Radar Madura |
Carpan Mudhar
CH.*
POLA areya se ekoca’ aba’ ta’ arga. Otabana
pole, pola areya se ekoca’ mate jeng-manjeng. Odhi’ keng ta’ kabilang. Badha
keng ta’ katela’. Apa banne ba’na se mella’ matana gerrang. Ajarunggut mara
gaja, tape atena kerreng, rangngo’ mara karopo’. Kaangenan sakejja’ kelmet.
”Molae sateya
ta’ usa emo’ ban urusan gudhang. Mon la badha e bengko ja’
ma-narema telpon urusanna gudhang. Apapole telpon dhari katowa kalompo’na.
Senga’! Etompo ban sengko’ makke la budhu’en sapa.”
Ngedhing cacana,
sengko’ ta’ andhi’ ate badha e dhalem. Nanges e adha’na ba’na tadha’ gunana.
Atena ba’na gali alebbiyan dhari bato se paleng gali. Terro sengko’ acerrenga
sa lar-kellar, keng aba’ todhus ka oreng. Andhi’ ana’ tatello’ me’ badha’a tang
ate aesse reng laen salaen ba’na.
Mon epekker
karena, ba’na bannya’ obana sajjegga ba’na esangka ngala’ pesse e kantorra
kennengnganna alako. Pajat ta’ sa’apa bannya’na ban tadha’ bukte. Tape naleka
ba’na ebajar kaangguy narema, nyaba’, nyempen, ban noles kalowar maso’na pesse maka
pesse jareya daddi tanggung jawabba ba’na. Elangnga pesse ta’ kalaban badha
arampok otaba ta’ ekataowe apa kalero tolesan. Mangka pantes mon ba’na ban
kantorra epotong bajaranna kaangguy agante’e pesse se elang.
Sajjegga jareya
ba’na bannya’ obana. Gan bila ba’na se enga’a. Ba’ bisa’a ba’na mekker ta’
acampor napso. Mayu padha nga’-kenga’e gi’ asal. Mara
jalanna odhi’ padha gi’-gigi’. Sengko’ ban ba’na la padha neggu’ kalakowan
teptep, sanajjan ta’ sogi enga’ tatangga. Mayu papenter asokkor, ne’mat se badha
olle atamba.
Sengko’ gun bisa
acaca ka aba’ dibi’. Aduwa tor anyo’on ka Se Kobasa. E settong bakto sengko’
tapaksa acaggik ban ba’na. Nyoro ba’na pabannya’ asapora, aduwa, ban anyo’on.
Apa jawabba ba’na, ”Se Kobasa ta’ ngedhing ka duwana engko’. Allah ta’ bellas,”
jareya ca’-oca’anna ba’na.
Nyoro ba’na
abajang cekka’na enga’ kole’ labang. Kadhang la ta’ ena-genna. Najjan abajang,
bajangnga ba’na lebbi lekkas dhari reng ngakan ring-guring panas. Lebbi kaburu
dhari nyocco’na pao mano’ babburu. Banne ba’na se dullu. Oreng se earep
ngangkes sengko’ ka tenggangan.
***
Emmat sateya daddi katowa kalompo’ e gudhang
kennengnganna sengko’ alako. Emmat agante Didi’ se ealle ka kennengngan laen se
lebbi jau. Ba’na tamburuwan ka Emmat se sanyatana pangormatta Emmat ka reng
bine’ ce’ tenggina.
Emmat ngargai ka
ba’na ban ka lakena ca-kanca se laen. Tape mon sengko’ ngoca’agi ka ba’na, ba’na
ta’ kera parcaja. Tanto bai ba’na ngoca’ ja’ mon sengko’ abillai Emmat. Nyata
se kalero pekker ban sangka’anna ba’na. Daddi pas ta’ nemmo bendherra oreng. Apapole
lakar la sala, bendher sakale, daddi salana.
Ba’ari’ bariya
Emmat neggur sengko’ ja’ mon lakona sengko’ ta’ genna. Ollena ta’ berse, lako
tellat, lako ngantok, moleyan ka adha’, ban en-laenna. Engko’ gun nondhu’ ta’ metto saot. Terro sengko’ acareta’a ban
abala’a se sanyatana. Ka sapa pole sengko’ acareta’a mon ta’ ka Emmat. Tape
baramma carana. Sengko’ dibi’ se ta’ bisa. Pangaterro elompa’ todhus.
Kalagguwanna
Emmat ngolok pole. Ta’ neng e kantor. Bakto alako sakanca’an, Emmat nyemma’i
sengko’, pas ngoca’, ”Sengko’ badha parlo,” orengnga duli ngalle laju manjeng e
bang-labang.
Sengko’ duli
entar. Ta’ bangal ngabas mowana, apapole tatemmo mata. Sengko’ nondhu’. Najjan
daddi katowa Emmat ta’ bannya’ obana. Emmat paggun se ri’-bari’na. Sengko’
aromasa todhus, sabab tengka polana ba’na. Ja’ sakenga ra-bara, sake’na kettheng
nyot-ennyotan ta’ gellem leddu’.
”Mara oba carana
alako! Se laen ameddu. Sateya mayu mekker! Ba’na alako edhinna’ koduna asokkor.
E lowar bannya’ oreng ta’ neggu’ lako. Padha terro alakowa e gudhang dhinna’.
Mangkana, ba’na se badha e dhalem, pas...”
”Oo, iyya. Sateya
baktona, Mat. Sengko’ maap ka ba’na. Sengko’ ba’ari ta’ nyaot banne sengko’
ta’ endha’ akatowa ba’na. Sengko’ nyatana malo, Mat.”
”Arapa? Mara
ngoca’ ta’ usa todhus. Pola sengko’ bisa abanto.”
Sengko’ acareta
kabbi ka Emmat rang-terrangan dhari masala telpon sampe’ rassa tamburuwanna
ba’na ka Emmat. Dakkala Emmat takerjat ta’ parcaja. Tape ka budhi-budhi Emmat
gun milget neng-enneng. Antara narema otaba enja’. Sageddhagan Emmat mesem, sageddhagan
mareddheng, nyarotheng. Emmat aromasa loco ban berra’ e dhalem bannya’na
kaaneyan odhi’ se kodu ejalane sengko’.
Cekka’ e kopeng
terbas ka ate oca’na Emmat, ”Ella mon andhi’ bine ja’ patabar ka oreng, kowa.
Mon ta’ cokop bukte padhana matabar se bine’ ka oreng laen. Salam ka selake’!”
Sengko’ ta’
nyaot iyya otaba enja’ sabab sengko’ kabingongan ban ta’ bakal madhapa’ salamma
Emmat. Oca’na Emmat se laen, sengko’ sabala soro pabannya’ anyo’on ka Allah Se
Maha Agung.
Emmat oreng se
etamburuwagi ba’na ka sengko’ sakone’a ta’ perna korang ajar. Ta’ perna agudha
sengko’. Sakonco’na obu’ sengko’ ta’ tagiyar ka oreng laen. Apapole
ka Emmat, makke ca’na oreng Emmat jareya gantheng.
Ba’na settong,
Ka’, reng lake’ samporna e atena sengko’. Tape ba’na arapa ma’ ta’ ngargai
aba’na dibi’? Arapa ba’na ma’ ta’ neser ka sengko’? Arapa ba’na ma’ ta’
bu-ambu se tamburuwan ka Emmat?
Taowa ba’na, Ka’,
oreng se lako agudha sengko’ mala oreng se paleng semma’ ka ba’na. Oreng se
ca’na ba’na paleng bagus. Oreng se tengka lakona ekasambu’i ba’na. Oreng se
la’-ella’ are, la’-ella’ malem amaen ka bengko parlo ka ba’na.
Sinol, Ka’,
oreng se koduna epajau dhari kaodhi’anna sengko’ ban ba’na. Tape ban ba’na Sinol
etangga’. Mon ta’ amaen, Sinol etelpon soro entar ka bengko. Emmat se ngargai
ba’na eda’-didda’ arga ban parasa’anna.
Sabaligga, Sinol,
oreng se bejjat, oreng se ta’ andhi’ palaturan, oreng se ngennye’ ba’na, oreng
se entheng ka ba’na ehormat, ealem, eargai larang, ban eso’on ka bun-embunanna
ba’na. Ma’ ta’ tabukka’ atena ba’na, Ka’?
Laggu’ ka sadhumalem
ba’na bakal tao, arapa ba’na mon katamoyan Sinol, sengko’ ma’ akanceng labang. Sinol
se koduna ajaga daddi pagar sabab ba’na ta’ andhi’ ate regget, tape Sinol se
pan-barampan kale nyajal arosak. Mangkana ba’na parcaja satos persen ka Sinol.
Sengko’ seggut
ta’ eamete bakto Sinol badha e bengko. Ba’na yat-seyot entar melle roko’,
mangkat melle jagung tono, ban en-laenna. E budhi, kancana ba’na nyalodur ka
kamar ban sengko’ kodu aperrang guna ajaga argana aba’ ban kahormatanna ba’na.
”Korang ajar
ba’na, Nol!” Sinol gun nyengnger colo’na. Mowana aropa setan. ”Senga’ ban
sengko’ ekabala ka tang lake!”
”He, lakena
ba’na kerras ta’ akerres. Hehe,”
Sajjegga
kadaddiyan jareya, mon ba’na katamoyan Sinol sengko’ duli akanceng labang.
Koduna ka Sinol ba’na tamburuwan. Banne ka Emmat. (*)
*)Guru basa Indonesia e SMP Al Ittihad Camplong,
Sampang.
Epetthek dhari Jawa Pos Radar Madura (JPRM) eccaban Ahad, 6 Agustus 2017
Tidak ada komentar:
Posting Komentar