milli ya robbi
Petto lekor ka Panglegur
Marengan ka temorra
Habibi ta’ ajuwal ka’-bungka’an
Oreng amata pesse
Mate ta’ ebaddhai petthe
Sowarana Mas’ot
atabung ban sowarana na’-kana’ se nabang e budhina. Terros ngagaruweng. Terros
ranyeng. Terros aoleng e pangkeng. Terros aenter. Ta’ marduli badha oreng laen.
Ta’ marduli…
Abareng bi’
sowarana na’-kana’ ban sowarana Mas’ot, pangkeng sajan abit sajan tera’.
Sowarana na’-kana’ sajan abit sajan ngagarudu’ ranyeng. Terros ranyeng. Terros
aoleng e pangkeng. Terros aenter. Ta’ marduli badha oreng laen. Ta’ marduli…
Pangkeng tera’
tar-kataran. Rabbang. Paddhang. Kabbi etangale. Pasda. Reng-oreng padha emo’.
Padha cengngeng ngabassagi Mas’ot se etoro’ na’-kana’. Isa pas noro’ bunte’
ebudhiyanna.
MAS’OT :
(adharak) bali’ ekoca’a gila atembang odhi’ baras keng ta’ genna*
Pangkeng calemot
nyakaleyan.
Esep.
* epetthek dhari
puisi Lukman Hakim AG. se abul-ombul Pancong Pangarang.