Are Nyangsang e Matana

Anggidannepon Hasmidi*

E tanangnga

Gunong epega’ sapergem se kacer

Daddi nyaba

Pa’-kopa’an neng are se kara

E sokona

Sagara compet ta’ abates sereng

Daddi ora’

Salang senglang omba’ ban parao

E dhimma pole badha tera’

Se ta’ kalaban sossa, sabelluna?

Jaring-jaring e penggirra atoles nomer

Aurut dhari settong sampe’ lesso

Kabarragi;

Poter se ngerem nas-panasan,

Nyare naong

Ban lobangnga lendhu

Ngerrep kerreng nemor.

Se mergem ta’ akeddep omor

Kole’na ngacernang

Padhana aeng baja laggu

E dhadhana

Songennep, 13/10/2015

*)Guru e SDK Sumenep tor SMAN 1 Bluto. Ajar e Komunitas Kampung Jerami tor Lembaga Kajian Seni Budaya PANGESTOH Net_Think Community Sumenep.

Sanja' eattas epetthek dhari Jawa Pos Radar Madura (JPRM) eccaban Ahad, 3 Januari 2016