Omba’ Tase’

Sanja'na Marsus Banjarbarat

Olle ollang, paraona majanga

Olle ollang, mangkada dhari Madura

Sonar are nyellem e ponca bara’

Lajar parao bar-kerbayan e penggir tase’

Omba’ agulung-gulung

Juko’-juko’ padha nyellem

Nyongsep ka dhaem tase’ se dhalem

Angen ser-ngalesser

Nyarepsep ka kole’ badan

Nyapo paser e penggir sereng

Olle ollang

Paraona jal-gunjalan

Nyabreng omba’ se benang-tabangan

Omba’ pote akantha labun oreng mate

Olle ollang

Dhari attas langnge’ se petteng

Bintang-bintang padha meddem

Bulan ngabas mellas

Ondhem celleng calemodan

Reng majang ebulet omba’ dal-keddalan

Malem tamba sorem

Sowara omba’ ngadabbur

Angen abentor lajar ancor

Aeng mata ngalocor

Akantha langnge’ se bucor:

Ojan dhara, ojan nana

Banjir dhara, banjir nana

Nespa ta’ sakera

Olle ollang

Pello agili daddi aeng tase’ se accen

Mata panas dep-geddebban

Apandhi dhara dhari lokana ate se posang

Parao tang-balintang

Eonjan omba’ ban ojan

Reng majang lang-nongkelang

Asapo’ jaring lem-samalem

Sokma-badanna ancor

Olle ollang

Reng majang olle palang

Saomorra sang-tasangsang

Akorban nyaba sampe’ elang

Elang eanyo’ omba’ ka koburan

Yogyakarta, 2013

Sanja’ Omba’ Tase’ ebaca e acara Pesta Puisi Akhir Tahun 2013 e Taman Budaya Yogyakarta (TBY), daddi sala settong bekkel maca puisi nusantara kalaban Basa Madura.

Paraban

Sanja'na Marsus Banjarbarat

Malem se tera’

Bulan tar-kataran

Namper kole’na dika se ngocernang

Dika adingka’, maso’ ka dhalem kamar se petteng

Are tamba are ta’ kabitong

Seyang malem arassa geddur

Mata mera dep-geddebban

akantha kokkonang e pettengnga

Sowarana omba’ ngadabbur

Tanges mellas reg-cerrengan

Dhari kamarra paraban.

Sumenep, 2016

Ngalengsang

Sanja'na Marsus Banjarbarat

Langnge’ celleng sorem dhalem pangabasan

Samper leres bathek pote celleng

Akantha ate se tacellet dhalem cellot baceng

Dhu ale’ se jau e mata..!

Ba’ bila bula se gila nemmowa tamba?

Asabab pangarep se ta’ nemmo konco’

Kajaba kakobasa’an bisa matemmo odhi’ bula ban matena dika

Are tamba are, panas mapotthon ate se socce

Kole’ arassa sake’, ebulet obu’ cellengnga dika

Cethak bindheg ta’ kowat mekker taresna se baceng

Sumenep 2016

Kasta

radarmadura.jawapos.com

 CARPAN MUSYFIEQ RZ.*

MARE adan Sobbu tadha’ oreng ngaji ka corongan. Biyasana, na’-kana’ se ngenep e langgar ngaji ka keyajina. Are gi’ ta’ kalowar, ajam la nganthang akongko’. Dulasmar ru-kaburu entar ka langgar abala ka keyaji ja’ sapena la elang.

”Assalamu ‘alaikum, etojjuwagi dhari sadaja masyarakat Pordhapor, sapena Dulasmar ampon elang. Ngereng dha’ sadaja masyarakat pakompakkagi nyare sape.” Seyaran e masjid ekaedhing ka man-dhimman.

Kabbi masyarakat Pordhapor seyal. Tacengnga’ polana mangken neka disa badha kaelangan. Molae dhimin, bajingan dhari Pordhapor bisa masteyagi kaamanan disana. Kalebunna jugan kowat arangkol bajingan dhari Pordhapor ban se dhari lowar disa. Bajingan dhari lowar se ngeco’a sape e Pordhapor tako’. Bannya’ oreng ngoca’, ”Biyasa, paleng jareya bajing gi’ buru ajar. Entara nerragi nyaba, paleng.”

”Kan iya jat. Mon maleng gi’ buru ajar reya jat nga’-masanga’. Enga’ se ce’ angkona,” ca’na oreng laen se padha akompol e romana Dulasmar.

Sambi nyongkelagi arek ka gulungan sarongnga, Dulasmar ngoca’, ”Mayu ka, mon mangkata pong gi’ ta’ ce’ abanna,” Dulasmar ngajak oreng-oreng se toju’ e per-amper romana.

”Neserra Dulasmar, mangkana sapena ebelliya e bakto anakna se bine’ alakeya. Dulasmar la para’ masanga reng-tareng.”

”Se biyasana Dulasmar ebantowa, sajan ekeco’ ban oreng sapena,” ca’an Bun Nurasan ka Sahriya se mangkata ngare’ ka saba.