Somor Soro’

Carpan Noer Hamima*

SENGKO’ ban kaka’ ajalan re-lere. Jalan se elebadi sengko’ sateya saongguna la abit ta’ ejalane oreng. Ranca’ ban dhadhaunan se kerreng atompo’ notope jalan. Bannya’ keban-keban kene’se aropa bilis mardha, kaleng, kala, ban samacemma kalowar dhari tompo’anna dhadhaunan kerreng ebakto sengko’ nyongkap ca’-ranca’ ban dhadhaunan jarowa kalaban tongket se pajat egiba dhari roma.

Bakto sateya bulan pornama. Tera’na bulan agabay jang-bajangan bungkana nangka paddhang ban celleng, agabay sengko’ tako’ akadiya nengale coba. Karsetta soko ban monyena perreng nambai rassa tako’ e dhalem dhadha.

”Ka’, sengko’ tako’,” ca’na sengko’ ka kaka’.

”Ma’ badha ke’-lake’ tako’an,” oca’na kaka’ padhana se ngece sengko’.

”Bila sajan semma’ ka Somor Soro’, paste sajan bannya’ seco-ngoco ban sajan matako’an ka ba’na. Tape kaenga’e, jareya, ca’na Ke Moremang, gun gudha’an,” kaka’ maenga’ sengko’ sambi malere sowara ban masemma’ lesanna ka sengko’.

Ca’na Ke Moremang, dhukon se nyoro sengko’ ban kaka’ entar ka Somor Soro’ areya. Bila sengko’ la para’ dhapa’a ka Somor Soro’ ra-kera kare 200 meter, sengko’ bakal nengale koburan laju e penggir jalan.

”Jareya koburanna Ke Maelang, oreng sengale Somor Soro’ Ke Moremang. Ngale somor rowa kadibi’an, ta’ menta tolong ka oreng laen. Tape, meske kadibi’an dhalem bakto saminggu, somor rowa la ranta, ta’ kose dhapa’ sabulan ja’,” nga’ jareya oca’na Ke Moremang ka sengko’ ban kaka’ ebakto entar ka romana.

Sengko’ ban kaka’ entar ka romana Ke Moremang are Salasa ba’ari’. Entar menta duwa. Sengko’ terro ka Sutina, kaka’ terro ka Nasiya. Tape sengko’ ban kaka’ padha ta’ etarema. Arassa todhus, sengko’ ban kaka’ andhi’ neyat magila’a Sutina ban Nasiya.

”Ke, kaula terro Sutina ban Nasiya nyengceng sarong karoma,” ca’na kaka’ emalem rowa.

”Iya, iya, sengko’ ngarte,” ca’na Ke Moremang sambi sem-mesem.

”Baramma carana, Ke?” sengko’ atanya kalaban ta’ sabbar.

”Ba’na se kadhuwa reya kodu amandhi e Somor Soro’ petto’ seraman, e malem Salasa manes. Salasa manes rowa minggu dhateng la.”

”Somor Soro’?” sengko’ ban kaka’ atanya abareng.

”Haha! Ba’na se kadhuwa pajat ta’ kera tao ka Somor Soro’ ja’. Na’-kana’ ngodha sateya pajat ta’ pate parlo ka barang se la lamba’,” Ke Moremang agella’. Tape padhana se agigir ka sengko’ ban kaka’.

”Aengnga Somor Soro’ rowa banyya’ gunana ban mandi. Bisa eguna’agi ka kajuba’an ban kabagusan. Ca’na oreng senyello’ ban se aguna’agi,” Ke Moremang ajarba’agi Somor Soro’ sambi nyolet roko’na.

”Edhimma Somor Soro’ ganeka, Ke?” Kaka’ atanya sambi ngabas ka sengko’.

”Dha’ dhaja e Pasar Lerek, ra-kera 500 meter.”

”Dha’ dhaja e Pasar Lerek? Banne jalan garowa pon ta’ eangguy pole, Ke?” Sengko’ atanya kalaban takerjat tor tako’.

”Iya teppa’. La pan-barampan taon, molae oreng apangrasa kabbiyanna kasara’an bisa epagampang kalaban pesse. Tadha’ pole oreng se nyello’ aengnga Somor Soro’. Jalan rowa daddina ta’ ejalane pole,” Ke Moremang aoba seddhi enalekana ngoca’ nga’ jarowa.

Samarena sengko’ ban kaka’ eberri’ dalubang seatoles duwa, sengko’ ban kaka’ mole ban aneyat amandhiya e malem Salasa dhateng. Sutina, Nasiya senga’ ba’na.

***

”Ka’, areya koburan se emaksod Ke Moremang,” koburan rowa la laju onggu. Paesanna se saongguna abarna pote la aoba ka barna lomot, bannya’ bu-tombuwan e attassa.

”Mayu’, baca duwana e dhiya.”

”Iya mara.”

Duwa la mare ebaca. Angen temmo santa’. Dhadhaunan gaggar ka koburanna Ke Maelang. Bungkana pao se badha e temorra koburan padhana se robbuwa. Sengko’ ngedhing ro’omma malathe, pandhan, ban bauna mennyan.

”Areya tandhana sengko’ ban ba’na ebagi mon Ke Maelang. Mara ceppet!” sengko’ etaja’ mon kaka’ olle sajan ceppet ajalan.

Somor Soro’ se emaksod Ke Moremang pajat tadha’ oreng se arabat. Bannya’ bungkana rabet nalar e geddhungnga. Terassa kerreng, nandha’agi pajat tadha’ oreng se ngala’ aengnga. Temba se daddi panyello’ la perot, talena para’ pegga’a. Sengko’ ban kaka’ alongo ka dhalem somor. E dhalem somor, sengko’ nengale Sutina ban Nasiya akebba’ ka sengko’ ban ka kaka’. (*)

Epetthek dhari: Somor Soro'