Ratosan Oreng Adduwan Maca Sanja’

(Foto-foto: Amin Bashiri)

ADDRENG: Mored naleka maca sanja' e Sanggar Bunyamin Disa Gilang, Kecamadan Bluto, Sumenep, Ahad (7/2).

SUMENEP – Ratusan oreng akompol e Yayasan Nurul Jadid, Disa Gilang, Kacamadan Bluto, Sumenep, Ahad (7/2). E are paneka epabadha adduwan maca sanja’ sareng Sanggar Bunyamin. Adduwan paneka kalampan dhalem settong papanggiyan Temmo Kerrong.

Ta’ sakone’ oreng se maca sanja’. Sakone’na badha 105 peserta dhari lembaga ban sanggar otaba komunitas. Kagiyadan paneka kalampan dhari pokol 09.00 kantos pokol 17.00.

Panitia nyadhiya’agi empa’ sanja’. Antara laen, Mattali dan Markoya anggidannepon M. Faizi, Sembahyang Rumputan anggidannepon Ahmadun Yosi Herfanda. Salaen paneka, Negeri Amplop tor Aku Masih Hafal Nyanyian Itu Gus Mus.

Lomba paneka ejuri’I tello oreng. Antarana, Mahendra, Amin Bashiri, tor Moh. Taufiq. Para juri mele ennem peserta daddi se mennang. ”Kagiyadan paneka daddi sala settong bukto ja’ seni, otamana sastra paggun odhi’. Tan-taretan se pondhuk gi’ bannya’ se addreng,” totorra Amin.

Nomer settong ekaolle Rifadah dhari Sanggar Permata, nomer dhuwa Moh. Rafiq dhari Sanggar Padi, tor se kapeng tello’ Sulhan dhari MA Aqidah Usymuni. Sabatara ka’dhinto arebban settong Samsul Farisi dhari Sanggar Peradaban, arebban dhuwa’ Sidqir Rahman dhari Sanggar Basmalah, tor arebban tello Fajar dhari Sanggar Kapotren. (Lukman Hakim AG.)