Gun Settong Tadha’ Pole

BUKTENA ORENG MADURA: Toko kalaban nyama basa Madura e Mlaja, Kacamadan Bangkalan (Foto Taufikurrahman)

 ORENG Madura paggun esto ka basana. Badha jugan se todhus abasa Madura. Nangeng gun sabagiyan, otamana se badha e kottha-kottha. Sabagiyan se laen gadhuwan pangaterro kaangguy meyara basa se ampon kalampan dhari basa seppo.

E ka’dhimma’a bisaos oreng Madura rassaepon paggun bisa abasa lesan. Kalaban sarat ta’ buwi. Sabaligga, dhalem basa toles gi’ ta’ nanto. Maske oreng gapaneka tenggi sakola’anna. Nangeng, masalana, banne bisa otaba bunten. Kadi ponapa nombuwagi pangaterro dhalem ate kangguy bisa noles.

Manabi para maos badhi ka makammepon Ke Mat Halil (Syaichona Cholil) Bangkalan bakal manggi’i toko anyama kalaban basa Madura. Toko paneka badha e temorra asta. Lerres e penggirra lorong saamponna partellon. Toko paneka badha e Kalurahan Mlaja, Kacamadan Bangkalan.

Nyamana toko paneka: Toko Adhe’ Pole Gun Set Thonk. Tolesan paneka esoson tello’. Paleng attas atoles /toko//. Baris se kapeng dhuwa’ atoles /Adhe Pole/. Se kapeng tello’ atoles /gun set thonk/.

Tolesan paneka langkong sae manabi epateppa’ menorot eja’an se ampon kappra. Saamponna eoba, tolesan paneka daddi: Toko Adha’ Pole Gun Settong. Oca’ /adha’/ same sareng oca’ /tadha’/.

Enyamae /tadha’ pola gun settong/ pola polana jau dhari barung otaba toko se laen. Ka bara’ jau. Ka temor jau. E adha’a toko, aella’ lorong, paneka gun badha makam. E temorra jugan koburan.

Cara se elampa’agi se gadhuwan toko paneka patot etero. Menangka oreng Madura, rassaepon langkong sae manabi aguna’agi basana dibi’. Cara ka’dhinto aropa’agi sala settong bujut nyata pangabaktena aba’. Salam (Lukman Hakim AG)