Pangarep dha’ Panjennengngan 1
dha’ Latifah
nangkonang adep-keddep
nalekana pajjar ampon ngombar
pangarep badan kaula
laggu’ gu-laggu mogella kaula
paneka
sopaja bisa nyambung dha’ ka
pancer atena panjennengngan
manabi gu-laggu dhaggi’ tadha’ ondhem
badan kaula madhanga’a tolesan
paneka
sopaja panjennengngan bisa ngoladi
e langnge’ ka’dhissa’
samoga’a salam dhari sonar are paneka
ta’ ebales kalaban ondhem
se nyapcap aeng mata
Desember 2015
Pangarep dha’ Panjennengngan 2
badan kaula abungu dhari pasarenan
se etata kalaban sottra lesanna ajunan
se makon dha’ abdina
sopaja’a asaren dhari parasa’an
ka’dhinto
banne abdina ta’ poron masarena parasa’an
paneka
tape badan kaula tako’.
lamon dhaggi’ e nalekana sobbu manjing
tor nyarenge
panjennengngan ta’ lebbi bagus dhari
pangareppa abdina
badan kaula gun ngarep bisa mabunga
panjennengngan
e bakto bingong
ban ta’ terro nyellemma kalaban
kaseddhiyan
Januari 2016
Pangarep dha’ Panjennengngan 3
Jang-bajanganna panjennengngan
atapa e atena abdina
Tor madhateng kapper
Se ngabber dhari rassa paneka
Pangarep badan
kaula manyettonga rassa
Se ngepkeppe dha’ sadunnya alam
2016
*)Amin Yazid, angguta Sanggar
Padi dan Mangsen Puisi e Pondhuk Annuqayah Lubangsa Selatan, Lu'-Gulu', Sumenep.
Sanja' eattas epetthek dhari Jawa Pos Radar Madura (JPRM) eccaban Ahad, 7 Februari 2016.
Tidak ada komentar:
Posting Komentar