Gampang Padhana Oreng Amaen Sekak

PARJUGA: Dhari kacer, Syaf Anton Wr, Lilik Rosida Irmawati, tor Novie Chamelia dalam diskusi Fosum Bias e Art Gallery Sumenep, Ahad 17 Januari 2016 (Foto: Facebbok Syaf Anton Wr).

 SUMENEP – Karjana Forum Bias teros ta’ seppe. Pan-saponapan oreng akompol e Art Gallery, Jalan A. Yani Pajagalan, Sumenep otaba e lao’na Taman Lake’, Ahad (17/1). E kennengngan paneka badha diskusi buku Semudah Bermain Catur (2015) sareng se noles, Novie Chamelia.

Buku paneka aropa’agi kompolan catheddhan pandha’na Novie. Etoles kalaban jarna’, gampang ekangarte, tor ngatorragi kadaddiyan-kadaddiyan dhalem kaodhi’an sabban are se etalektegi Novie.

Buku paneka bisa ebada di ka’emma bai. Ta’ mele kennengngan. Ta’ kodu ngangka’ alaes, tor bisa ngajak oreng se maca mesem. Dhalem diskusi, babine’ asal Mekkasan paneka ajarba’agi tolesanna.

Syaf Anton Wr, panglimana Forum Bias, ajarba’agi, diskusi buku Semudah Bermain Catur abak anga’. Para rabu padha se epetanya kaedanna essena buku sareng bul-ombulla. Dhalem kasempadan kasebbut Novie ngatorragi ja’ oca’ semudah bermacin catur paneka gambaran nge-ngenge kaodhi’an. ”Eatore maos sadaja essena buku, kaangguy bisa ngaonenge maksodda,” dhabuna dhalem basa Indonesia.

Badha jugan se atanya, aponapan Novie nyeppe e Vihara Dhammadipa Arama, Malang. Sabab, agamana Novie paneka Islam. Novie ajawab, lalampan saabidda 15 are paneka ejalane menangka sala settong cara ngenga’e aba’na. Tadha’ kaedanna sareng syare’at agama.

”Ibada menangka babine’ Islam paggun ejalane karana panyeppe paneka ta’ maso’ kalakowan ajaran Budda,” oca’na.

Buku paneka aropa’agi catheddan  Novie adhasar pangalamanna dibi’. Dhalem diskusi, badha se ngalem ban badha jugan apareng kritik.

Novie Chamelia

Novie Chamelia gadhuwan kamampowan kaangguy noles. Maske kabilang oreng “anjyar”, molae gi’ dhimin, estona aba’na ampon gadhuwan pangaterro bisa noles. Nangeng, sabellunna Semudah Bermain Catur kalowar, Novie gi’ emo’ ajar ban asakola.

Babine’ dhari Mekkasan paneka ampon marampong jurusan Ilmu Sosial tor ampon ngaolle jajuluk doktorrepon e Universitas Airlangga Sorbaja. Sabelunna mondhuk e Al-Amien Prenduan. Samarena paneka terros ajar e jurusan Tapser Hadits UIN Syarif Hidayatullah Jakarta.

E bakto paneka juga akuliyah e ICAS-Paramadina jurusan filsafat. Jajuluk magisterra ekaole dhari jurusan Sosiologi Universitas Indonesia. (Lukman Hakim AG.-eracek dhari catheddanna Syaf Anton Wr.)

HOSO': K. Dardiri Zubairi (kacer) sareng Mahendra dhalem diskusi Forum Bias Ahad, 17 Januari 2016 (Foto: Facebook Syaf Anton Wr.)

 

BANG-SEBANG: Umar Fauzi Ballah (kacer) sareng Hidayat Raharja dhalem diskusi Forum Bias Ahad, 17 Januari 2016 (Foto: Facebook Syaf Anton Wr.)