Anggidanna Fendi Kachonk
Dhu, bidaddari se badha e temor,
badanna se akadi songay e bakto mosem ojan, se bibirra apal caretana
bintang-bintang, toron, toron, dhari langnge’ daddi bu-tombuwan se odhi’ e
tana, se nyerrep ka dhadhana na’-ana’ bangsa.
Arena la pajjar, monyena mano’
ngeba rassa jembar, e settong bakto reya tadha’ gendhang lamon monyena bakto
akadi tamtam. E temor are mesem akadi pornama se malemma badha e bibirra dika;
padhi-padhi koneng, jagung-jagung jumambar ; ne’-bine’ se apenjung motiyara
badha e dhapor ngella kobi kalaban saraban, dhaggi’ ka saba molong nasep e
tengnga ojan tor panassa are.
Tape nalekana na’-kana’ mangkat
ka sakola’an ate rassa tennang sanajjan odhi’ badha e disa, lesso amarga arga
ta’ dibasa. Dhu, mara ale’ se raddin osappagi pello se kalowar dhari badanna
bula: Gambarra mosem la nancep ka dhalem ate, e dhalem otek se la ta’ nemmo
jalan: celleppa ka’-bungka’an, celleppa men-tamennan.
Dhung mara kadhung, odhi’ ta’
coma nyadhiyai kaseddhiyan, tape jalan-jalan matombu rassa senneng, rassa
kerrong dha’ ro’omma tana e saba, ro’omma rebba se ta’ seyal nalekana are
pajjar, se ta’ takerjat nalekana kelap nyander.
Dhung mara kadhung, mayu ka saba,
mayu agarap pole tana-tana se kosong, ma’ olle nagara ma’mor, ma’ olle odhi’
ta’ tor-tabentor.
Dhung mara kadhung, bakto terros
bang-tabangan, omor nyorot ka budhi, daddi sateppong careta. Lakar ta’ kodu
nanges, sabab odhi’ reya paperrangan se nyata, lakar ta’ kera becca bibir
kalamon tadha’ aeng somor tor sagara, lakar tabu’ ta’ kera kennyang mon tadha’
jagung, mon tadha’ wa’-buwa’an se laen.
--Odhi’ bumena engko’, ma’mor
nasibba reng tane, akadiya nye-monyeyan se jung gante ngejung—
Dhung mara kadhung, odhi’ e disa,
dhung mara kadhung
dhung mara kadhung, odhi’ e disa, dhung mara kadhung
dhung mara kadhung, odhi’ e disa, dhung mara kadhung
Monce’, 06-04-16
Tidak ada komentar:
Posting Komentar