CARPAN MA LEO*
PANGRASANA neser dha’ taresnana Sitti
Aisyah, Hasan temmo nyanggupi pangaterrona. Babine’ alsi Polo Ra’as se talebat
sogi oreng towana. Andhi’ somber mennya’ se kalonta dha’ tana Jaba tor salaenna.
Tape, kaodhi’an se ealame Hasan ce’ bidana.
Aba’na misken, malarat, ban coma bisa ngarep rajekke dhari hasel tanena embu’na.
Eppa’na la adinggal dunnya bakto Hasan laggi’ kene’. Re-saarena seggut ta’ cokop
sampe’ kalagguwanna.
Kasebbut careta,
mola katemmo lu-galluna, Hasan ban Sitti Aisyah padha mondhuk neng Raudhatus Sibyan,
Kottha Tuban. Bakto ka’dhissa’ Hasan daddi pangurus pondhuk. Jugan ngajari ngaji
ban kursus nahwu-shorrof. Kapenterranna
Hasan se badha nyatana bisa notope kakoranganna, maske rangrang ekerem embu’na.
Sakeng penterra
Hasan, Keyae Sukri kadhang makonan kaangguy makkele molang ajiyan ketab neng
santre bine’an. Saamponna
olle tello bulan, ta’ eka-sangka, babine’ se dhari Polo Ra’as, Sitti Aisyah, andhi’ rassa terro dha’ Hasan. Tape, aba’na apangrasa
todhus se abala’a kalaban jujur. Kalaban pangaterro se talebat raja, Sitti Aisyah
makerem sorat dha’ Hasan lebat ale’na se gi’ kene’.
Tacengnga’ onggu
rassana Hasan bakto narema kereman sorat se ta’ eka-sangka sabellunna. Aba’na rassana posang
nantowagi jawaban se saongguna. Tape, saamponna Keyae Sukri marenge jalan
kalowar, atena temmo laggang.
”Ba’na, Cong, ta’
usa kobater masalah judhu. Omorra ba’na la tello polo taon. Andhi’ kamampowan nyare
rajekke. Elmona la cokop. Ella pas terrossagi. Ta’ usa kobater pole.
Katembang ngalakone ma’seyat se jellas olle seksa dhari Guste Allah e are keyamat,”
Keyae Sukri adhabu kalaban alos.
”Tape, abdina ta’ ngaonenge
babatekka ka’dhissa’, oreng seppona, napa pole kabadha’an odhi’na,” jawabba Hasan
sambi nondhu’.
”Sitti Aisyah
rowa se asli dhari Polo Ra’as. Tengkana ce’ bagussa. Elmona dhalem. E pondhuk
daddi ustada. Insya Allah mon orengnga
enga’ jariya pastena oreng towana ta’ kera jau kabadha’an ban tengka gulina.
Sengko’ a-dukung dha’ ba’na.”
”Mator sakalangkong,
Keyae. Insya Allah e bulan Rasol se bakal
dhateng abdina aneyat alamara dha’ oreng towana.”
”Alhamdulillah bagus onggu neyatta ba’na,”
tor-cator antara Hasan muso Keyae Sukri etotop kalaban ngenom biddang areng-bareng.
***
Jembar onggu
rassana Sitti Aisyah saamponna tao Hasan bakal alamara dha’ oreng towana.
Sabban arena, ta’ tobang se asokkor dha’ Guste Allah. Pangaterrona nyata
etekkane onggu. Tape, laen kabadha’an ban Hasan. Pekkeranna atamba ta’ nanto.
Tanggungan napaka
se daddi sababba. Apangrasa onggu aba’na oreng misken tadha’ reng towa lake’. Coma
embu’ se la towa omorra. Aneyat bakal daddiya mantona oreng sogi enga’ dhalem
bannya’ careta. Nyatana oreng misken taona coma ero-soro malolo mon amanto
oreng sogi. Polana ta’ andhi’ arta se bisa eambuwagi dha’ mattowana.
Barra’ onggu pangrasana
mekkere kabadha’an se bakal dhateng. Bakto gimeng pekkeranna, Hasan temmo enga’
dha’ dhabuna Keyae Sukri. Saengga aba’na rassana andhi’ kakowatan pole kaangguy
ngadhebbi coba’an. Apa pole oreng towana la padha saroju’.
Teppa’ e are Rebbu
neng bulan Rasol. Hasan abareng anomma, Sutarji, mangkat dha’ Polo Ra’as.
Ontongnga, kabadha’an
alam teppa’ mosem nemor. Parao
se etompa’ ta’ elanyo’ omba’ kadiya e mosem nembara’.
Nyalter kalaban
pesse Rp 50.000 se daddi ongkossa. Panas are se nyata manggang bume ta’
ekarassa bi’ Hasan. Sabab, pekkeranna
coma settong dha’ramma cara se abineya Sitti Aisyah bakal daddi kanyata’an.
Saamponna dhapa’
dha palabbuwan, Hasan temmo eamba’ ban oreng pasorona Sobri, reng towana Sitti
Aisyah. Disa se emaksod nyamana Karoppo se kalonta andhi’ karajinan tanang agabay teker dhari pandhan. Ollena bisa ejuwal sampe’
manca nagara.
E parjalanan
bannya’ nangale lake’-bine’ se
nganggit dhaun pandhan kalaban ngastete. Hasan rassana lebur ngabassagi kabadha’an jareya. Bakto
dhapa’ dha’ bangunan atingkat dhuwa’
kalaban teras lanjang se ana-barna, Hasan ban anomma esoro toju’ neng korse
kaju se aoker. Asli gabayan Disa Kardhuluk.
”Assalamu’alaikum,”
lalake’ tenggi lempo ngangguy sarong thak-kothak nyapa kalaban
ngos-malengos.
”Waalaikum salam,”
jawabba Hasan ban anomma areng-bareng sambi nyeyom tanangnga.
”Ropana ba’na
se anyaman Hasan se ekacareta ana’ bula, Aisyah?”
”Enggi, Pa’, lerres,”
jawabba sambi dhu’-nondhu’.
”Badha apa ma’ dha’anna’?”
se etanya’agi Sobri adaddiyagi Hasan tacengnga’. Pekkeranna molae ta’ nyaman.
”Badan kaula sareng
kacong ka ka’dhinto coma terro masteyagiya rembak dha’ reng seppona Aisyah. Sabab,
kacong ka’dhinto andhi’ pangaterro adaddiyagiya pottrana panjennengngan daddi binena,” Sutarji nyela oca’.
”Hem, ba’na, Cong,
apa lakona sateya?” Sobri atanya pole.
”Abdina laggi’
ta’ manggi lako. Tape, insya Allah manabi sampe’ ako-bengko abdina bakal nyare usaha se daddiya
balanjana.”
”Terros lakona oreng
towana ba’na apa?”
”Abdina coma
andhi’ oreng seppo bine’. Reng seppo lake’ ampon tadha’ omor. Samangken lakona sakadar
atane.”
”Cong, mon gun
lako jareya se bisa eambuwagi ba’na, ella ja’ ngal-mabangal entar dha’enna’. Sengko’
ta’ ngabutowagi oreng penter tape misken otaba gantheng tape malarat. Ta’ kera
bisa kapenteran ban kaganthengngan adaddiyagi kaodhi’anna tang ana’ jembar. Coma
pesse, arta, ban kasogiyan se bisa matekka. Ella duli nyare se laen. Ba’na ta’
kera etarema daddi tang manto.”
”Pa’, Ma’, Sampeyan
adhabu dha’ neka ka Mas Hasan?” Sitti Aisyah temmo la badha e labang.
”Ba’na ta’ usa
ro’-noro’ cacana reng towa. Kassa’ ka dhalem entar ka kamarra,” penduna reng towana
adaddiyagi Sitti Aisyah buru sambi nges-tatanges. Hasan se ngabassagi coma bisa
nondhu’ ta’ metto oca’. Aba’na apangrasa sala dhalem mele bakal babine’. Banne
adaddiyagi jembar ka atena, tape coma loka. Loka dhalem se ta’ adhara. (*)
*Mahasiswa Instika
Lu'-Gulu', Sumenep
Carpan eattas epetthek dhari Jawa Pos Radar Madura (JPRM) eccaban Ahad, 28 Februari 2016
Tidak ada komentar:
Posting Komentar