Tanggung
E bakto ojan se’-rese’ bacca
Badan cellep makero’ kole’
Bila enga’ bakto atemmo
Rassa jembar kalowar
Mamesem bibir se kerreng
Masse aeng es agaggaran
dhari ondhem se pote
cellep tape makobassa
Bakto Sobbu
Jaga gu-laggu gi’ ajam ta’ akongko’
Sowarana lospeker gi’ ta’ amonye
Se ekaedhing gun monyena aeng se agili
Ngesse’e jeddhing se asat
Ora’ kerker se jaga’a
Malempo pole mata se cope’
Saengga abali pole, nerrosagi mempe se gi’ ta’ mare
Pae’na Odhi’
E bakto are tacabbur e bara’na Polo Madura
Oreng tani mole kalaban lesso ban paya
Bila enga’ dha’ kalakowan e Madura se sara
Dhu ta’ terro se alakowa
Badan se alako taker aoba sake’ kabbi
Bakto malem menangka bakto se teppa’ kaangguy tedhung
Maabali ora’ se kerker ban kepak kabbi
Masiap dha’ kalakowan se gi’ ta’ mare
Jugan bakto dha’ oreng Madura arangke’ mempe
Amempe kalaban kanyata’an se gi’ ta’ paste
Serbegga Pekkeran
Sompek ban enger ta’ bisa nyengla
Se bannya’ coma caca se tadha’ gunana
Malesso ka oreng se ngoladi
Matengel ka oreng se ngedhingagi
Mata’perna ka pekkeran se bindheng
Maserbek ka badan kabbi
Neyat asakola tape gun afitna
Se elakone coma tedhung nalpe’ ka bangkuna
Ajail ta’ ekarassa, sakeng nyaman gallu’ tedhungnga
Nagara Indonesia
Indonesia ma-kagum ka mata
Sonarra lampu kellap-kellip badha e kottha
Motor-motor ajalan makalowar sowara
Masse la ekoca’ badha e bara’na
Kennengngan rato saleng nyapa
Apa pole bila lebat e Jaba
Jalanna rosak ban sara
Tape kodu teptep asokkor ka Se Kobasa
Saengga ate asompa
Ja’ Indonesia sogi kalaban budhaja
Epetthek dhari: Puisi Madura Fathor Rosi*
Tidak ada komentar:
Posting Komentar