Forum Bias Ta’ Gadhuwan Struktur

(Facebook Syaf Anton Wr.)

SUMENEP – Enga’ dha’ Forum Bias? Monggu para aktivis tanto bakal enga’ ka forum se settong paneka. Gi’ dhimin, forum paneka daddi sala settong kennengngan kaangguy diskusi. Asalla, oreng se rabu jugan bida. Badha sastrawan, wartawan, politisi, ban salaenna.

Forum paneka abit tadha’ kabarra. Nangeng, molae 2015 se tapongkor, forum paneka onga’ pole. Tan-taretan juga bannya’ se perak tor gumbira kalaban badhana forum paneka. Jagana Forum Bisa sajalan kalaban kaddrengnganna Syan Anton Wr sareng tan-taretan se laen.

Syaf Anton Wr, panglimana Forum Bias, dhalem tolesanna adhabu, forum paneka banne lembaga formal, banne organisasi, jugan banne komunitas. Sabab, e Forum Bias tadha’ strukturra. Forum Bias ta’ abina otaba ebina lembaga ponapa’a bai. ”Sabab, badhana Farum Bias ta’ apihak ka pasera’a bisaos,” dhabuna.

Kegiadan Forum Bias banne kaangguy nyare ontong. Ta’ ebajar oataja majar. Kagiadan Forum Bias kalampan dhuminggu sakaleyan. Nangeng, jadwal paneka bisa aoba, agumantong kabutowan.

Anton  ngatorragi, Forum Bias nyadhiyai kennengngan, panyambung oca’, kennengngan kaangguy magi pangalaman, elmo pangaonengan. Pasera’a bisaos bisa ngatorragi pamanggina, kalaban ta’ mandeng asal usul kaelmowanna, sae budhaja, kasastraan, lingkungan, sosial, pandidikan, tor elmo laenna salaen politik praktis.

Salaen madhateng narasumber, Forum Bias juga ngatore dha’ kreator, pangarang Sumennep otaba dhari lowar kaangguy ngatorragi elmona lebat forum paneka. Monggu se ngarang buku, sae se kadibi’an otaba areng-sareng, aropa buku sanja’, carpan, novel otaba buku se laen, Forum Bias nyadiya’agi kennengan tor ca-kanca kaangguy diskusi.

Salaen paneka, Forum Bias juga makalowar buku-buku sastra menorot kaparlowanna. Buku paneka epakalowar anglebadi tim kurator se ampon etantowagi. Forum Bias juga ngumummagi kagiadan lebat, koran, radio, otaba tv.

Monggu narasumber dhari lowar Sumenep, Forum Bias ta’ marenge honor. Pa-ponapa se eatorragi gun adhasar kanca ka kanca. Kajabana, bila badha parmenta’an dhari Forum Bias. Pramela, Forum Bias ngajak para maos areng-sareng neng forum paneka. ”Lebat forum diskuasi paneka karangan, pekkeran bakal ealem, eargai, etanya’agi, ekritik otaba kantos manae’ pamorra se ngarang,” dhabuna Anton ajarba’agi. (Lukman Hakim AG.)