DADDI TATENGGUN: Seniman Language Theatre Indonesia dhalem performance art e Pasar Minggu Sumenep, Ahad, 14 Februari 2016 (Foto Amin Bashiri) |
NGERRAY: Reng-oreng se nenggu performance art Language Theatre Indonesia moto ngangguy hapena bang-sebang (Foto Amin Bashiri) |
SUMENEP – E
jaman mangken, ba’ gi’ badha’a keban se anyama babi e Madura? Napa pole keban
paneka pas badha e kottha, banne e alas otaba e kampong-kampong? Rassaepon cora’
ta’ maso’ akkal manabi eker-pekker.
Nangeng, lerres
e Pasar Minggu badha pan-saponapan babi ajalan, Ahad (14/2). Babi-babi paneka
ajalan dhari pasar e Jalan Dr Soetomo, Pajagalan, kantos ka Taman Bunga (TB)
otaba lon-alon. Babi paneka banne keban ongguwan.
Babi paneka
aropa’agi parsemmon seniman dhari Language Theatre Indonesia. Para seniman agalicek
pekkeranna oreng jaman mangken se ajalane kaodhi’an se katon tadha’ tojjuwanna.
Salaen ganeka, kalaban babi-babi paneka daddi paenga’ bidana oreng ban keban se
gun emo’ moso kakanan.
”E jaman mangken
bannya’ oreng ajalane kaodhi’ se kadhang ta’ padha ban atena. Coma daddi
messin, ngakan lambanna, ta’ mekker lanjang ka budhina,” ca’na Amin Bashiri
dhari Language Theatre Indonesia ka Serrat
Pote.
Salaen paneka, performance art paneka kaangguy tandha
maso’na ponapa’a bisaos ka kottha. Reng-oreng jaman mangken bannya’ se nganggep
kottha langkong sae. Oreng kalaban babatek kadi ponapa’a bisasos mangkat ka
kottha adina disana.
Sabatara disa, kalaban
sadaja kaodhi’anna, eanggep ta’ maju. Pramela, ta’ sakone’ oreng se nojju
kottha. Nangeng, menorot Amin, Language Theatre Indonesia gadhuwan
pamanggi laen otaba tabaligga. Disa aropa’agi kennengngan se sae. Bannya’
lalampan se sae.
”Sae dhari
bannya’ hal. Sae dhari tatakrama, andhap asor, kasehadan, ban salaenna. Nangeng,
mangken bannya’ oreng se lata, ngabas kottha katon tadha’ panyaleyanna,” oca’na
pole. (Lukman Hakim AG.)
Tidak ada komentar:
Posting Komentar