Peleyan Kalebun

CARPAN MA LEO*

NEYAT Agus kaangguy toju’ pole daddi calon kalebun nyatana ampon bungkol. Maskena bakto se tapongkor kala dhalem arebbu’ sowara masyarakat. Tape, kalaban bandha pangusaha se kalonta kasogiyanna, paste sajan gampang mennang dhalem peleyan se bakal dhateng. Asandhing moso Sutarji, calon se tao makala bakto peleyan sabellunna.

Sadaja kabutowan ampon eparanta satengnga taon sabellunna. Molae dhari mencar brosur, abareng obang, tor ta’ loppa makompol masyarakat sakampong kaangguy eajak abak-rembak. Peleyan sabellunna se adaddiyagi Sutarji mennang bannya’ ta’ bisa etarema kalaban ate jembar.

Bannya’na oreng se acaca juba’ adaddiyagi panas pekkeranna Agus. Ta’ tarema onggu, ta’ tarema aba’na. Pramela dhalem peleyan se bakal dhateng, badha pangaterro bisa abukteyagi salana cacana oreng.

Sabban are sabban malem alengleng. Manyemma’ dha’ masyarakat kalaban alos oca’ tor janji se bagus. Contona, bakto akampanye neng Kampong Bicorong.

”Tan-taretan kaula sadajana. Samangken, kabutowan-kabutowan odhi’ ampon bannya’ se larang. Kabutowan asakola, kabutowan neddha, arga sembako, transportasi, sadajana padha larang. Manabi kanyata’an ka’dhinto ta’ duli epateppa’, se jellas bakal adaddiyagi mesken masyarakat tor ta’ bisa maju-maju disa ka’dhinto.”

”Badan kaula atas nyama taretanna sampeyan sadaja, manabi eparenge kasempatan mennang dhalem peleyan se bakal dhateng paste bakal nyamporna’agi kabadha’an, mamodha barang-barang kabutowan, sakola’an gratis, tor salaenna.

”Maka dhari ka’dhinto, ngereng same-same manyettong neyat, oca’, sareng kalakowan kaangguy mele badan kaula daddi bakkella sampean, pamimpin neng disa ka’dhinto,” kalaban sowara ranyeng, alompa’ sagara Agus Purnomo ngajak masyarakat neng e lon-alon kampong.

Makompol sowara kaangguy peleyan se ampon para’. Bakto lastare, Agus sareng ca-kancana mencar amplop etambai sembako ka sadaja masyarakat se dhateng.

Kanyata’an kala e taon se tapongkor ta’ terro eulanga pole. Saengga bannya’na obang se epakalowar ta’ kalaban mekker lanjang. Se otama, baktona lastare coccowan aba’na bakal ngaolle sowara se alebbi’i moso.

Mon parlo, ngangguy cara sala, se alanggar dha’ hokom agama jugan ta’ aponapa. Kor poko’ tojjuwan aherra bisa mennang. Daddina, kaangguy ngajak masyarakat bisa lebur tor neser, maka baktona acara-acara epong-kampong, akadiya selamattan kandhungan, khatmil Qur’an, walimatul ursy, walimatul aqiqah, tor salaenna, Agus ta’ oneng absen kaangguy hadir.

Kalaban ngeba berras otaba obang se langkong bannya’. Kalakowan bajeng, maleng, se ta’ maaman kabadha’an ampon eoba bagus, gampang asadaka, bajeng ibada sabban baktona, tengka guli sareng oca’na alos onggu daddina.

Salaenna Agus, Sutarji se ampon mennang e taon se kapongkor, ta’ pate gumese’ gulina. Tennang pekkeranna. Sabban are salaenna nyombang dha’ masyarakat, Sutarji biyasa mabadha istighotsah e compo’na. Kalaban ngonjang tokoh-tokoh masyarakat, towa-ngodha, lalake’-babine’, sadajana epakompol kaangguy areng-sareng adu’a ma’ le hajat bakal epadaddi kanyata’an.

Bakto peleyan ampon kare samenggu. Bannya’ oreng pon padha waswas mekkere calon kalebun se bakal atandhinga. Napa pole soal Agus Purnomo, lalake’ se ampon kalonta kasogiyanna, jugan bajeng tadha’ karena arta. Sabab, e taon se tapongkor nyatana kabadha’an daddi ta’ aman. Bannya’ sape, embi’, motor, emmas, tor obang se elang. Metorot careta kadaddiyan se badha aropa’agi perrena Agus kala dhalem peleyan. Saenggana aperreyan dha’ barang-barang se ekaandhi’ masyarakat.

Kanyata’an se ampon ekaate masyarakat adaddiyagi peggel talebat. Juba’na kalakowan se badha ta’ lekkas elang dhari pekkerran. Saenggana maske bannya’ apareng obang, lebur ato-banto oreng se kateppa’an dhalem kakorangan, alos oca’ tor kalakowan, ta’ gampang ngoba prinsip se ampon eteggu’.

Tape Agus terros maksa kalaban banya’ cara. Ta’ bisa ambu’ sampe’ pangaterrona bisa tekka hajat. ”Jon, dha’ramma kabada’an e Kampong Babilla?” oca’na dha’ sala settong ro-sorona.

”Ta’ osa kobater, Bos, kabbi masyarakat paste mele Sampean,” jawabba kalaban jembar.

”Ma’ bisa?” ropana ta’ parcaja.

”Sabab, kabbi mare eparenge obang Rp 300.000 sabban oreng,” Agus ahera aonggu’ tandha saroju’.

”Mon tugassa ba’na, To?” oca’na ka selaen.

”Padha, Bos, ta’ usa kapekker lanjang. Sabab masyarakat ampon anyata’agi siap nyokong sadaja.”

Sabban-sabban oreng sorowanna etanya’agi kalaban somangat. Hasella onggu abukte. Bannya’ se etanya’agi bagus ban siyap nyokong Agus. Jembar onggu abasanna ngedhingagi oca’ dhari reng-oreng kapartaja’anna. Ta’ sabbar rassana adhante’ acara peleyan. Napa pole badha se masteyagi mennang tor bakal bisa makala calon se mennang bakto se tapongkor.

Ta’ eka-sangka, acara se edhante’ ampon dhapa’. Sadaja masyarakat pon padha entar areng-bareng dha’ tempat coccowan. Dhuwa’ calon, Agus Purnomo nomer settong gambar nyeyor amoso Sutarji nomer duwa’ gambar sabbrang. Alonggu e atas panggung kalaban sakse bannya’na masyarakat se nyoblos.

Sonar are se talebat panas nandha’agi coccowan lastare. Sadaja masyarakat pon padha adhante’ hasel bitongan sowara. Sabbrang, nyeyor, sabbrang, nyeor, sabbrang, nyeor. Antarana kadhuwa calon padha bang-tabangan arebbu’ sowara.

Se ngedhingahi abasanna jekjek ta’ li-guliyan. Teppa’ la para’ maghrib, bitongan sorat sowara ampon lastare. Asalla jembar dhari bagiyan pangellarra Agus. Sabab sowara lebbi bannya’. Tape, adhante’ terros adhante’, nyatana daddi palangnga. Sowara se badha aherra lebbi bannya’ ka Sutarji etembang Agus. Sampe’ lastare bitongan, ta’ esangka sabelluna kamennangan mutlak badha e piha’ Sutarji.

Neserra onggu. Mowana Agus daddi aoba mera. Ta’ kowat rassana nanggung malo se talebat raja. Kalaban dhus-todhus Agus pas terros mole ebarengnge pangellarra se noro’ bunte’ e budhina. Reng-oreng se nengale pekkerna ampon ta’ nanto. Badha pangatako’ sa’amponah Sutarji resmi daddi kalebun, disana sajan ta’ aman. Kadiya e taon se tapongkor. Napa pole kalakowanna Agus kadhang aba-oba, bisa bagus bisa juba’.

”Moga bai kabadha’an bisa epajau dhari sadajana mosiba,” oca’na Pardi bakto nengale Agus ampon jau dhari pangabasan. Lalake’ se ropa towa kalaban obu’ ampon barna pote, ta’ bisa notope sangka’anna. Sabab baktona Sutarji daddi sabelluna sapena temmo elang ekeco’ maleng.

Bakto dhu bulan se ajalan pojur kabadhaan aman tadha’ kadaddiyan-kadaddiyan se maposang masyarakat. Tape, saellana lebat baktona, settong tamba settong barang se larang argana molae elang. Polisi rassana bingong ngadhebbi maleng se malarat sareyanna. Kadhang monyena potas ella ekedhing sabban malem, nandha’agi maleng ampon talebat peggel rassana. Eker-pekker kaangguy ngadhebbi tor nyare cara se bisa majerra. Masyarakat pas ngadhep ka dhalemma Keyae Malik, ngarep petodu tor cara kaangguy ngatase mosiba e disana.

”Ba’na ta’usa bingong, Mat,” dhabuna Keyae Malik kalaban tenang.

”Ta’ kowat ka’dhinto mekkere. Sabban are badan kaula sareng masyarakat Kampong Bicorong ampon ta’ kowat ngadebbi,” oca’na mamellas.

”Menorot istikharana sengko’, kadaddiyan-kadaddiyan se badha jariya, perrena peleyan kalebun. Kadhang se kala aromasa nanggung malo se talebat, saenggana males rassa malona dha’ masyarakat se ta’ apihak dha’ kalebun jareya.”

”Terros, kadiponapa jalan kalowarra ka’dhinto?”

”Hem, repot onggu mon dha’iya. Lebbi bagus ba’na sateya maelang dha’ panyaketta. Dhalem arteyan, kalebun se kala reya pas serra’agi dha’ polisi. Insya Allah ngangguy cara jareya bakal ambu masalana,” dhabuna keyae sambi kasokan salerana.

Sa’ellana badha pakon dhari keyae, masyarakat laju ajung-rojung kaangguy alapor dha’ polisi. Alhamdulillah, saampona Agus badha e penjara, kabadhaan pas aoba dha’ se biyasa.

*)Mahasiswa Instika Guluk-Guluk, Sumenep.

Carpan eattas epetthek dhari Jawa Pos Radar Madura (JPRM) eccaban Ahad, 3 Januari 2016