Janjina Terminal

CARPAN HASMIDI*

Terminal

DHAUN kornes lelor agaletteng ka penggirra ranca’ se nyangketthem ka bungkana. Sabban dhaun se ella mangoneng gaggar gan settong te-ganteyan. Sabban-sabban se gaggar jareya langsung etarema po-sapo lente saajuman.

Epoket ngangguy belledda pappana janor se ekala’ dhari padduna terminal bis. Lentena ekala’ dhari bungkana nyeyor se padha. Dineng nyeyorra tor kadhang epenta pa’ kapala se ngobasane terminal. Reng-oreng se badha neng terminal bisa nyambit Pa’ Nong. Dhari nyama aslina Ainor Rasyid.

Pa’ Nong lakar penter ngator ponggaba se laen se anyaman baba’anna. Se ta’ bendher alalakon, Pa’ Nong ta’ kera mekker pole kaangguy neggur tor apareng babulangan se lerres. Pa’ Nong ta’ endha’ mon gun coma marenta malolo, gigir, ban so’-ngoso’ ban-sabban apa se elakone baba’anna se tasala otaba ngalakone settong kakalerowan.

Oreng sanget ajaga dha’ bakto. Bila napa’ dha’ baktona istirahat kodu istirahat. Bila napa’ dha’ baktona asalat, kodu asalat. Ja’ sampe’ badha settong oreng se ta’ asalat. Pa’ Nong sanget mangga mangalle tugassa oreng se ta’ asalat. Kabadha’an ponggaba se laen acora’ congcong se eteggu’ matana. Ta’ bangal alaban manabi ampon pajat kalero.

Bab kaberseyan, Pa’ Nong ja’ tanya’agi pole. Oreng se neggu’ po-sapo neng terminal reya ta’ sakone’ mon ngabassagi kabadha’anna terminal jareya. Pa’ ratos masagi aropa’agi okoran terminal salaenna pagar lowar ban tempadda parkiran ponggaba se badha neng terminal.

Kasapolo oreng se neggu’ bungkella po-sapo lente, tang nyama badha neng biriyan dhi-budhi. Neng nomer sapolo nyamana Addul. Tong-settongnga nyama se etoles neng dhadha se kangan e kalambi, tadha’ terrosanna pole. Tadha’ to’-bunto’an apa pole. Ta’ padha ban se laen.

Dhari se kasapolo oreng jareya padha ta’ andhi’ bunto’na nyama se badha neng dhadhana ponggaba se toju’ neng adha’na kacana komputer. Neng mejana se abarna soklat towa.

Mon ekarena dhari awwalla sengko’ se badha e terminal reya ella ballung taon lebbi. Sajjegga sengko’ kalowar dhari sakola’an dhasar neng Pandhiyan. Banne sakeng ta’ andhi’ se ekabiyaya’a kaangguy nerrosagi ka sakola’an tingkat pertama ban tingkat aher. Sakeng sengko’ laggi’ tos-ngangtos ban re-sareyan.

Janji

Ballung taon reya ta’ sakejja’ baktona. Ebu sampe’ amoso kalaban ga-tatangga se badha neng penggirra roma. Majadhi’ ban tan-taretanna ebu nyorot, ta’ manyemma’ pole ka roma. Pangrasa sossa ella aoba on-laonan. Elang noro’ bunte’ pajalanna Emba Hesyam ka romana Nom Osman, taretana ebu se paleng bungso.

Pajat sogi. Motorra se bagus tatello’. Laen bikep ban ettregga ban bis mini se ngokore jalan sabban are. Bila mangrib, romana Nom Osman ta’ kala ka terminal se ngantos panompangnga.

Ebu sempat keya ekoca’ gila mon reng-oreng. Pola oca’ jareya se mamengo taresna majadhi’ ban tan-taretana se laen, tamaso’ keya emba.

Tayyib, nyamana eppa’. Dhari terminal reya mangkat ka Kalimantan kaangguy nyare pangoreban se lebbi samporna. Janjina gun coma sataon eppa’ se alakowa e dhissa’. Tape sampe’ sateya eppa’ ta’ dhateng.

Janji jareya se eteggu’ ebu sampe’ sateya keya. Dhari jareya ebu sampe’ ta’ eberri’ le-melle neng dhimma’a bai. Barung langgananna ngamosowe ebu. Bila neng pasar ebu ta’ nemmo teppa’ ka reng-oreng se padha adagang. Sakeng ta’ sadunnya oreng se ngamoso ebu.

Sempat keya badha kabar ja’ eppa’ ella akabin pole ban reng Pandhiyan se badha e dhissa’. Sampe’ keya badha oreng ngoca’ eppa’ ella tadha’ omor saellana abit nyandhing panyake’ taonan. Roma sake’ dhimma’a bai oca’na ella ta’ sanggup kaangguy nambai panyake’na eppa’.

Sampe’ aherra egiba pate. Tape ebu ta’ gellem partaja dha’ caretana reng-oreng. Se gun badha neng pekkeranna eppa’ bakal abali nekkane janji se ekoca’agi bellung taon se tapongkor neng terminal.

Polisi

Ella tello are polisi bannya’ lir-baliran e terminal. Nyambi tenggar se lanjang. Badha keya se nyambi tenggar cek-kocek. Dhari laggu sampek laggu pole. Polisi jareya paggun atogu neng terminal. Te-ganteyan sabban arena.

Ta’ malolo toju’ neng pos. Tape badha keya neng kantorra Pa’ Nong, pangantossan, pakarcisan, ban pawal-juwalan. Sampe’ neng adha’na WC badha keya. Poko’na, sakabbiyanna kennengngan ella paggun badha polisi se atogu.

Enja’ apa keya se etoguwi. Acora’ tadha’ se taowa. Pola Pa’ Nong tao masalana polisi se badha e dhinna’ reya. E bakto aberse’e e adha’na pakarcisan, olle ka pa’ arena, Addul epatoju’ sala settong polisi se abadan soga’, gerger, aesse neng korse se ngadhep teppa’ ka adha’na oreng se ajaga.

E adha’na badha kaca se ngandheng berse ce’ bennengnga. Alobang sakone’ sajuluwanna tanang. Ngabas paraba’anna bai ella mangetegan nyale. Addul kene’ tamonena. Daddi reng tako’ ngadhebbi polisi jareya.

”Sampeyan ta’ parlo tako’ ka kaula. Pabiyasa saos. Kaula manossa jugan akadhi sampeyan. Ngereng barengnge dan kaula, longgu,” satengnga mesem dha’ Addul se mergem bungkella po-sapo lente.

”Enggi, Pa’,” rassana badha se agedder neng le’erra Addul.

”Sampeyan ampon saponapa taon badha neng ka’dhinto, Nom?”

”Korang langkong ampon ballung taonan, Pa’.”

Nyopet

Langnge’ ngabiru berse neng attassa genteng. Angen nyalesser maso’ dhari candhila se abukka’ sakone’ etambai kalaban kipas se athek-kethek ka kangan ban ka kacer ta’ bu-ambu.  Polisi se badha neng dhalem kantor jareya padha adhang-galindhang.

Settong coma toju’ jimet neng adhebba Addul. Oreng lake’ se asongot marong, abasanna angkreng. Angko. Addul gan sakone’ maonga’ mowana. Badha bekkas barna bungu neng attassa alessa ban pepena kangan-kacer.

”Omor?”

”Dhupolo, Pa’.”

”Arapa ba’na ma’ nyopet?”

”Saporana, Pa’, tadha’ neyat neng atena kaula kaangguy nyopet. Banne sakeng kaula korang obang kaangguy apareng dha’aran dha’ reng seppo kaula. Nangeng, kaula terro manggiyana oreng seppo lake’ kaula. Pola dhari jalan paneka kaula bisa apanggi sareng reng seppo lake’. Saestona kaula ta’ nyopeda eppa’ neka. Kaula gun coma terro onenga dha’ asma se badha neng KTP-epon. Dhari paneka kaula bisa emot dha’ asmana oreng seppo kaula. Manabi robaepon kaula ampon kalep. Ebu gun marenge asma’epon ja’ eppa’ kaula Tayyip.

Songennep, 2016

*)Guru e SMAN 1 Bluto ban ajar e Lembaga Kajian Seni Budaya PANGESTOH Net_Think Community Sumenep.

Carpan eattas epetthek dhari Jawa Pos Radar Madura (JPRM) eccaban Ahad, 7 Februari 2016