CARPAN: LY BINTANG*
PARABAN se obu’na sabau
rowa lako daddi kakandhan otama dhalem caretana reng-oreng. Kabbi oreng tao ja’
paraban rowa nyamana Sri, ana’na Pa’ Kalebun Ali. Bannya’ lalake’ se terro ka
paraban jareya. Bannya’ keya se alamara, tape etola’.
Otamana ana’na Pa’ Bupati. Ja’ toro’, orengnga
gantheng ban sogi. Tape, ta’ tao arapa Sri ma’ nola’ lamaranna.
Sapa se ta’ tako’a sateya. Ngabas langnge’
se biyasana tera’, sateya aoba daddi petteng nako’e. Aeng se gaggar dhari
langnge’ molana tong-settong, bit-abidan gaggar agalumpo’ raja.
Kabbi oreng tako’ se kalowara dhari romana
bang-sebang. Mele sapo’ ban bantal akagabay peleyan otama. Kelap ban guntor
daddi nambai rassa se nako’e.
Sabatara jareya, badha paraban se nyamana
Sri mala mele ajalan narabas ojan katembang abulun sapo’ ban bantal e dhalem pangkengnga.
Badanna bacca kabbi. Saengga legget badanna etemmo, seksi.
Sri terros ajalan. Dhapa’ ka partellon, Sri
acaca ban oreng lake’ se lebbi tenggi dhari dibi’na. Lalake’ jareya ngangguy jaket
celleng. Ta’ tao apa se ekacaca. Sri laju noro’ bunte’ e budhina lalake’ jareya.
***
Dhari kadaddiyan bakto rowa Sri ta’ tao badha
e dhimma. Elang. Tadha’ se tao badha e dhimma. Eppa’na se jellas-jellas kalebun
bangal ajanji ka oreng se nemmo Sri. Pa’ Ali ajanji, mon badha lalake’ lanceng se
nemmo Sri andhi’ ha’ ngabine.
Mon se nemmo babine’, saparo artana Pa’
Ali ebagiya. Kabbi oreng abillai nyare Sri kalaban alasanna bang-sebang. Badha
se karana terro ngabina Sri. Badha keya se terro ka artana Pa’ Ali.
Ta’ mele lake’ lanceng, towa, ban babine’.
Tape, dhalem nyarena jareya bannya’
lalake’ lanceng se noro’. Sampe’ lema bulan Sri ta’ etemmo keya.
Bannya’ se ta’ nerrossagi usaha nyarena.
Se asalla bannya’, sateya daddi lema oreng lalake’. Lanceng kabbi.
Pa’ Ali la posang. Badha sala settong dhari
lema’ lalake’ jareya anyama Anwar. Orengnga ta’ kala gantheng dhari ana’na bupati
se tao alamar Sri e bakto rowa. Alasanna Anwar noro’ nyare Sri polana ta’ tega
ngabas paraban elang.
Ja’ toro’ sabellunna tao dhari foto. Anwar
ta’ tao atemmo. Apa pole andhi’ rassa terro ka Sri. Anwar oreng disa laen. Polana
ngedhing kabar ja’ badha paraban elang e disa lain, Anwar gaggarra noro’ nyare.
***
E kennengngan jau dhari Anwar se nyare,
Sri toju’ sodek sambi onga’ ka langnge’. Mowana paggun raddin. Tape, badha se
ane dhari paennengnga.
”Ba’na sateya kadibi’an,” oca’na lalake’
se ta’ esebbut nyamana.
”Engko’ gi’ paraban. Apa maksodda ba’na
ngeba engko’ dha’enna’?”
***
Anwar terros nyare ka man-dhimman. Sabadhana
jalan se etemmone, Anwar jalane. Ta’ tako’ badha rampok otaba keban galak se bisa maelang nyabana.
Malem la dhateng. Dhapa’ ka settong
disa, Anwar neng-enneng e barung kene’ se badha e penggir jalan. E barung jareya
ra-kera ennem oreng lalake’ ju’-toju’. Ta’-careta’an genna’ ban biddangnga.
”Dha’emma’a, Cong? Lem-malem baja teya?”
oca’na oreng se akaos pote.
”Kaula nyare paraban, Pa’. Paraban ganeka pottrena kalebun. Ampon
lema bulan elang. Kera-kera dha’ ka’dhimma gi, Pa’?”
”Sabban badha keya enga’ reya, Cong.
Sampe’ tello taon ta’ etemmo. Mon-temmo paraban jareya gila. Bannya’ na’-kana’
se epate’e. Bida pole mon atemmo ban lalake’ lanceng.”
”Epakadi ponapa keng, Pa’?”
”Lalake’ lanceng jareya laju egiba paksa
ka settong kennengngan. Marena jareya, paraban jareya adha’ kabar. Adha’ se bangal
alaban paraban jareya. Polana, laju epate’e ngangguy are’. Sapana ba’na keng se
elang jareya?”
”Banne pa-napana kaula, Pa’. Kaula gun neser
manabi badha paraban ta’ jellas badha e ka’dhimma,” Anwar ban pa’-bapa’ se badha
neng e barung jareya terros acareta sampe’ pokol satengnga settong.
Ngaga’ reng-oreng bubara, badha sowara
cerrengnga ne’-bine’ e jauna. Kabbi anya-tanya, badha apa. Badha se ngusullagi
entara ka somber sowara. Badha keya se nola’. Tape, Anwar bangal kadibi’an,
entar ka somber sowara.
”Ella, Cong, ja’ entar ka dhissa’! Babaja.”
”Pasera oneng garowa oreng se esare kaula,
Pa’.”
”Ca’na ba’na la. Sengko’ ta’ ro’-noro’a.”
E bakto malem jareya keya, Anwar ajalan
kadibi’an. Alebadi ombet. Monyena mano’ kowek ban angen ta’ madaddi Anwar ambu se
nyare. Bit-abidan, cerrengnga ne’-bine’ ekedhing pole.
Jalanna Anwar jan gancang. Anwar bu-talabu.
To’ot ban tanangnga loka adhara. Tape, Anwar paggun ajalan. Sowarana babine’
rowa jan samma’.
Anwar maambu tengka’na se lekkas akantha
kelap teppa’na nangale bannya’ koburan se ecapo’ tera’na lampu. E tengnga koburan
badha lalake’ se nyeksa babine’ sampe’ metto dhara.
Mare jareya lalake’ jiya pas toju’ asela.
Ta’ tao apa se elakone. Lalake’ jareya meddem sambi ca-maca. Anwar yakin babine’
rowa Sri. Mangkana Anwar nerrossagi alaban lalake’ se ta’ jellas ano apa.
Ta’ ngantos abit, Anwar laju nerkem mowana
lalake’ se ta’ jellas rowa. Babine’ rowa tacengnga’ ngabas se elakone Anwar. Sabatara
jareya lalake’ se ta’ esebbut nyamana nerkem Anwar keya. Dhara kalowar dhari
elongnga Anwar.
”Sapa ba’na?” Lalake’ jareya atanya.
”Engko’ Anwar. Engko’ ngoneyana babine’
se eerrep ba’na.”
”Ba’na ta’ tao pa-apa se elakone engko’.
Daddi neng-enneng bai. Mole ka romana!”
”Engko’ ta’ moleya sampe’ bisa ngeba babine’
reya. Sambi’na babine’ reya gi’ paraban. Akagabaya apa ban ba’na?”
Apangrasa peggel, lalake’ jareya nerkem
pole ka mowana Anwar. Saengga mowana bannya’ dharana. Tape, Anwar paggun alaban
keya.
***
Sataon samarena kadaddiyan malem rowa,
Sri apangrasa kerrong ka Anwar polana abit ta’ katemmo. Anwar bisa makala lalake’
rowa. Sri dibi’ ta’ tao arapa lalake’ rowa ma’ ngeba buru aba’na. Lalake’ rowa
lakar kancana Sri e bakto asakola. Sataona Sri, lalake’ rowa ta’ jahat.
Saroju’ ban janjina Pa’ Kalebun, Anwar epajudhu
ban Sri. Tape, Anwar ta’ endha’. Alasanna ta’ ekabala ban Anwar ka Pa’ Kalebun.
Saengga Pa’ Kalebun posang. Tape, Pa’ Kalebun bisa narema kapotossanna Anwar.
Sri gi’ paggun paraban sampe’ sateya.
Sri ajanji ka eppa’na ban ka Anwar bakal ngantos sampe’ Anwar endha’. Ta’ tao
sampe’ barampa taon laggi’. (*)
*)Ajar
e Sanggar Sareyang MA 1 Annuqayah Putri tor Forum Lingkar Pena (FLP) Ranting
PPA Latee II.
Sanja’
e attas epetthek dhari Jawa Pos Radar Madura (JPRM) eccaban Ahad, 17 April 2016
Tidak ada komentar:
Posting Komentar