Abdul Warits: Malem Sennen, Posang, Kembang Malathe

MALEM SENNEN

            :Komunitas Persi

Aba’ apol-kompol dhalem sowarana jangkrek se ngalengsang. Noles malem se petteng. Settong kalakowan se barenteng. Kalaban noles sadajana se kalebat. Bakto se ampon tapongkor. Paggun ebaca sareng dika se tapengsor.

Saamponna ojan dhateng, aeng majenneng pekkeran se ngalengsang. Sanaossa aba’ bisa areng-sareng noles malem se serrem kalaban pan-barampan kadaddiyan. Dhari angen se ngalesser, cellep se nyarepsep dhalem ate, sanaossa teros ekarassa sampe’ aba’ bisa noles sadajana se ampon ekapangrasa.

Tatkalana ojan mare, aba’ terros noles napa bai se ampon badha e ate. Bakto arassa sakejja’ naleka sadajana ampon maenga’ ka pekkeran. Ja’ saongguna se etoles bakal daddi amal kaangguy ekaenga’ sampe’ aba’ ta’ enga’ dha’ sadaja kadaddiyan se badha e kaodhi’an dunnya paneka.

POSANG

Ajalan ka bara’ bula nemmo are se ampon petteng. Malem se dhateng. Dhalem atena dika, bula te-ngate ajalan. Pola nemmo tojjuwan se saongguna, kaangguy ngabas bulan kalaban samporna se tera’ dhari socana dika. Soca se ampon madhateng taresna dhalem atena bula se sossa.

Bula ampon tao, jalan se lanjang paggun dhapa’ ka tojjuwan. Settong bakto bula paggun dhapa’ ka atena dika se taresna. Kalaban atena bula se esto, bula teros ajalan sabban bakto. Pola nemmo pangarep e socana dika.

Bula ajalan polana socana dika se ngaraksa.

Lubangsa, 2016

KEMBANG MALATHE

Gu-laggu bula jaga dhari tedhung saamponna malemma dika ekamempe. Ate bunga. Ropana raena dika se aganggu dhalem pekkeran. Mekker kerrong se agantong dhari are se tapongkor  sampe’  malemma coma ropana dika se paddhang.

Sabban laggu bula atogu jalan. Ngantos ro’omma dika se akalembek. Bula arassa kobassa, tatkalana dika mesem sampe’ socana dika nyonar ka atena bula. Dika ampon ajagai atena bula se tedhung kalaban mekkar mesem dhari bibirra. Bula ampon apangrasa, dhatengnga dika lebbi cellep dhari aeng ojan se gaggar bakto malem.

Dhari kadaddiyan gu-laggun, bula ajalane are kalaban ate ngastete nyare kaodhi’an sampe’ sonarra are sorop ka bara’. Moga-moga sadajana pangarep paggun paste e jalanna ate se socce.

Lubangsa, 2016

ABDUL WARITS, lulusan TK, MI, tor MTs Tarbiyatus Shibyan Jadhung, Dungke’, Sumenep.

Sanja' e attas epetthek dhari Jawa Pos Radar Madura (JPRM) eccaban Ahad, 3 April 2016