Na’ Poto

Carpan Afifah Romdiyah

E SETTONG disa odhi’ sakompolan ebu ban ana’ se ta’ kapondhut eppa’ dhari omor gi’ badha e tabu’. Namong settong ana’ paggun daddi reng bene’ se ekaleburi bala tangga polana ngaandhi’ tengka bagus ban ngargai dha’ oreng seppo bene’na.

“Rahma, ba’na lagguna ngater sengko’ ka pasar gu-laggu.“

“Enggi, Bu, kaula sobung lalakon. Lagguna are minggu“

“Pasan, marena abajang ladding kala’ e dhapor ban babang e balebbek kombi’. Sengko’ makadhalemma embi’na gallu, are la sorop.”

“Gun ekombi’a ta’ eeresa gi, Bu?”

“Dina kombi’ gallu pas bacco”.

Rahma reng bene’ se toro’ oca’ abakte ka oreng seppona. Dhalem re-arena gun abanto reng seppona. Salaen abakte ke oreng seppona, Rahma ngabdi neng e settong lembaga kennengnganna Rahma asakola. Asakola SMP. Rahma menangka babene’ se raddin ban penter. Melana, Rahma daddi kembangnga disa. Rahma sajan daddi kembangnga disa sajjegga Rahma kalowar dhari pondhugga.

Arena la ngombar dhari temor. Reng-oreng padha mangkat se entara alako. Ta’ usa soro. Kabbi padha ragap. Kabbi padha kompak. Kabbi padha aora’ nojju saba ban teggalla bang-sebang. Rahma ngereng ebuna ka pasar. Pasar se ta’ kongse jau dhari romana. Kadhuwana nompa’ sapedha. Ebuna areba banci. Banci se aessa topa’. Sabban are Rahma ngereng ebuna ka pasar. Ebuna se ajuwalan soto. Sabatara neng e romana ngowan embi’ ban sape dadinggalannepon oreng seppo lake’na.

“Ma, dina ba’na mole, oreng la seppe keya. Sapena pakane ngala’agi dame. Embi’na cancang ka pakarangan se di temor, ” ca’na ebuna.

“Eenomana’a gi?”

“Iya enomma badha e panggulan. Mare ekella la.”

“Ba’na asotowa apa abadhanga e bengko?”

“Diggal laggu gillu’ gi’, kaula abadhanga bai, Bu”.

“Ya tabana atana’ lu, pas mon ta’ nemmo juko’ aguring tellor. Tellorra badha e lamari se di temor baba”.

“Enggi, diggal kaula palemana.”

“Iya, re-lere elorong ramme”.

Odhi’na Rahma ban ebuna arassa senneng maske tadha’ reng seppo lake’na se daddi pangator keluarga. E bengkona, molae Rahma kalowar dhari pondhuk bisa abanto reng seppona. Pangaterrona Rahma tenggi, se terro nerrossagiya sakola’anna ka se lebbi tenggi. “Kuliah” se ca’na oreng ngoca’ kodu bannya’ bandha mon akuliah. Mangkana dhalem pangaterrona Rahma paggun lako enga’ dha’ oreng towana, rassa neser dha’ reng towa bene’na se tadha’ abanto eromana ban biyaya se sajan marassa neser agandhu’ dhalem pekkerra dha’ ebuna. Rahma ta’ materros sakola’an mulae dhari ambu mondhuk daddi nganggur sataon e romana .

“Rahma, ba’na tolos akulia’a?”

“Diggal na, Bu, ka’emma olleya biyaya ?”

“Ma, mon biyaya epekkere terros ta’ kera duli tekka. Tape mekker sambi usaha insya Allah eparenge gampang. Pakarangan e budhiyan jarowa sangkolanna eppa’na ka ba’na. Sengko’ alako sabban are gun coma kaangguy ba’na.“

“Enggi kaula mon akulia panjennengngan tanto kadibi’an e ka’dhinto, Bu.”

“Ta’ arapa mon ba’na kan nyare elmo.”

“Enggi, tinggal ngantos taon dhateng sakale.”

“Ba, ma’ ta’ ngala’ se taon sateya sakale ? Ma’ nganggura pole ba’na ?”

“Enggi ampon lambat. Neka bulan saponapa pon ?”

“Arapa mon abarang ban Astuti sakale pottrana Ji Marsuki. Jarowa buru adaftara ca’na. Ebuna gella’ acareta e pasar bakto melle soto.”

“Ka’emma Astuti akulia’a, Bu?”

 “Ta’ tao. Ka Sunan Ampel ca’na. E dhimma jareya?”

“Adhu, jau ganeka, Bu, kose ka Sorbaja.”

“Ya ladina la poko’na ba’na onggu akulia. Ja’ sampe’ matodusan sengko’ polana sateya jaman la bida ban lamba’. Sateya la salsal.”

“Enggi, Bu, dha’ ramma biayayana pastena larang ganeka”

“ Ma, jauh ben biyaya jareya bisa esare ban epenta ka Pangeran. Engko’ terro ba’na padha ban se laen. Asakola jareya paggun cocok ban neyadda ba’na ongguan apa enja’ ?”

“Tape kaula ta’ nyaman, ampon kare ngabdi ka sakola’an.”

“Ya dina engko’ se menta’a ka sakola’anna.”

Pangaterrona reng towana Rahma lebbi dhari pangaterrona Rahma se asakola’a ka sakola’an se lebbi tenggi se la abit badha dhalem aba’na.

“Dina lagguna ba’na entar ka Astuti!“

“Senga’ pon etotop pendaftaranna, Bu ?”

“Enja’, Astuti gi’ buru adaftara. Mangkana entar anya-tanya.“

“Enggi sae.”

Mesem bibir Rahma. Seneng rassa se nyarowap dhalem dhadhana saenggana bakto terro lekkas dhapa’ se molae lamba’ pangaterrona tasempen. Saengga bakto are nyonare pepe merana Rahma dhalem ondhem se nera’e naek sapedhana nojju romana Astuti.

“Assalamu alaikum.”

“Alaikum salam… ba’na Rahma, ma’ buru tao amaen?”

“Enggi, Astuti badha enggi?”

“Iya jarowa badha e dhalem. Maso’ lasu!”

“Enggi, Buk.”

Ajalan Rahma dhari amper maso’ romana Astuti.

“Rahma? Ma’ buru tao amaen ba’na?“

“Engko’ kaso nolonge Ebu e roma neser kadibi’an.”

“Toju’ ra,”

“Iya,.Ano ca’na Ebu ba’na akulia’a ya?”

“Iya. Edhimma tao?”

“Ebuna ba’na acareta ba’ari’ e pasar ca’na.”

“Dha’emma, Ti?”

“Ka Sorbaja, Sunan Ampel.”

“Bila pendaftaranna etotop?”

“Minggu reya la. Tape engko’ gi’ buru adaftara.”

 “Bila adaftara ba’na?”

“Insya Allh sadhumalem.”

“Engko’ noro’a ya?”

“Ba, ba’na akulia’a keya ?“

“Iya ca’na Ebu soro abareng ae’na. Mangkana engko’ dha’enja esoro anya-tanya reya.”

“Iya la dina sadhumalem.”

“Ya dina mo-temmo sadhumalem lasu ya. Engko’ moleya gallu neser Ebu kadibi’an repot jarowa.”

 “Ya la.”

Pangaterrona Rahma tekka saenggana bakto dhapa’ dha’ se benget terro ejalana’a sabban mola. Rahma la mare adaftar ban la olle maso’ akulia se ta’ dha’ alangan sakale saenggana Rahma ngaolle nilai. Satengaga jalan Rahma alakone kuliana la bisa ngangguy biyaya dibi’ dhalem kuliana se ta’ ambu nganggguy pessena reng towa. Arassa senneng ban nemmo kaperagan oreng towan ta’ kaceba andhi’ Rahma tong-settongga. Rahma gun coma bisa ajar ban nyare elmo. Teppa’ ta’ tong- nyaletong polana terro maperaga reng towana se daddi pako dha’ Rahma. “Nyare elmo pataronggu, pateppa’ tengkana,  kaenga’e reng towana ban ibadana. Sabab reng bine’ benget gampang takae’ ka barang juba’,”pessenna reng towana Rahma.

Tape, ta’ olle sasemester balakka’ jalanna Rahma se akuliaya tagujang kalabang sedana ebuna. Rahma… dhu Rahma !

Mei 2011