Sanja’na Moh. Dasuki*

Agandhu’ Tengka

E sabban arena

Ate arassa eseksa

Eseksa kalaban kabar se agandhu’ tengka

Ngeba sala akaton ta’ aromasa

Ngeba dusa akaton tadha’ Se Kobasa

            Onggu-onggu kaodhi’an se ta’ samporna

            Ngadhebbi tengka banne lalakon se dhammang

Bila sakone’ sala sakabinna ngera banne manossa

Saengga ate arassa malo se saraja-rajana

Saellana tatangga-bala ngera lopot atengka

Oca’ tor basa ta’ duli eatoragi

Ngantos bakto se bakal agiba tennang

Ban ta’ agiba rassa kata’naremaan

Asabab pegga’na oca’ seekera semma’

.........................

Raja Dusa

Dha’ ebu

Ebu, pello koneng ajunan nyapcap ta’ ekarassa

Meyara abdina se ta’ kennal rassa paya

Maske ate ajunan akarettek lesso

Tape, paggun epaksa kaangguy abdina se bungso

            E are mangken abdina aromasa

            Enga’ dha’ ajunan se ekorbanagi

Sadaja pekkeran ban ora’

Abdina raja dusa

            Dha’ ajunan tor Se Kobasa

            Nga’-enga’ dha’ kalakowan sala

E bakto dullu se nyeksa

............................................ 

Ngampet Oca’

Pekkeran rodhek

Pekkeran posang

Pekkeran salsal

Menangka kaodhi’an ecampor taresna

Se ngeba cem-macemma parkara

Aba’ ngampet oca’ aon-taon

Ngantos bakto se badhi majembar

Aba’ kobater tako’ dha’ oca’na reng laen

Se bakal duli mapaste

............................................ 

Nemor Kara

Saellana are tarek ban bun-embunan

Cethak aonga’ mandeng dha’ langnge’

Mata ngecer colo’ aserro panas

Capcabba pello ngalecer ta’ egaressa

Ngeba tandha dhapa’na taon nemor kara

Ngabasagi jalan aspal, teggal e saba, aeng e tase’ ban sakabbinna kaodhi’an

Agejjer etangalena mata

Somber kerreng

Cem-macemma tombuwan magaggar dhaun ban makerreng bungka

Kantos marekong manossana.

Saengga manossana aromasa ta’ kowat

Bila e sabban arena odhi’ kapanasan

*Lulusan SMP1 Dungke', mondhuk e PP Annuqayah 

Epetthek dhari Jawa Pos Radar Madura (JPRM) eccaban Ahad, 8 Oktober 2017