Mateppa’ Tolesan Sosialisasi Lalu Lintas (5)

Lukman Hakim AG.

Salaen se ampon ejarba’agi e attas, badha dhuwa’ macem tolesan e banner e Jalan Panglima Sudirman, Pacenan, Bangakalan. Jalan paneka maso’ Kawasan Tertib Lalu Lintas (KTL). Gambar paneka ekala’ are Salasa, 22 Maret 2016.

 

(FOTO JALAN: Gambar paneka ekala' are Salasa tanggal 22 Maret 2016)

Foto Jalan, se atoles:

Ta’ langkong

Tretan.…!!!

Elarang parker e bherek jhelen

Manabi esalen ka basa Indonesia korang langkong daddi:

Dimohon

Saudara…!!!

Dilarang parkir di barat jalan

Manabi epateppa’ korang langkong daddi:

Ta’ langkong

Tretan…!!!

Ta’ kengeng parkir e bara’ jalan

Ngereng talektegi bidana:

(1)     Oca’ /tretan/ paneka eguna’agi oreng Madura bara’ (Sampang tor Bangkalan). Sabatara Sumenep ban sabagiyan Mekkasan aguna’agi /taretan/.

(2)     Oca’ /elarang/ e baris nomer tello’ korang teppa’ kaangguy maksod /ta’ kengeng/, /ta’ olle/, ban samacemma. Oca’ dhasarra dhari /larang/, dhalem basa Madura agandhu’ arte arga lalabanna /ta’ modha/ pas ngaolle  ter-ater /e/ daddi /elarang/.

(3)     Oca’ /parkir/ e baris se nomer tello’ banne basa Madura. Cara nolessa padhana basa Indonesia paggun /parkir/, maske koca’anna padhana se asowara /parker/.

(4)     Oca’ /bherek/ koduna etoles /bara’/. Dhalem ejaan 1973, /h/ gun eangguy sabakto-bakto asandhing sareng /t/ otaba /d/. Enggi paneka kaangguy noles keccap se kadaddiyan dhari /t/ se manabi ekoca’agi konco’na jila nyedding ka colo’ bagiyan attas. Akadi, /kottha/, /kotthe/, /kattha/, /akantha/, /pasthe/, ban samacemma (bsc). Sabatara /t/ se ta’ mabi etoro’a /h/ akadi, /paste/, /tengka/, torot/, /tope/, bsc. Akadi ampon ejarba’agi sabellunna, monyena /d/ dhalem basa Madura badha empa’ kalaban dhuwa’ carana noles. Rengkessepon, /d/ se manabi eoca’agi konco’na jila akadi ekekke’ gigi adha’, maka etoles ta’ mabi /h/ otaba paggun /d/ malolo. Sabatara, manabi ngoca’agi /d/ kalaban cara koncona jila buru ka bagiyan attassa colo’, maka etoles kalaban etoro’e /h/, daddi /dh/. Contowepon, oca’ /seda/ se ekoca’agi kalaban konco’na jila ekekke’ gigi’ adha’ gadhuwan arte /mate/. Sabatara /sedha/ se ekoca’agi kalaban cara konco’na jila buru ka attas agandhu’ arte /ba’na/. Salaen paneka /dara/ se ama’na nyamana mano’ sareng /dhara/ se ama’na barang akadi aeng se agili e badanna mahlok. Napa pole kaangguy noles lalabanna temor ganeka tadha’ keccap se asowara se padhana badha /h/-na. Daddi paggun etoles /bara’/. Bidana, horop /e/ kodu gante ka /a/. Paneka padhana oca’ /buja/, /gula/ se horop /a/-na akadi asowarna /e/ dhalem basa lesan.

(5)     Oca’ /jhelen/ koduna etoles /jalan/. Jajarba’annepon akadi nomer (4). Bidana, basa lesanna saamponna horop /j/ akadi se badha /h/-na. Sabatara dhalem basa toles paneka saongguna tadha’. Daddi paggun etoles /jalan/.