Mateppa’ Tolesan Sosialisasi Lalu Lintas (6)

Lukman Hakim AG.

 

(FOTO PAJANGAN: Gambar paneka ekala' are Salasa tanggal 22 Maret 2016)

Foto Pajangan, atoles:

Ta’ langkong

Tretan.…!!!

Rambu larangan

Bhenne pajhengan

Manabi esalen ka basa Madura korang langkong daddi:

Dimohon

Saudara.…!!!

Rambu larangan

Bukan pajangan

Manabi epateppa’, korang langkong daddi:

Ta’ langkong

Tretan.…!!!

Rambu larangan

Banne pajangan

Ngereng talektegi bidana:

(1)     Jajarba’an kaangguy baris nemer settong ban dhuwa’ akadi ampon esebbuddagi sabellunna. Oca’ /tretan/ paneka eguna’agi oreng Madura bara’ (Sampang tor Bangkalan). Sabatara Sumenep ban sabagiyan Mekkasan aguna’agi /taretan/.

(2)     E baris se kapeng tello’ badha baca’an /rambu larangan/. Menorot badan kaula, paneka basa Indonesia, banne basa Madura. Pramela dhari paneka, badan kaula ta’ mabi malanjang careta. Badan kaula ta’ ngarte’e menangka oba’an dhari oca’ dhasar /larang/ akadi se ampon esebbuddagi sabellunna pas ngaolle panoteng /-an/. Jugan, oca’ /rambu/ paneka banne se ama’na /tale/ dhalem basa Madura.

(3)     Oca’ /bhenne/ koduna etoles /banne/. Jajarbaanne akadi nomer (4) e Foto Jalan.

(4)     Oca’ /pajhengan/ koduna etoles /pajangan/. Asalla oca’ paneka dhari oca’ /pajang/ pas ngaolle panoteng /-an/, daddi /pajangan/. Basa lesanna lakar akadi badha /h/-na saamponna horop /j/. Nangeng palancar /h/ e eja’an 1973 coma eangguy noro’e sabagiyan /d/ ban sabagiyan /t/. Sabatara sabagiyan /b/, /j/, /g/ ta’ mabi etoro’e /h/.

Saka’dhinto sakadar catheddan badan kaula. Catheddan paneka jugan ampon epadhapa’ ka Kapolres Bangkalan se ekerem lebat pos lerres e are Sennen, 28 Maret 2016. Nangeng, ta pas padha kadi tolesan paneka. Catheddan paneka etoles banne sakeng nyareya salana oreng. Sakeng dhari estona ban mator sakalangkong dha’ Satlantas Polres Bangkalan se ampon ngangguy basa Madura. Malar moga badha’a gunana. Salam!