Mateppa’ Tolesan Sosialisasi Lalu Lintas (3)

Lukman Hakim AG.

 

(FOTO KACALAKA'AN: Gambar paneka ekala' are Salasa tanggal 23 Februari 2016)

Foto Kacalaka’an, se atoles:

Melle Oto’ Dhe’ Pasar Bengkalan

Lok Atoro’ Marka Bisa Kecelakaan

Manabi esalen ka basa Indonesia korang langkong daddi:

Membeli kacang ke Pasar Bangkalan

Tidak mematuhi marka bisa kecelakaan

Manabi epateppa’ korang langkong daddi:

Melle oto’ dha’ Pasar Bangkalan

Lo’ atoro’ marka bisa kacelaka’an

Ngereng talektegi bidana:

(1)     Oca’ /dhe’/ mastena etoles /dha’/. Jajarba’anna akadi neng e Foto Lampu Mera nomer (1). Carana noles /dha’/ ngangguy /a/, tape ebaca /e/. Oca’ paneka padhana noles /dhapor/. Monyena /d/ dhalem basa Madura badha empa’ kalaban dhuwa’ carana noles. Rengkessepon, /d/ se manabi eoca’agi konco’na jila akadi ekekke’ gigi adha’, maka etoles ta’ mabi /h/ otaba paggun /d/ malolo. Sabatara, manabi ngoca’agi /d/ kalaban cara koncona jila buru ka bagiyan attassa colo’, maka etoles kalaban etoro’e /h/, daddi /dh/. Contowepon, oca’ /seda/ se ekoca’agi kalaban konco’na jila ekekke’ gigi’ adha’ gadhuwan arte /mate/. Sabatara /sedha/ se ekoca’agi kalaban cara konco’na jila buru ka attas agandhu’ arte /ba’na/. Salaen paneka /dara/ se ama’na nyamana mano’ sareng /dhara/ se ama’na barang akadi aeng se agili e badanna mahlok.

(2)     Oca’ /Bengkalan/ se teppa’ etoles /Bangkalan/. Tolesanna lakar ngangguy /a/ saamponna /b/. Naneng, ebaca akadi /e/. Paneka akadiya noles /bangka/ se ebaca /bhengka/ se agandhu’ arte /mate/. Saamponna horop /b/ ta’ mabi /h/. Palancar /h/ e eja’an 1973 coma eangguy noro’e sabagiyan horop /d/ ban sabagiyan horop /t/. Sabatara sabagiyan /b/, /j/, /g/ ta’ mabi etoro’e /h/.

(3)     Oca’ /lok/ koduna etoles /lo’/ sinonimmepon oca’ /ta’/. Oca’ /lo’/ eguna’agi oreng Madura bara’ (Sampang-Bangkalan). Sabatara oca’ /ta’/ biyasa eguna’agi oreng Madura temor (Sumenep ban sabagiyan Mekkasan). Jajarba’an bidana /’/ sareng /k/ bisa ebaca e sabellunna. Dhalem basa Madura /’/ ban oca’ e mate kalaban konsonan /k/ padha eangguy. Angguyanna ta’ bisa eporop. Misalla, oca’ /pa’a’/ ta’ bisa etoles /pakak/ kalaban agente’e tanda /’/ daddi /k/. Salaen paneka, oca’ /to’ot/ ta’ bisa etoles /tokot/, /ta’al/ ta’ bisa etoles /takal/.

(4)     Oca’ /Kecelakaan/ paneka basa Indonesia dhari oca’ asal /celaka/. Dhalem basa Madura oca’ /calaka’/ se ngaolle tamba’an  /ka-an/, pas daddi /kacalaka’an/.