72 Omorra
Nagara se mardika e taon 1945
Ta’ lopot dhari jasa santre ban ulama’
Jasa ceng-lanceng ban na’-kana’
Jasa sadaja ra’yat Indonesia se bannya’
Banne jasana oreng se tama’
Tama’ pangkat ban tama’ ha’na masyarakat
Ta’ mekker oreng bannya’ se sakarat
72 taon banne omor se singkat
Samoga’a daddiya omor se berkat
Dzulqa’dah, 1438 H
...........................
Indonesia Mardika Banne Mara Dika
Akebbar pandira mera ban pote
Etajjek sogek magadhi nyaba langkong pate
Ta’ sakone’ se mole dha’ rahmatullah alaih
Asandhang panglima e dunnya, syahid istilana
Malar mandar katarema’a, amal ban ibadana
Apolong laggu’ e Ajunna
.....!?
Ngen-angen akalemba’,
Jan-onjanan akantha omba’
Ja’ senga’a bula odhi’ lamba’
Tape, Indonesia mardika banne mara dika
Se ajaja, asomaja, asalongir, kantha ta’ sala
Ngakan ha’na ra’yat se apongsa ban eseksa
Bila pon teba kabadha’an. Pas apangrasa,
Ngoca’: ”Neko ujiyan dhari Se Kobasa”
Banne koros ban kene’ daddi alasan
Salaras ban janjina, ta’ dujan ngakan ban
ta’ kera ngala’an.
Sabab pesse ta’ alesan, tape janji paggun
etagi sampe’ amaesan...
Dzulqa’dah, 1438 H
.................................
Paddhang Salerana
Akalemba’ rassana
Jang-bajangan ekabunga
Ekaate sampe’ ekamempe,
Taresna settong paggun abakte
Esanggu dika...
Juba pote ban surban mera
Pacca’na ban monyena
Ngakalotthak kedhinganna.
Nabbu kalampowanna ate,
Enga’ gi’ sabellunna dhateng pate...
Baseyatta...
”Senga’ pangastete,
Bango’ pote tolang tembang pote mata,
apapole pas pote ate”
Dzulqa’dah, 1438 H
(Epetthek dhari Jawa Pos Radar Madura eccaban Ahad, 20 Agustus 2017)
Tidak ada komentar:
Posting Komentar