CARPAN HASMIDI*
ELLA para’
apesa’a ban sakanca’an. Se
biyasana areng-bareng satengnga are neng
sakola’an, kare pan-barampan
bulannagi’ se ta’ apolonga pole’. Pojur mon
nerrossagi neng sakola’an se padha. Tako’na, sengko’
ta’ bisa nerrossagi ka sakola’an se atenggiyan.
Sakeng bisa materros, pas tadha’
se asakola’a se padha bareng sengko’. Tang peleyan dhaggi’ paggun ta’ kera
padha bareng se laen. Yaktena, se laen paggun
mele sakola’an se lebbi ekasennenge mon reng
towana bi’-dibi’ sebang. Apana pole pajat lakar
ekaterrowe kalaban ana’na dibi’.
Pangaterro se mapadha’a ban kanca
laen banne sakeng ta’ agundhek dhalem ate. Sakeng sengko’ ella bisa nembang ka
aba’ dibi’. Ban pole, bisa
nembang dha’ kabadha’anna reng towa.
Sengko’ bai se asakola e dhinna’ sampe’
sateya para’ kalowara banne sanyatana karebba sengko’. Tape,
reng towa se terro makapra’a ban sabarengngan. Makapra’an
ban tatangga.
Tadha’ peleyan pole. Sakola’an se
semma’ ban tang bengko iya coma sakola’an reya. Sakeng badha sakola’an se lebbi
modha jar-bajaranna ban sakola’an
reya, sengko’ ban reng towa paggun mele se lebbi modha. Sanyatana
sengko’ ella tao ngatorragi ka eppa’ ban ka emma’, lebbi
bagus ambu se asakola. E bakto kellas ballu’, samester se lu-gallu.
”Samester
dhuwa’ se bakal dhateng, badan kaula nyo’on edi kaangguy ambu sakola.
Tinggal manabi badan kaula ta’ gadhuwan
ijazah se lebbi tenggi. Badan kaula ampon same sareng ga-tatangga se badha e
ka’dhinto. Manabi eparengagi, badan kaula
abantowa ajunan bisaos ka saba, namen cabbi
otaba abanto emma’ ka pabrik.”
Rida gun coma nondhu’. Ta’
bangal ngangka’ mowana sambi ngabas matana
reng towana se badha neng adha’na. Tanang dhuwa’na padha mecet sala’ settong tanang se laen. Te-ganteyan. Kangan ban kacer.
E tanangnga
ta’ etangale telpon se biyasa egabay gu’-teggu’an kabannya’an
kancana. Sakellas gun coma Rida se ta’ neggu’ telpon lebar se gun elit-dulit.
Telpon se bisa nyaba’ ban ngala’ samacemma kabutowan. Tamaso’
keya nenggu les-tolesan se badha kaedanna kalaban
pangajaran ban elmo laenna.
Sabban kanca se andhi’ kaparlowan
terro nelpona Rida bisa lebat emma’ ban eppa’na. Se paleng seggut telpon se
eguna’agi andhi’na emma’na. Badha’a pa-apa bai nomer se bisa epece’ iya areya
dhin reng towana. Dhari telpon reya keya se bisa ngeba
ca-kancana dha’ rengking pararel se
biyasa badha neng sakola’an.
Sabban na’-kana’ se maso’ dha’
sakola’an reya paste andhi’ pangarep se padha. Padha terro ngennenga rengking. Apana
pole neng kellas pararel. Paste bunga
bila ekaolle.
Settong gun se biyasa badha neng
tanangnga Rida. Buku pangajaran etengteng ka dhimman-dhimman. Ka barungnga
sakola’an tanangnga neggu’ buku. Bila istirahat, Rida
bisa etemmo neng perpustaka’an. Tadha’ laen se elakone iya areya gun coma maca
buku.
Benne sakeng Rida ta’ andhi’
kanca se bisa ekabareng amaen otaba ja’-gaja’an.
Tape sakeng Rida lakar ta’ andhi’ bakto kaangguy ja’-gaja’an se ta’ aguna. Pekkeranna
epanyettong dha’ pangarebba reng towana. Neyat kaangguy mabunga reng towa daddi
tateggu’ neng dhadhana Rida. Seggut ca-kancana ngoca’ ka Rida.
”Apa
ba’na ta’ busen ju’-toju’ re-saare
sambi maca buku saros-terrosa? Mara ambu gallu, noro’
sengko’ sakejja’ ka Blibis. E dhissa’ bannya’ ca-kanca se laen ngantos sengko’
ban ba’na. Polana sateya Sahrul molang are. Apa ba’na ta’ enga’ dha’ undhangan
se ella ebagi sengko’ ka ba’na gella’ neng
adha’na kellas?”
Rida gun mesem narema ajaganna
Irma. Sambi nenteng buku pangajaran neng tanang kacerra,
Rida noro’ bunte’ eredan tanangnga Irma nojju ka sapedhana.
Sabban laggu Rida eaterragi
ngangguy sapedha Prima se ella laju
ban nomer taonna bai padha losso. Rassa todhus ta’ gellem nyander neng atena
Rida. Maskeya se laen padha mangkat ngangguy sapedha dibi’. Badha keya se eaterragi
ngangguy motor se bagus.
Ngabassagi lowarra bai solap. Baramma
sennengnga bila nompa’ laju badha neng dhalem ta’
kera apangrasa ja’ badha angen cellep gu-laggu otaba panassa are bila ella
mole. Pole aeng ojan ta’ kera bisa mabacca
badanna.
Karettek
atena Rida majau dhari kasolaban se esakse’e sabban
are neng adha’na kalabangan sakola’an. Abareng kalaban mettona are dhari temor
motor jareya mo’dul keya sajalan kalaban sonarra are gu-laggu.
Teppa’ neng adha’na pagar besse
se aeccet biru dhaun, Rida toron dhari
sapedhana sambi ngala’ tanang se kangan
andhi’na eppa’na, Rida nyo’on kaehlasan.
Tadha’ se bisa ekasombari dhari
eppa’na. Oreng tane se sabban are abat-jalibut
cellot neng badanna. Cellodda oreng Cena se epagarap ka eppa’na seggut egiba
mole ka romana. Tor kadhang Rida se nyassa kalambi ban calanana eppa’na jareya.
Ta’ epangantos ka emma’na se alako neng pabrigga odhang.
Pole, atana’, asapowan ban salaenna se bisa elakone mon Rida.
Sabelluna parai
kaangguy nyambut taon anyar se kare samenggu, Rida toju’ neng amper lowar. Ngabassagi
ka lorong aspal celleng neng temorra pagar dhari bungkana pelle se abiter ce’
rampana. Lir-balirra oreng se lebat neng lorong
jareya ta’ ngeddhebbi kabadha’anna Rida se nengkong.
Neng tanangnga amplop pote
eteggu’, elang-telang. Eppa’na ban emma’na tadha’
se dhatengnga. Mowana bingong, acora’ ella ta’
sabbar se ngantos. Are ondhung ka bara’
mapetteng bas-abasan. Sanyatana ta’ compet
parana, sakeng dhari bannya’na ka’-bungka’an
se tenggi magibat petteng.
”Eppa’
ma’ ta’ rabu se ngone’e emma’
kose baja sateya. Mandaran ta’ tatemmowa kalaban pa-apan se bisa maseddhi aba’ ban kalowarga se laen.” Manjeng. Materros nojju labang se ella
abukka’. Sabakto ban jareya reng towana napa’ ka romana. Toron dhari sapedha,
Rida laju abiluk, berka’ ka adha’na reng towana
sambi magi amplop se etelang-telang molae gella’.
”Ba’na
rengking settong, Bing, neng
kellas pararel.”
”Alhamdulillah!” Tacengnga’
acampor ta’ partaja. Badanna loyloy. Alerpo’. Samarena jareya Rida maso’ ka
romana materros kalaban sujud sokkor.
Songennep,
2016
*)Guru neng e SMAN 1 Bluto tor ajar e Lembaga Kajian Seni
Budaya PANGESTOH Net_Think
Community Sumenep.
Tidak ada komentar:
Posting Komentar