Mateppa’ Tolesan Sosialisasi Lalu Lintas (1)

Lukman Hakim AG.

MANABI lebat di Jalan Soekarno-Hatta, Bangkalan, bakal nangale banner sosialisasi lalu lintas. Tolesan e banner paneka aguna’agi basa Madura. Badan kaula asokkor tor moji dha’ Polres Bangkalan. Otamana dha’ Satlantas se ampon soddi aguna’agi basa Madura.

Saamponna ebaca, badha pan-saponapan se parlo epateppa’. Otamana nge-ngenge eja’an tor kasamporna’an monyena oca’ se eguna’agi (diksi). Sabab, tolesan paneka ta’ gunna coma tolesan biyasa. Empa’ macem tolesan paneka ngangguy paparegan.

Paparegan enggi paneka sala settong bagiyan sastra Madura se kadaddiyan dhari dhuwa’ baris. Baris se kabidan menangka samperan. Baris se kapeng dhuwa’ menangka essena. Sabban-sabban baris kadaddiyan dhari 8-12 keccap. Oca’ e ban-sabban aher baris, jugan e tengnga, maakor kalaban kabutowanna monye.

Badha se ngoca’ paparegan paneka menangka pantun kilat. Bidana, pantun kadaddiyan dhari empa’ baris. Dhuwa’ baris se kabidan daddi samperan. Sabatara dhu baris se kapeng dhuwa’ menangka essena. Sabban baris kadaddiyan dhari 8-12 keccap.

Abali ka banner lalu lintas e attas, dhari eja’anna asemma’an ngangguy eja’an 1973. Sala settong tandhana, ta’ ngangguy /â/, /è/, /ḍ/, tor /ṭ/. Badha empa’ macem tolesan dhalem pan-saponapan banner e jalan paneka. Salaen ka’dhinto badha dhuwa’ macem tolesan e banner e Jalan Panglima Sudirman, Pacenan, Bangkalan. Akadi, atoles:

(FOTO HELM)

Se a Lonca’a Takok Kotor Ban Delem

Se Nompa’a Motor Wajib Nganggui Helm

(FOTO LAMPU MERA)

Apelet De’ Pak Sakera

Terro Salamet Je’ Nyerobot Lampu Merah

(FOTO KACALAKA’AN)

Melle Oto’ Dhe’ Pasar Bengkalan

Lok Atoro’ Marka Bisa Kecelakaan

(FOTO LAMPU)

A Jemo Olor Eberik Maddu

Sepeda Motor Wajib Ngodi’i Lampu

(FOTO HELM: Gambar paneka ekala' are Salasa tanggal 23 Februari 2016)

 

Ngereng kabidi dhari Foto Helm, se atoles:

Se a Lonca’a Takok Kotor Ban Delem

Se Nompa’a Motor Wajib Nganggui Helm

Manabi esalen ka basa Indonesia korang langkong daddi:

Yang melompat takut kotor dan dalam

Yang naik motor wajib memakai helm

Manabi epateppa’ korang langkong daddi:

Se alonca’a tako’ kotor ban dhalem

Se nompa’a motor wajib ngangguy helm

Ngereng talektegi bidana:

(1)     Oca’ /alonca’a/ mastena ta’ epesa kalaban spasi. Oca’ dhasarra dhari /lonca’/. Ngaolle ter-ater /a-/ tor panoteng /-a/ se gadhuwan arte /bakal/, pas daddi /alonca’a/.

(2)     Oca’ /tako’/ banne /takok/. Dhalem basa Madura gunana /’/ sareng /k/ paneka bida, ma’nana jugan ta’ padha. Angguyanna ta’ bisa eporop. Misalla, oca’ /pa’a’/ ta’ bisa etoles /pakak/ kalaban agente’e tanda /’/ daddi /k/. Salaen paneka, oca’ /to’ot/ ta’ bisa etoles /tokot/, /ta’al/ ta’ bisa etoles /takal/.

(3)     Oca’ /kotor/ saongguna banne basa Madura. Dhalem basa Madura badha oca’ /gedda’/. Tape, badan kaula ta’ nyala’agi se aguna’agi oca’ /kotor/ kaangguy maakor sareng monyena /motor/ e baris se kapeng dhuwa’.

(1)     Oca’ /delem/ sala. Dhalem bahasa Madura, monye /d/ badha empa’ macem kalaban dhuwa’ cara naleka etoles. Manabi etalektegi, oca’ /delem/ se emaksod paneka /ta’ nengke’/, se teppa’ etoles /dhalem/. Monyena /d/ dhalem basa Madura badha empa’ kalaban dhuwa’ carana noles. Rengkessepon, /d/ se manabi eoca’agi konco’na jila akadi ekekke’ gigi adha’, maka etoles ta’ mabi /h/ otaba paggun /d/ malolo. Sabatara, manabi ngoca’agi /d/ kalaban cara koncona jila buru ka bagiyan attassa colo’, maka etoles kalaban etoro’e /h/, daddi /dh/. Contowepon, oca’ /seda/ se ekoca’agi kalaban konco’na jila ekekke’ gigi’ adha’ gadhuwan arte /mate/. Sabatara /sedha/ se ekoca’agi kalaban cara konco’na jila buru ka attas agandhu’ arte /ba’na/. Salaen paneka /dara/ se ama’na nyamana mano’ sareng /dhara/ se ama’na barang akadi aeng se agili e badanna mahlok.

(4)     E baris se kapeng dhuwa’ badha oca’ /nganggui/. Mastena etoles /ngangguy/ dhari oca’ /angguy/ se etanduggagi daddi /ngangguy/. Oca’ paneka padha sareng oca’ /songay/.