Mateppa’ Tolesan Sosialisasi Lalu Lintas (2)

Lukman Hakim AG.

 

(FOTO LAMPU MERA: Gambar paneka ekala' are Salasa tanggal 23 Februari 2016)

Foto Lampu Mer), se atoles:

Apelet De’ Pak Sakera

Terro Salamet Je’ Nyerobot Lampu Merah

Manabi esalen ka basa Indonesia korang langkong daddi:

Pijat kepada Pak Sakera

(jika) ingin selamat jangan nyerobot lampu merah

Manabi epateppa’ daddi:

Apelet dha’ Pa’ Sakera

(mon) terro salamet ja’ nyerobot lampu mera

Ngereng talektegi bidana:

(1)     Oca’ /de’/ se teppa’ paneka /dha’/. Carana noles /dha’/ ngangguy /a/, tape ebaca /e/. Oca’ paneka padhana noles /dhapor/. Monyena /d/ dhalem basa Madura badha empa’ kalaban dhuwa’ carana noles. Rengkessepon, /d/ se manabi eoca’agi konco’na jila akadi ekekke’ gigi adha’, maka etoles ta’ mabi /h/ otaba paggun /d/ malolo. Sabatara, manabi ngoca’agi /d/ kalaban cara koncona jila buru ka bagiyan attassa colo’, maka etoles kalaban etoro’e /h/, daddi /dh/. Contowepon, oca’ /seda/ se ekoca’agi kalaban konco’na jila ekekke’ gigi’ adha’ gadhuwan arte /mate/. Sabatara /sedha/ se ekoca’agi kalaban cara konco’na jila buru ka attas agandhu’ arte /ba’na/. Salaen paneka /dara/ se ama’na nyamana mano’ sareng /dhara/ se ama’na barang akadi aeng se agili e badanna mahlok.

(2)     Oca’ /pak/ mastena etoles /pa’/. Bidana /’/ sareng /k/ ampon ejarba’agi e attas. Dhalem basa Madura /’/ ban oca’ e mate kalaban konsonan /k/ padha eangguy. Angguyanna ta’ bisa eporop. Misalla, oca’ /pa’a’/ ta’ bisa etoles /pakak/ kalaban agente’e tanda /’/ daddi /k/. Salaen paneka, oca’ /to’ot/ ta’ bisa etoles /tokot/, /ta’al/ ta’ bisa etoles /takal/.

(3)     Oca’ /je’/ mastena etoles /ja’/. Basa lesanna lakar akadi badha horop /h/-na samarena /j/. Nangeng basa tolessa menorot eja’an 1973 paneka tadha’. Daddi paggun etoles /ja’/ kaangguy noles maksod /ajja’/, /nyegga/ akadi se ekakarep e tolesan dhalem gambar paneka. Paneka same sareng tolesanna oca’ manabi se ekakarep paneka /ja’/, /enja’/. Kangguy abida’agi bisa etenggu dhari okarana.

(4)     Oca’ /nyerobot/ paneka basa Indonesia. Basa Madura badha /narabas/ dhari oca’ /tarabas/ se etanduggagi daddi /narabas/. Oca’ /nyerobot/ ta’ daddi masala, polaepon me’ se noles terro se maca lekkas oneng ponapa se emaksod.

(5)     Oca’ /merah/ mastena etoles /mera/. Sabab, /merah/ aropa’agi basa Indonesia. Dhalem basa lesan reng Madura badha se ngoca’ akadi badha horof /h/-na. Nangeng, ganeka coma basa lesan. Dhalem panolesan paggun /mera/. Napa pole /mera/ paneka daddi jawaban dha’ oca /sakera/ e baris se kapeng settong kaangguy maakor monye.

(6)     Dhari akorra monye parlo etalektegi oca’ /apelet/ e baris se kapeng settong kalaban oca’ /salamet/ e baris se kapeng dhuwa’. Manabi ebaca, dhuwa’ oca’ paneka ngasellagi sowara se bida. Dhalem basa Madura badha /e taleng/ ban /e petpet/. Horop /e/ dhalem oca’ /apelet/ aropa’agi /e taleng/. Sabatara, /e/ neng ne oca’ /salamet/ aropa’agi /e petpet/. Pramela, manabi se ekaparlo oca’ /salamet/ e baris se kapeng dhuwa’, maka e baris se kabidan langkong sae manabi ta’ ngangguy oca’ /apelet/. Nyare oca’ se padha aguna’agi /e petpet/ ma’ olle ngasellagi monye se padha. Akadi, kalaban aguna’agi oca’ /terro leppet/ ban salaenna.

(7)     Angguyanna /’/ dhalem oca’ /dha’/ e baris kapeng settong tor /ja’/ e baris se kapeng dhuwa’ ampon teppa’ me’ olle monye se padha.