Peye’ Kendhuy

Yulistiana Ningsih

BANNYA’ cara kaangguy mayaman rassa. Bannya’ cara kaangguy maelang sassa busen. Bannya’ jugan cara kaangguy masamporna odhi’ ala-bala. Odhi’ kalaban caccel menangka sala settong cara kaangguy masamporna odhi’ paneka. Caccel dhalem basa Indonesia ekoca’ kreatif.

Caccel dhalem pan-saponapan hal daddi dhasar kaangguy majemjem odhi’ ban ajaga buget patenna odhi’ ma’ olle ta’ atokaran, ta’ akareggingan ban ta’ apeggellan. Sala settong caraepon enggi paneka kalaban macaccel abetthek dha’aran, mabannya’ rassa tor mabannya’ barna maske dhari barang se ta’ saponapa argana. Bannya’ macem tor bannya’ rassa dha’aran kaangguy masae eber dhalem adha’ar.

Akadi se elampa’agi sareng para ebu neng e kampong Lembana, disa Kombang, Talango (Polo Poterran). E ka’dhissa badha dha’aran se ce’ kalontana. Enggo paneka Peye’ Kendhuy. Aponapa me’ Peye’ Kendhuy? Sabab, kendhuy menangka sala settong hasel para bapa’ se majang otaba ajurung ka tengnga tase’.

Pramela dhari ka’dhinto, para kaom ebu e kampong gapaneka ta’ mabi emo’ pola kaangguy aola dha’aran e bakal ebetthek se eatorragiya ka rakana. Enggi paneka kalaban macaccel ola’anna kalaban ngola kendhuy daddi dha’ran se sae. Salaen egoring kendhuyya bisaos otaba etepak, kendhuy bisa jugan eola daddi dha’aran obana rassa. Enggi paneka kalaban ebadi peye’. Pas kasebbut daddi Peye’ Kendhuy.

Baragat tor palappana:

1. sadhiya’agi teppong berras
2. teppong kanji
3. oto’ matta
4. dhauna jerruk porot
5. kendhuy / terri pote
6. pathena nyeyor
7. babang pote
8. kencor
9. buja
10. micin (bitsin)

Dhari pan-saponapan palappa tor bahan kasebbut bisa epadddi peye’ kendhuy kalaban cara ngola:

1. teppong berras e campor sareng teppong kanji
2. kacang ekerra’ ne’-kene’;
3. dhaun jerruk eeres epaalos;
4. saterrossepon babang pote sareng kencor epaalos asareng, parenge buja ban micin sacokobba;
5. saampona alos parenge aeng tor totta’ asareng pathena nyior kadhalem badda se a esse teppong. Ja’ kantos loppa parenge kendhuy se ampon e sadhiya’agi. Gulek sampe’ rata.
6. manabi ampon e rassa cokop tor seddeng adunanna, ngereng pas guring ka minnya’ e dhalem bajan se ampon e panassagi sampe’ e karassa garing.
7. peye’ kendhuy ampon siap e atorragi. Rassaagi nyaman tor armos epon gigi’anna.

Sapaneka’an dhari badan kaula. Malar apeguna’a dha’ ka para ebu tor le’-ale’ paraban kaangguy mabannya’ pangaonengan bab bettheggan e dhalem dhapor. Salam! (kim