Foto: Rifky Raya |
UKM Komunitas PELAR aropa’agi settong organisasi seni di Sekolah Tinggi
Ilmu Tarbiyah Aqidah Usymuni (STITA) Sumenep. Komunitas paneka langkong kalonta
esebbut Pelar. Dhalem organisasi paneka mahasiswa kampus se badha e Tarate,
Pandhian, paneka ajar areng-bareng elmo seni sae sastra, musik, otaba teater.
Lerres e malam Juma’at
(30/12/2015) Pelar dhateng dha’ acara Pentas Akhir Tahun. Acara paneka epabadha sareng Teater Gendewa
INSTIKA Lu’-Gulu’, Sumenep. Salaen Pelar, jugan edhatengnge ca-kanca dhari sanggar
otaba komunitas laen. Antara laen, dhari Sanggar Rakyat
Taresna STIA Baraji, Gappora; Sanggar
Pangestu dhari
UIM Mekkasan; tor Sangggar
Racana UKM Pramuka Instika Lu’-Gulu’.
E bakto paneka,
Pelar ngaolle giliran dhi-budhi saamponna Sanggar
Racana, Teater Gendewa, tor Sanggar
Rakyat Taresna. Panggung e adha’na kantor rektorat
paneka etenggu bannya’ oreng. Otamana santre Pondhuk Annuqayah.
Kopa’na santre
se nenggu maramme tatenggun paneka. Napapole, Pelar kaolok daddi panotop e
malem paneka. E malem paneka Pelar ngangka’ careta Balada Orang Pinggiran se esutradarai Rifky Raya, katowana Pelar.
Careta paneka
eangka’ dhari laguwepon Iwan Fals se abul-ombul Orang
Pinggiran. Balada Orang Pinggiran nyareta’agi kabadha’an oreng-oreng kene’. Dhalem kasempadan paneka Pelar ngangguy panggung se
epossa’a kalaban bu-rombu. ”Pelar terro nyareta’agiya oreng-oreng se badha e
kennengngan pamowanganna bu-rombu,” ca’epon Rifky.
Foto: Rifky Raya |
Balada
Orang Pinggiran erantep sareng tembang ban tabbuwan. Ganeka kaangguy nandha’agi ja’
oreng kene’ juga gadhuwan rassa kamanossa’an tor pabala se saonguna. Lagu-lagu
se enyanyiyagi e aher papanggiyan paneka aropa’agi
tandha ja oreng kene’ gadhuwan hak kaangguy odhi’ senneng. Oreng-oreng kene’ ta’
kenneng eccap menangka oreng se seddhi tor malarat saomorra.
Saamponna manggung
kalaban Balada Orang Pinggiran, Pelar
ngaolle pojiyan etandhai kalaban kopak reng-oreng se nenggu. Pangggung paneka
etotop kalaban anyanyi areng-sareng, bu-tabbuwan areng-bareng. Sadajana daddi
settong apol-kompol sakanca’an. (Lukman
Hakim AG)
Tidak ada komentar:
Posting Komentar