LAKE'-BINE' PADHA BAI: Pan-saponapan ngangodhadan ngantos giliran maca'a sanja' e Karaton Sumenep, Ahad, 21 Februari 2016 (Foto Lukman Hakim AG) |
SUMENEP – Sowarana
oreng reng-cerrengan ekaedhing ce’ lantona dhari Karaton Sumenep, Ahad (21/2). Sabab,
bakto paneka badha adduwan oreng maca sanja’. Sanja’ se ebaca badha e dhalem
buku Ketam Ladam Rumah Ingatan.
Buku paneka aesse
205 sanja’na 41 ngangodhadan Madura. Paleng towa tello polo taon. Umummepon dhari
Sumenep. Bang-sebangnga oreng noles lema sanja’. Buku paneka epakalowar Lembaga
Seni dan Sastra Reboeng, Jakarta, 2016.
E are paneka aratosan
seniman dhari man-ka’dhimma akompol e karaton ngedhingagi jajarba’anna Jamal D.
Rahman tor M. Faizi. Jamal ngatorragi pamanggina nge-ngenge bannya’na sastrawan
e Madura, otamana e Sumenep. Jamal ngaeddagi sastra sareng bannya’na pondhuk
pasantren.
Sabatara Faizi
ngatorragi ja’ sastrawan, kodu oneng dha’ ponapa’a bisaos se etoles. Oreng noles
sanja’ jugan kodu oneng elmo basa. Otamana, basa toles. Sabab, tolesanna bakal
ebaca oreng.
Sabellunna Jamal
tor Faizi abu-dhabu, badha tandang mowang sangkal dhari Sanggar Pottre Koneng. Saamponna
rarembagan paneka lastare pas epabadha adduwan maca sanja’.
E bakto paneka
bannya’ ngangodhadan se noro’. Ta’ usa paksa. Tadha panedda’na. gan settong
ngantos giliran sambi ngarebbunge oreng laen se parappa’na maca sanja’. Badha se
acerreng, badha se adharak, badha se arakrak, badha se ngejung, ban badha se
asowarana alos. (Lukman Hakim AG)
Tidak ada komentar:
Posting Komentar