Mosem Nembara' La Dhapa'

Anggidannepon Hermanto Nuris

Nompa ekarassa ta' kabuwa'
Menges mesem padha egella'
Pangarep badha dhapa'
Apeccang sampe' loppa bakto

Ngarep badha se earep
Apoter birit dhalem ate
Manossa ta' kobasa
Sanyatana apangrasa

Ora' ekabbiyagi
kadhang loppa dha' aba' dibi'
Ngaradduwagi pangaterro
Sanyatana Aba' budhu

Pekker bisa metong
Dhalem karena'an bisa ejumla
Ba' teppa'a oreng se mekker
Bila tao saongguna aba' budhu

epetthek dhari grup Facebook Basa Madura

Juwairiyah Mawardy: Ngetong Are II Sambajang Ate

Ngetong Are

Nalekana enga’ dha’ pate

Apolo-ebuwan are aba’ odhi’

Matoro’ badan ka bume

Ka bara’ ka temor nyare arte

Artena odhi’ se settong bungkana nyabana

Tape ta’ atemmo arte se daddi jembarra ate

Ngetong are ta’ neggu’ paste

Bila se dhapa’a dha’ pate?

Sango namong du’a dha’ se ngagunge paste

Madura, 2010

Sambajang Ate

Bila pajjar ngombar dhari temor

Amarga gu-laggu dhateng kaangguy majaga manossa

Manossa asambajang, nyocce’e mowa sareng ate

Madhep dha’ pangeran se kobasa

Nyo’on sapora dha’ dusa se talebat

Bila ampon seyang mata are nyornang nera’e bume

Manossa maccowe soko sareng tanang, nyocce’e mowa

Asambajang kaangguy ngosot pello se acampor dusa

Dhalem neng-enneng otaba agulina badan

Saamponna are leccer, manossa alako kaangguy odhi’na

Kaangguy pakan tor pakon dhalem arabat kaodhi’an

Manossa terros asambajang pole

Sampe’ sorop are, sampe’ malem ngop-nyongop

Kantos malem kaongguwan

Manossa asambajang pole

Nyocce’e ate

Tatape, bannya’ eantarana manossa

Ta’ asambajang kalaban atena

Namong badhana, nyongsang-nyonglet toron ongga

Ta’ matoron dusa ta’ maongga kaberkatan

Karana namong asambajang kalaban badan

Ngereng…asambajang kalaban ate

Kaangguy soccena ate…

Madura, Karduluk, Maret 2010

*)Guru, asal dhari Kardhulu', Sumenep.

Sanja' eattas epetthek dhari Jawa Pos Radar Madura (JPRM) eccaban Ahad, 31 Januari 2016

Sastra (Oreng) Madura

Lukman Hakim AG.

ORENG Madura tor sastra -otamana sastra lesan- ampon ekadaging dhalem kaodhi'aan. Maske ta' asakola, ta' oneng horop ban ta oneng maca, oreng Madura ta' adinggalagi cap-ocaban se agandhu' sastra. Sae naleka badha e saba, e talangan otaba balanan, e tase' e gir sereng, e pasar. Otaba parappa'na maddek roma. dhapor, mateppa' kandhang, ban salaenna (bsl).

Bisa ebukteyagi dhalem adha-kandha paste badha gagembanganna basa. Akadi, parebasan, parsemmon, pantun, si'ir, paparegan, gancaran, sakola, kerata basa, bak-tebbagan, otaba dungngeng. Pan-saponapan gagembanganna basa dhalem adha-kandha, ameler, semo, paneka arentap sareng kabadha'an.

Oreng-oreng kadi paneka bannya' badha e pardisa'an. Otaba oreng kottha se ampon seppo. Ngangodhadan mangken sabagiyan akaton korang lebur. Nangeng, sabagiyan se laen, otamana se oneng parlona "arta ta' abujut dunnya" paneka molae ajar, aguru, nyare tambana elmo.

Kembang Polo Ra’as

CARPAN MA LEO*

 

RA’AS aropa’agi sala’ settong polo e Kecamadan Ra’as, Songennep. Salaen polo paneka, badha Polo Talango Aeng, Talango Tengnga, Kalosot, Tondhu’, Guwa-Guwa, Kamoddhi, jugan Polo Komereyan. Polo Ra’as kadaddiyan bannya’ disa. Eantarana, Disa Katopa’, Jungkat, Kropo, Karang Nangka, Alas Malang, ban Brakas.

Kabadha’an alam e Polo Ra’as onggu talebat asre. Sabab, bannya’ kasogiyan alam. Kadiya koceng busok. Koceng ka’dhinto andhi’ kalebbiyan. Buluna alos. Kalakowanna seggut toro’ oca’. Saenggana bannya’ se ngobu neng ma-roma.

Kasogiyan alam se laen akadiya karajinan tanang dhalem nganggit teker. Nyamana teker pandhan. Produk asli Disa Kropo gapaneka ngabutowagi bakto cokop abit ban kasabbaran. Saengga ahera produk teker bisa ejual ka man-dhimman. Argana acem-macem. Namong se biyasa Rp 40.000 salambar.

Reng-oreng se badha neng Polo Ra’as kabannya’an oreng bine’. Lalake’na a-rantau dha’ kottha otaba nagara laen. Kadiya Arab Saudi, Malaysia, Hong Kong, tor bannya’ kottha se laen. Kabiyasa’an alako ka lowar adaddiyagi ajajuluk polo bine’.

Ngandhung e Pagar

CARPAN MUDHAR CH.*

DHU bulan se tapongkor, ojan se earep aherra gaggar keya. Ta’ derres onggu, sabab ba’a ta’ bisa nganyo’ bu-rombu e jurungan. Beddhi se kandel e tase’ gi’ ta’ leddu’.

Oca’na reng towa kona, mon galudhuk la amonye, 40 are aggi’ bakal nembara’. Etandhai kalaban ojan derres, paleng sakone’ tello kale. Beddhi e tase’ leddu’ ban jurungan berse. Sabab bu-rombu la eanyo’ ba’a.

Tello’ tatengnger lampana reng kona, e nembara’ sateya tadha’ sakale. O-tao, saellana ojan se ta’ onggu derres, oreng tane makalowar sape bine’na kaangguy namen. Jagung nebine eterter ella’ salolos. Sabbrang etaccekkagi e bun-tabun. Bariya keya bulir ban bengngok etajuwagi e tana se ta’ bisa elolose sape.

E bakto namen badha arebban raja kaangguy nyambung odhi’. Badha ca’-oca’, ja’ mon reng tane atana’. Daddi mon la osom tamen sakejja’aggi’ reng tane ta’ bakal kabater okossa dhaporra bakal ngebbul.

Nebine jagung, bulir, bengngok, ban sabbrang se etamen tombu ngaracak. Nembara’ sateya ta’ gun earep oreng tane. Ba-ponggaba se jumenneng e pakotthan padha ngarep nembara’. Sabab nembara’ masthe ojan.

Atobat

Anggidannepon Zainur Rahman Nr.*

Dhara se agili dhari matana dika ba’ onggu-onggu

Nandha’agiya atena se loka kalaban terro masemma’a

Ban ambuwa onggu alako dusa dha’ ka Se Kobasa

gilina dhara dhari matana dika

Amarga nyettong atena ka Se Kobasa

Dhara se acapcapan ka tanangnga mandar daddi bukte oca’na

Ban pangaterro atena se tera’ tor bagus

Janji se ampon eoca’agi

Mandar padhana copa se gaggar ka tana

Se ta’ bisa ekalodhu’ pole

Moga-moga bukte odhi’ salanjangnga kalaban

Pangarep ambuwa se alako dusa, ta’ co-ngoco ka Se Kobasa.

*Santre Pondhuk Annuqayah Lu’-Gulu’, Sumenep.

Sanja’ e attas epetthek dhari Jawa Pos Radar Madura (JPRM) eccaban Ahad, 24 Januari 2016

Aeng Mata Ebu I Nyalase I Tase’ Kerrong I Moh. Ghufron Cholid*

Aeng Mata Ebu
langnge’ duwa
nyonar taresna
dhalem dhadha
akaca ate
ka makam jalan ngastete
masemma’ ka guste

langnge’ duwa
tera’ ka dhalem ate
nyakse’e tanang-tanang duwa
daddi andhana
langnge’ taresna
ka guste

2015

Nyalase
nyalase
padhana ngennal ate
kabendherran dhabuna guste

nyalase
langnge’ angko
robbu ta’ tanto

2015

Tase’ Kerrong
tase’ kerrong aombek sabbar
bila guste tojjuwan odhi’
tojjuwan abakte

2015

*)Guru e SMP Assanusi Torjunan, Robatal, Sampang.

Sanja' e attas epetthek dhari Jawa Pos Radar Madura (JPRM) eccaban Ahad, 24 Januari 2016

Ra'-Tera' Tana

Anggidannepon Ach. Suhaili*

Jagana tedhung akoleya’

Mecengngar mata maora’ ra’-ora’

E bakto lampu e kamar se latera’

Ngala’ kalambi ban songko’ e erra’

Tana se tera’

Ajam amonye mastena pajjar ampon dhapa’

Bang-labang padha abukka’

Apol-kompol saleng magi ca’-oca’

Antara se bagus tor se juba’

Salastarena ngadhep dha’ Allah Se Kobasa

SMA Annuqayah, 09-01-2016

*)Santre Pondhuk Annuqayah Lu'-Gulu', Sumenep.

Sanja' eattas epetthek dhari Jawa Pos Radar Madura (JPRM) eccaban Ahad, 17 Januari 2016.