CARPAN MA LEO*
NYANDHANG taresna dhalem
atena Hamid ta’ bisa etop-totope. Nyatana langkong sapolo taon aba’na odhi’
kadibi’an. Sajjegga oreng towana
adinggal dunnya, Hamid apangrasa seddhi, acerreng, ta’ mare-mare. Ngadhebbi kaodhi’an
se talebat malarat.
Kalaban atane, daddi
kuli, ajaga toko
sampe’ daddi tokang ojek. Tape, kalakowanna
arassa ta’
akor ban hasel se ekaolle. Dul Mannan,
pamanna se ngapolong Hamid, daddi
neser ngabassagi ponakanna.
”Ba’na se nyaman abine bai, Cong,”
oca’na kalaban alos.
”Ta’
oneng, Nom, kaula apangrasa ta’ kowat
rassana. Kadiya anapakane tor laen-laenna. Aba’
laggi’ buto elmo se tenggi kaangguy nerrossagi
tengka se abineya,” jawabba ta’ kala alos.
”Cong, Cong, ba’na
ta’ usa mekkere bai. Pas
terrossagi neyatta jariya. Sengko’ yakin
hakkul yakin ba’na
paste bisa ngalakone.”
”Tape, kaula usaha
seggut ta’ olle hasel raja. Bandha pas-eppasan
kalaban bandhana. Aherra,
pas ta’ andhi’ somangat
kaangguy materros. Napa pole samangken pas nekka’agina hajadda sampeyan se abineya. Pastena
ta’ akor, Nom,” oca’na.
”Sengko’ yakin, Cong,
mon ba’na bisa abine. Dhaggi’ rajekke bakal
dhateng ate-gante. Ba’na kan tao, mon oreng abine reya rajekkena bakal
sajan etambai bi’ Guste
Allah,” nyatana eker-pekker
bi’ Hamid rassana bendher onggu oca’na anomma.
Katembang odhi’ kadibi’an, pole
ca-kancana bannya’ se ala-bala
ban andhi’ ana’. Tape
babine’ dhimma se bisa epadaddi
binena. Apangrasa onggu
apangrasa. Aba’na mesken
ta’ andhi’ oreng towa.
Rajana pangaterrona Hamid
nyatana bisa makala pekkeranna se ta’ yakin.
Tello are se tapongkor aba’na tatemmo
bi’ Mawarda, kancana e bakto SD. Rassa
taresna se ta’ kabuwa’ neng
atena laju ekabala’a.
Lebat pamanna
se anyama Dul Mannan,
mare asar Hamid mabangal
entar dha’ romana Mawarda wa’-dhuwa’an. Rassa jembar ta’ sapera onggu ekaandhi’
Hamid bakto nangale’e Warda
asapowan neng adha’na romana. Kalaban
ngangguy kodhung mera ngodha,
kalambi leres biru etambai
sarongnga se padha abarna biru, rassana nambai taresnana.
”Assalamu’alaikum,”
salamma Hamid matakerjet Warda se parappa’na asapowan.
”Eng...gi, wa...’alaikum
salam. Badha ponapa, Mas
Hamid?” oca’na sambi dhu’-nondhu’.
”Enggi,
reng seppo samangkeng badha. Ngereng
longgu ka dhalem, Mas,
Nom,” Hamid noro’ bunte’ e budhina Dul
Mannan kalaban
ate dag-dig-dug. Sambi toju’
neng korse, Hamid laggi’ ta’ nyaman neng-enneng
terro taowa dha’ jawaban
reng towana Warda.
”Assalamu’alaikum,” oca’na Bakir, reng towana Warda.
”Waalaikumsalam,”
jawabba Hamid sambi
nyeyom tanangnga.
”Ba, ropana dika, Le’ Dul,
ban ba’na Cong Hamid? Maddha longgu-longgu. Badha nape enggi
entar ka ka’dhinto?”
Bakir rassa ta’ ngarte dha’ maksodda tamoyya se
kadhuwa. Sabab, ta’ biyasana Dul Mannan
entar wa’-dhuwa’an
ban Hamid.
”Lerres ka’dhinto, Ka’. Se
kabidan badan kaula terro asilaturahmiya ka
panjennengngan. Kerrong. Rassana abit ta’ katemmo.”
”Padha, Le’, bula taker
para’ loppa’a dha’ dika sabab
abit ta’ tatemmo.”
”Saporana, Ka’, badan
kaula andhi’
karepotan e compo’.”
”Terros, badha
nape pole, ma’ pas lang-nyellang entar ka dhinto? Biyasana mon ta’
keng andhi’ tojjuwan dika rangrang
entar ka romana bula,” Bakir
terros nya’-tanya’an.
”Tojjuwan
se nomer dhuwa’ enggi
ka’dhinto, pola
badha edi dhari panjennengngan,
badan kaula terro menta’a Bing Warda kaangguy epacampo ban tang panakan se anyama Hamid ka’dhinto, Ka’,”
Hamid semmo todhus ngedhing nyamana esebbut.
Aba’na paggun nondhu’ ta’
bangal ngangka’ cethakka.
Banne rassa
jembar se badha neng mowana Bakir.
Tape coma bisa ngalodhu’
eber salem-dhalemma.
Saporana, Le’, banne bula ta’
narema’a dha’ panakanna dika. Tape, Warda
pon mare elamar oreng laen. Ja’ sakenga dika angadha’an
otaba bula pon tao dha’ maksodda dika ganeko sabellunna, pastena bula ta’
narema reng laen. Saporana onggu, Le’,
saporana.”
”Enggi, Ka’, ta’
ponapa. Tiggal badan kaula terrosa paleman. Kalerressan
samangken gadhuwan parlo laen,” Dul Mannan
ban Hamid terros apamitan dha’ Bakir. Maskena todhus arepanna
ta’ daddi kanyataan, Hamid nyoba’ terros masabbar. Apangrasa aba’na laggi’
banne takdirra andhi’a judhu.
Sabban malem, Hamid ros-terrosan anyo’on dha’ Gusti
Allah. Pangarep se tenggi aba’na duli nemmo judhu
kaangguy epadaddi binena dhari
odhi’ sampe’ matena. Ta’ loppa nyare
kalakowan tamba’an
kaangguy epadaddi sarat se abineya. Tape aba’na kadhang
ngaolle ca’-oca’ kasar dhari oreng laen baktona menta’a ana’na.
Sabab kameskenanna aba’na daddi panyandhek
pangaterrona.
”Panakanna ba’na oreng
mesken se la ta’ andhi’ oreng towa. Epakanana apa tang ana’
mon lakona ta’ jellas.
Sengko’ mon banne oreng
sogi ta’ kera narema manto,”
oca’na Jarwo
bakto Dul Mannan menta ana’na.
”Mon soal
rajekke bisa ekaolle modhiyan, Ka’.
Napa pole Guste Allah
ampon ajamin dha’ ka mahlokka mon alaksana’agi dha’
lalampannepon Kanjeng Nabbi,”
Dul Mannan terros nyare cara se bisa magampang
dha’ maksodda.
”Ta’ usa
maksa, Le’, sengko’
mon la ngoca’ ta’ endha’ paggun ta’ kera aoba. Coba’
akaca ka cangkelongan, akor enja’
ban tang ana’? Lebbi bagus
sateya mole bai nyare
ne’-bine’ laen se akor ban panakana ba’na jariya,” Dul Mannan
apangrasa epamaba darajadda.
Otamana panakanna, Hamid,
se egabay ca’-koca’an. Ta’
terro badha’a parkara raja, Dul Mannan
terros apamitan mole ka romana.
Hamid abasanna ta’ andhi’ somangat. Rassana bingung
nyare babine’ se
akor ban kabadha’anna. Bannya’ oreng towa
sateya se coma ngokor lalake’ dhari bannya’na arta,
katoronan, ban kaganthengngan.
Ta’ mekker dha’ramma bagussa ahlak
tor agamana. Hamid coma bisa pasra dha’ bagiyan
aba’na. Tape yakin aba’na bakal andhi’
judhu neng modhi are.
Baktona dhung-tedhungan,
Hamid temmo enga’ dha’ ka Syamsul, reng towana Sitti Arini, babine’
se laggi’ badha neng pondhuk. Nyatana badha sambungan la-bala
ban Hamid. Omorra dhu taon e ngodha. Kalaban
mantep Hamid ban Dul Mannan
paggun nyare usaha kaangguy madadiyagi Sitti
Arini daddi mantona.
Aba’na apangrasa, sajjegga
reng towana tadha’
omor, Dul Mannan se
epadaddi gantena. Saenggana tanggungan pastena kodu
elaksanagi, kadiya nyareyagi judhu. Teppa’
bakto malem lastare isa’, Dul Mannan
ban Hamid ajalan nojju
dha’ romana Syamsul se ta’ jau
dhari romana.
Bakto dhapa’
ka romana, Syamsul perak nalekana ngaonenge dha’ maksodda
Dul Mannan. ”Alhamdulillah,
sengko’ sateya aromasa ce’ perakka,
badha neyatan kaangguy
nyambung bala. Tape, Sitti
Arini sateya laggi’ badha e pondhuk. Insya Allah bulan
dhateng, teppa’ para’
tellasan, bakal elaksanagiya akad
nekana.”
”Amin,”
oca’na Hamid ban Dul Mannan
areng-bareng.
”Mator
sakalangkong, Ka’, ampon masteyagi judhu dha’ tang
panakan neka.”
”La dha-padha, Le’, sengko’
mator sakalangkong keya.”
Dul Mannan
ban Hamid la padha mantep kaangguy
maranta kabutowan dhalem
parlo neng bulan se bakal
dhateng. Ban ta’ eka-sangka, babine’
se emaksod, Sitti Arini, nyatana
mowana padha
ban babine’ se dhateng dhalem mempena.
”Alhamdulillah,
nyatana saka’dhinto kane’matan se
emaksod, Ajunan Guste,”
oca’na Hamid saampona lastare
akad neka. (*)
*)Mahasiswa
Instika tor ngabdi menangka katowana PAC
IPNU Lu’-Gulu’, Sumenep.
Carpan e attas epetthek dhari Jawa Pos Radar Madura (JPRM) 2016 eccaban Ahad, 3 April 2016
Tidak ada komentar:
Posting Komentar