Sanja’na Fathor Rosy*

Rokat Buju’

eonjuk ka ranca’na jate

ajam celleng adaging dami socce

kalaban erenge karettek ate pote.

tongtong akaor ngatappor

reng-oreng padha akompol

acampor cator

adu’a tor-mator, aeng mata ngalocor.

topa’, apen, tajin etem

satalam gaga’ patot e babana rokem

sabarengngan edha’ar, angkara lobar

paleman kalaban tambana sabbar.

Bungduwa’, 2017

Kerrong ka Kalobut

jawapos.com/radarmadura

Carpan M. Toyu Aradana

LALAKE’ ganeko mesel bako se pon badha e dalubangnga. Molae gella’ nyare kalobut, kole’na jagung. Tape ta’ duli nemmo. 

Lalake’ se pon oban ganeko ce’ terrona aroko’a kalobut sanajjan kalobut gabayan dibi’. Tape se nyamana kalobut, kole’na jagung ngetek, ta’ etengngale. Aba’na apekker, dha’emma se nalpe’ kole’ jagung garowa. Ja’ rengan pan-barampan are apangrasa ja’ aba’na gi’ nyaba’ e di’-seddi’anna. Tape anape e bakto esare e are ganeko ta’ etemmo.

Atanya ka binena se pon ta’ enneng tarahum, nyawot ta’ nengngale. Malle ta’ katon rerengen dibi’, aherra lalake’ ganeko nyare dalubang. Badha kare salambar papir epesel kalaban bakona. Epesel lelere karana aba’na pon ngetek.

Sanja’na Makinun Amien*

 72 Omorra

Nagara se mardika e taon 1945

Ta’ lopot dhari jasa santre ban ulama’

Jasa ceng-lanceng ban na’-kana’

Jasa sadaja ra’yat Indonesia se bannya’

Banne jasana oreng se tama’

Tama’ pangkat ban tama’ ha’na masyarakat

Ta’ mekker oreng bannya’ se sakarat

72 taon banne omor se singkat

Samoga’a daddiya omor se berkat

Dzulqa’dah, 1438 H

Abantal Omba’ Asapo’ Angen

jawapos.com/radarmadura

Carpan Ma Leo*

 RASSANA panas onggu sonarra are. Kole’ rassana eobbar, epanggang. Adaddiyagi posang nyare ong-naong se macellep dha’ badan se kantha eobbar. Tape bila enga’ dha’ kaodhi’an ana’ ban bine se badha e roma, elang rassana panassa are se ngobbar kole’. Sabab ana’ bine e roma jellas ngabutowagi dha’ napaka kaangguy ibada ban kaodhi’an e dunnya. Saengga neyat se nyorot epatanyeng pole.

Kateppa’an sateya nandha’agi pokol settong seyang. Aba’ la manjeng e penggir tase’ ban parao se aguli ka bara’ ka temor. Pakakas la padha atompo’ e dhalem parao tor kakanan la ragap kaangguy bandha neng tengnga tase’.

Aba’ mangkat bakto seyang sabab ta’ mangga dha’ serrona ana’ bine se ta’ andhi’ kacokopan dhalem asakola ban ngakan e roma. Biyasana neng bakto sobbu aropa’agi bakto se teppa’ mangkat alajar. Tape ta’ arapa pangrasana dhalem pekker, Pangeran noronnagi dha’ rajekke neng bakto se ta’ eka-sangka. Contona, neng bakto seyang padhana sateya.

Kabadhaan tase’ abasanna tenggi omba’na. Apapole ojan ta’ bu-ambu. Parao se lanjang dhubellas meter ban lebar dhumeter rassana ongga toron ngadhebbi omba’. Kadiya se egulunga omba’. Rassa kobater ban tako’ ngandha’ dhalem pekker. Enga’ kadaddiyan dhubulan se tapongkor.

Settong parao dhari lowar polo nyellem egulung omba’, karem, abeli’ sampe’ ancor sakabbina. Tim dhari Polres Songennep otaba dhari Kapolisian Daerah (Polda) Jaba Temor toron dibi’ dha’ lokasi kadaddiyan. Sapolo oreng se badha e dhalem parao mate kakabbi, ta’ bisa etolong. Tape bila enga’ dha’ kabadha’an ana’ bine e roma rassana elang sakabbina tako’ se anong-gunong.

Jaring se arombai duli eontallagi dhalem tase’. Teppa’ neng tengnga tase’. Bannya’ ngabala, juko’ biyasa atompo’ neng tengnga’an, neng aeng se dhalem. Sampe’ satengnga ejjem tadha’ tandha-tandha badha juko’ se maso’ ka dhalem jaringnga. Kalaban sabbar Matra’e adhante’. Sambi ngabas kabadha’an ka bara’ ka temor. Sambi nembang:

Sanja’na Zainul Kurama’

Majang

Olle olang paraona alajara, olle olang alajara ka Madura

E bakto are ampon compet,

Oreng-oreng tase’ ampon arapet

Ngampar lajar e tengnga sagara.

Kaangguy majang areng-bareng

Olle olang

Du’a eatoragi dha’ Pangeran

Duwa ebaca e attas sampan

Sopaja juko’ ta’ ngetek e babana karang.

Saamponna badha e tengnga tase’

Ora’-ora’ malantar

Naja’ jaring se eampar

Ta’ mekker tabu’ maske lapar.

Dhu oreng majang,

Ce’ raja babajana, abandha nyaba

Kaangguy kaodhi’an ana’ bine tor bala tangga.

Bintaro, 2017

Ratona Jin Pajuddan

Radar Madura

CARPAN UBAIDILLAH HASANI*

GUWA se badha e attassa gunong arowa Guwa Pajuddan nyamana. Bannya’ onggu careta se dhateng dhari guwa jareya. Caretana Joko Tole padha dhateng dhari guwa jareya. Tape sengko’ acareta’a careta se ta’ bannya’ oreng tao. Areya caretana ratona jin se badha e dhalem alas e budhina Pajuddan.

Sengko’ sakalowarga ban masyarakat laenna odhi’ e babana Guwa Pajuddan. Kabbi oreng la biyasa odhi’ kalaban atapa. Tadha’ laen tojjuwanna salaenna kaangguy ngaolle bannya’ elmo.

Eppa’na sengko’ sala settong dhari bannya’ oreng se andhi’ bannya’ elmo. Eppa’ panjat atapa, maka pas masyarakat mele eppa’ daddi katowa kampong.

Eppa’ bisa ngator kaodhi’an e kampong kalaban bagus. Kabbi oreng odhi’ tennang. Tape jalanna kaodhi’an aoba daddi rosak polana settong oreng towa se seggut atapa e Guwa Pajuddan.

Oreng jareya terro daddiya oreng se kowat sampe’ agabay parkara. Parkarana manossa ban ratona jin. Ratona jin la ngoso’ pas entar ka kampong kaangguy nyare kakanan e sabban malem Juma’at.

Sanja'na Saiful Bahri

Tongngebban

ba’na lagguna kodu senneng sabab badha sengko’ se amaen nyambiya palotan, geddhang, lemper, ban nase’ se tadha’ juko’na

alasanna sengko’ settong, iya areya mabunga’a atena ba’na

sello’ se ebagi reya angguyagi, bariya keya kalambi ban dhung-kodhungnga

sengko’ ngantosa sadhumalem giliranna ba’na, Le’, se amaena ka romana sengko’

gun settong se epenta’a cokop seyom astana reng towana sengko’ tongngebban jajan rassa tadhe’ parlona

bila ba’na etangale mesem nyambi le-olle raddinna robana.

Songennep, 2017

...................

Manca’

Toju’

Asela

Along-polong

Maelang ate rekong

Petteng ondhemma ngagarendhem

Tape mata ta’ bisa meddem

Ngaedhing monyena gendhang, saronen, kalenengan, se ngalecer daddi gendhingan.

Tatenggun manca’

Ekenca’ sepa’

Ngakan seppet ban belling

Agibe garingging

Baringbing

Gariming

Tatenggun manca’

Akenca’-kenca’, alonca’, atokar ja’-gaja’an, etabbui gendhingan

Akantha nase’ jagung

Ekowae gangan maronggi, nyarepsep ke bun-embunan.

Songennep, 2017

Kerras Ta’ Akerres

Radar Madura

Carpan Mudhar CH.*

POLA areya se ekoca’ aba’ ta’ arga. Otabana pole, pola areya se ekoca’ mate jeng-manjeng. Odhi’ keng ta’ kabilang. Badha keng ta’ katela’. Apa banne ba’na se mella’ matana gerrang. Ajarunggut mara gaja, tape atena kerreng, rangngo’ mara karopo’. Kaangenan sakejja’ kelmet.

”Molae sateya ta’ usa emo’ ban urusan gudhang. Mon la badha e bengko ja’ ma-narema telpon urusanna gudhang. Apapole telpon dhari katowa kalompo’na. Senga’! Etompo ban sengko’ makke la budhu’en sapa.”

Ngedhing cacana, sengko’ ta’ andhi’ ate badha e dhalem. Nanges e adha’na ba’na tadha’ gunana. Atena ba’na gali alebbiyan dhari bato se paleng gali. Terro sengko’ acerrenga sa lar-kellar, keng aba’ todhus ka oreng. Andhi’ ana’ tatello’ me’ badha’a tang ate aesse reng laen salaen ba’na.

Mon epekker karena, ba’na bannya’ obana sajjegga ba’na esangka ngala’ pesse e kantorra kennengnganna alako. Pajat ta’ sa’apa bannya’na ban tadha’ bukte. Tape naleka ba’na ebajar kaangguy narema, nyaba’, nyempen, ban noles kalowar maso’na pesse maka pesse jareya daddi tanggung jawabba ba’na. Elangnga pesse ta’ kalaban badha arampok otaba ta’ ekataowe apa kalero tolesan. Mangka pantes mon ba’na ban kantorra epotong bajaranna kaangguy agante’e pesse se elang.

Sajjegga jareya ba’na bannya’ obana. Gan bila ba’na se enga’a. Ba’ bisa’a ba’na mekker ta’ acampor napso. Mayu padha nga’-kenga’e gi’ asal. Mara jalanna odhi’ padha gi’-gigi’. Sengko’ ban ba’na la padha neggu’ kalakowan teptep, sanajjan ta’ sogi enga’ tatangga. Mayu papenter asokkor, ne’mat se badha olle atamba.